റ​സ​ൽ, ന​രെ​യ്ൻ ഷോ​യി​ൽ ഡെ​വി​ൾ​സ് ത​ക​ർ​ന്നു; കെ​കെ​ആ​ർ വി​ജ​യം 71 റ​ണ്‍​സി​ന്

റസൽ, നരെയ്ൻ ഷോയിൽ ഡെവിൾസ് തകർന്നു; കെകെആർ വിജയം 71 റണ്‍സിന്

കോൽക്കത്ത: ഐപിഎലിലെ 13-ാം മത്സരത്തിൽ ഡൽഹി ഡെയർ ഡെവിൾസിനെതിരേ കോൽക്കത്ത നൈറ്റ് റൈഡേഴ്സിനു കൂറ്റൻ വിജയം. 71 റണ്‍സിനാണ് കെകെആർ ഡെവിൾസിനെ തുരത്തിയത്.

വെസ്റ്റ് ഇൻഡീസ് ബാറ്റ്സ്മാൻ ആന്ദ്രെ റസൽ ബാറ്റിംഗിൽ തിളങ്ങിയപ്പോൾ മറ്റൊരു വിൻഡീസ് താരം സുനിൽ നരെയ്ൻ ബൗളിംഗിൽ ഡൽഹിയുടെ നടുവൊടിച്ചു.

ആദ്യം ബാറ്റു ചെയ്ത കെകെആർ ഉയർത്തിയ 201 റണ്‍സ് വിജയലക്ഷ്യം പിന്തുടർന്ന ഡൽഹി 14.2 ഓവറിൽ 129 റണ്‍സിന് എല്ലാവരും പുറത്തായി.

ഗ്ലെൻ മാക്സ്വെൽ(22 പന്തിൽ 47), റിഷഭ് പന്ത്(26 പന്തിൽ 43) എന്നിവർക്കൊഴികെ മറ്റാർക്കും ഡൽഹി നിരയിൽ രണ്ടക്കം കടക്കാൻ കഴിഞ്ഞില്ല. കെകെആറിനായി സുനിൽ നരെയ്ൻ(18/3), കുൽദീപ് യാദവ്(32/3) എന്നിവർ മൂന്നു വിക്കറ്റ് വീതം നേടി.

ഈഡൻ ഗാർഡനിൽ ആദ്യം ബാറ്റുചെയ്ത കോൽക്കത്ത ഒന്പതു വിക്കറ്റ് നഷ്ടത്തിൽ 200 റണ്‍സ് നേടിയിരുന്നു. നീതീഷ് റാണെ(59), ആന്ദ്രെ റസൽ(12 പന്തിൽ 41) എന്നിവരുടെ പ്രകടനമാണ് കോൽക്കത്തയ്ക്കു മികച്ച സ്കോർ സമ്മാനിച്ചത്.

ടോസ് നഷ്ടപ്പെട്ട് ബാറ്റിംഗിനിറങ്ങിയ കെകെആറിന് തുടക്കത്തിൽത്തന്നെ സുനിൽ നരെയ്നെ(1) നഷ്ടപ്പെട്ടു. ട്രെന്‍റ് ബോൾട്ടിനായിരുന്നു വിക്കറ്റ്. രണ്ടാം വിക്കറ്റിൽ ഒത്തു ചേർന്ന റോബിൻ ഉത്തപ്പ-ക്രിസ് ലിൻ സഖ്യം സ്കോർ ബോർഡിൽ 55 റണ്‍സ് കൂട്ടിച്ചേർത്തു. 35 റണ്‍സ് നേടി ഉത്തപ്പ പുറത്തായതിനു പിന്നാലെ 29 പന്തിൽ 31 റണ്‍സുമായി ലിന്നും മടങ്ങി.

മികച്ച ഷോട്ടുകളുമായി തുടങ്ങിയെങ്കിലും നായകൻ ദിനേശ് കാർത്തിക്കിനും മുന്നോട്ടുപോകാൻ കഴിഞ്ഞില്ല. 10 പന്തിൽ 19 റണ്‍സായിരുന്നു കാർത്തിക്കിന്‍റെ സന്പാദ്യം.

ഒരറ്റത്തു പോരാടിയ നിതീഷ് റാണെയ്ക്കുകൂട്ടായി ആന്ദ്രെ റസൽ എത്തിയതോടെ കെകെആർ സ്കോർബോർഡ് കുതിച്ചു. ബൗളർമാരെ തലങ്ങും വിലങ്ങും പറത്തിയ റസൽ 11 പന്തിൽ 41 റണ്‍സ് അടിച്ചുകൂട്ടിയശേഷം ബോൾട്ടിന്‍റെ യോർക്കറിനു മുന്നിൽ വീണു. ആറു സിക്സറുകളാണ് റസൽ പറത്തിയത്.

അർധസെഞ്ചുറി തികച്ച റാണെ (35 പന്തിൽ 59) യും പുറത്തായതോടെ കെകെആർ സ്കോർ ഇഴഞ്ഞു. അവസാന ഓവറിൽ മൂന്നു വിക്കറ്റ് നഷ്ടപ്പെടുത്തിയ കോൽക്കത്തയ്ക്ക് ഒരു റണ്‍സ് മാത്രമാണ് നേടാൻ കഴിഞ്ഞത്.

ഡൽഹിക്കായി രാഹുൽ തെവാട്ടിയ 18 റണ്‍സ് വഴങ്ങി മൂന്നു വിക്കറ്റ് നേടി. ക്രിസ് മോറിസ്, ട്രെന്‍റ് ബോൾട്ട് എന്നിവർ രണ്ടു വിക്കറ്റുമായി രാഹുലിനു പിന്തുണ നൽകി.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.