പങ്കാളിത്ത പെൻഷനിൽനിന്ന് മാറാം : Deepika.com Tax News

Services & Questions

പങ്കാളിത്ത പെൻഷനിൽനിന്ന് മാറാം

എയ്ഡഡ് സ്കൂളിൽ 1-06-2011ൽ അഡീഷണൽ ഡിവിഷനിൽ നിയമനം ലഭിച്ചു. രണ്ടുവർഷം കഴിഞ്ഞിട്ടും അംഗീകാരം ലഭിക്കാതിരുന്നതിനാൽ അതേ മാനേജ്മെന്‍റിൽ മറ്റൊരു സ്കൂളിൽ 3-6-2013ൽ മാറ്റി നിയമിക്കുകയും അതിന് അംഗീകാരം ലഭിക്കുകയും ചെയ്തു. അതിനാൽ പങ്കാളിത്ത പെൻഷൻ പദ്ധതിയിൽ ഉൾപ്പെട്ടു. ഇപ്പോൾ 1-6-2011 മുതലുള്ള നിയമനവും സർക്കാർ അംഗീകരിച്ചു. അതിനാൽ സ്റ്റാറ്റ്യൂട്ടറി പെൻഷൻ പദ്ധതിയിൽ തുടരാൻ കഴിയുമോ‍? പങ്കാളിത്തപെൻഷനിൽനിന്നും മാറുന്നതിനും അടച്ച തുക തിരികെ ലഭിക്കുന്നതിനും ആരെയാണ് സമീപിക്കേണ്ടത്?
ബിനു വർഗീസ്, കണ്ണൂർ

1-4-2013നു മുന്പ് സർവീസിലുണ്ടായിരുന്ന ജീവനക്കാർക്ക് അതിനുശേഷം നിയമനം ലഭിച്ചാൽ സ്റ്റാറ്റ്യൂട്ടറി പെൻഷനിൽ തുടരാൻ അർഹതയുണ്ട് എന്നുള്ള ഗവ. ഉത്തരവുപ്രകാരം അതിനുള്ള ഓപ്ഷൻ ഓഫീസ് മേധാവിക്ക് സമർപ്പിക്കുക. GO(P) 209/2013/Fin.dt. 07-05-2013 എന്ന ഗവ. ഉത്തരവിൽ ഓപ്ഷൻ നൽകേണ്ട ഫോം നൽകിയിട്ടുണ്ട്. അത് പൂരിപ്പിച്ച് ഉടൻതന്നെ ഓഫീസ് മേധാവിക്കു നൽകുക.

പങ്കാളിത്ത പെൻഷൻ പദ്ധതിയിൽ അടച്ച തുക തിരികെ ലഭിക്കുന്നതിനുള്ള ഉത്തരവ് സർക്കാരിൽനിന്നും ലഭിക്കേണ്ടിയിരിക്കുന്നു. അതിനാൽ പങ്കാളിത്ത പെൻഷൻ പദ്ധതിയിൽ അടച്ച തുകയുടെ വിവരം കാണിച്ചുകൊണ്ട് ഓഫീസ് മേധാവി മുഖേന സർക്കാരിലേക്ക്, ഡിപിഐയിലേക്ക് സമർപ്പിക്കുക.