ക​രു​ത്തു വീ​ണ്ടെ​ടു​ത്തു രോ​ഹി​ത്; കോ​ഹ്ലി​ക്കു മു​ന്നി​ൽ വീ​ണ്ടും റ​ണ്‍​മ​ല

കരുത്തു വീണ്ടെടുത്തു രോഹിത്; കോഹ്ലിക്കു മുന്നിൽ വീണ്ടും റണ്‍മല

മുംബൈ: ഐപിഎലിൽ വിരാട് കോഹ്ലിയുടെ റോയൽ ചലഞ്ചേഴ്സ് ബാംഗളൂരിനെതിരേ മുംബൈ ഇന്ത്യൻസിനു കൂറ്റൻ സ്കോർ. രോഹിത് ശർമ(94), എവിൻ ലെവിസ്(65) എന്നിവരുടെ പ്രകടനങ്ങളുടെ മികവിൽ മുംബൈ 20 ഓവറിൽ ആറു വിക്കറ്റ് നഷ്ടത്തിൽ 213 റണ്‍സ് കണ്ടെത്തി. സ്കോർ ബോർഡ് തുറക്കുംമുന്പ് രണ്ടു വിക്കറ്റ് നഷ്ടപ്പെട്ടശേഷമായിരുന്നു മുംബൈയുടെ പ്രകടനം.

ടോസ് നേടിയ വിരാട് കോഹ്ലി ബൗളിംഗ്‌ തെരഞ്ഞെടുത്തു. ഉമേഷ് യാദവ് എറിഞ്ഞ ആദ്യ ഓവറിലെ ആദ്യ രണ്ടു പന്തിൽ രണ്ടു മുംബൈ ബാറ്റ്സ്മാൻമാർ കൂടാരം കയറി. സൂര്യകുമാർ യാദവ്(0), ഇഷാൻ കിഷൻ(0) എന്നിവരായിരുന്നു യാദവിന്‍റെ ഇര.

ഇതിനുശേഷം ഒത്തുചേർന്ന എവിൻ ലൂയിസ്-രോഹിത് ശർമ സഖ്യം മുംബൈയെ മുന്നോട്ടുനയിച്ചു. ലൂയിസായിരുന്നു കൂടുതൽ ആക്രമണകാരി. അർധസെഞ്ചുറി തികച്ചു മുന്നോട്ടു കുതിച്ച ലെവിസ് മുംബൈ സ്കോർ 108ൽ വീണു. 42 പന്തിൽ 65 റണ്‍സായിരുന്നു ലെവിസിന്‍റെ സന്പാദ്യം.

ഇതിനുശേഷം രോഹിത് ആക്രമണത്തിന്‍റെ ഉത്തരവാദിത്തം ഏറ്റെടുത്തു. 32 പന്തിൽ അർധസെഞ്ചുറി കുറിച്ച രോഹിത് ശേഷിച്ച 22 പന്തിൽ 44 റണ്‍സ് നേടി. 52 പന്ത് നീണ്ട ഇന്നിംഗ്സിൽ അഞ്ചു സിക്സറും പത്തു ബൗണ്ടറികളും രോഹിത് പായിച്ചു.

ഹാർദിക് പാണ്ഡ്യ( അഞ്ചു പന്തിൽ 17) പുറത്താകാതെനിന്നു. മുംബൈക്കായി ഉമേഷ് യാദവ്, കോറി ആൻഡേഴ്സണ്‍ എന്നിവർ രണ്ടും ക്രിസ് വോക്സ് ഒന്നും വിക്കറ്റ് നേടി.

ഇത് തുടർച്ചയായ രണ്ടാം മത്സരത്തിലാണ് കോഹ്ലിപ്പട 200 റണ്‍സിൽ അധികം വഴങ്ങുന്നത്. കഴിഞ്ഞ മത്സരത്തിൽ രാജസ്ഥാൻ റോയൽസ് ആർസിബിക്കെതിരേ 217 റണ്‍സ് അടിച്ചുകൂട്ടിയിരുന്നു. 92 റണ്‍സ് നേടിയ മലയാളി താരം സഞ്ജു സാംസണിന്‍റെ മികവിലായിരുന്നു രാജസഥാന്‍റെ പ്രകടനം. മത്സരത്തിൽ രാജസ്ഥാൻ വിജയിച്ചു.