പുനർവിവാഹം കഴിച്ചാൽ ഫാമിലി പെൻഷൻ കുട്ടിയുടെ പേരിലേക്ക് മാറ്റി ലഭിക്കും : Deepika.com Tax News

Services & Questions

പുനർവിവാഹം കഴിച്ചാൽ ഫാമിലി പെൻഷൻ കുട്ടിയുടെ പേരിലേക്ക് മാറ്റി ലഭിക്കും

എന്‍റെ ഭർത്താവ് സർവീസിലിരിക്കെ മരണമടഞ്ഞതുകൊണ്ട് ആശ്രിതനിയമന പ്രകാരം എനിക്ക് എൽഡി ക്ലർക്കായി ജോലി ലഭിച്ചു. ഭർത്താവ് പോലീസ് ഡിപ്പാർട്മെന്‍റിലായിരുന്നു. എനിക്ക് നാലു വയസുള്ള ഒരു കുട്ടിയുണ്ട്. കുട്ടി എന്‍റെ സംരക്ഷണയിലാണ്. എനിക്ക് ഫാമിലി പെൻഷൻ ലഭിക്കുന്നുണ്ട്. ഞാൻ പുനർവിവാഹം കഴിച്ചാൽ ഫാമിലി പെൻഷൻ തുടർന്നു ലഭിക്കില്ല എന്നറിയുന്നു. എന്‍റെ കുട്ടിയുടെ സംരക്ഷണത്തിനുള്ള ഫാമിലി പെൻഷൻ എനിക്ക് അർഹതപ്പെട്ടതല്ലേ? അത് സംരക്ഷിച്ചുകിട്ടാൻ എന്താണ് ചെയ്യേണ്ടത്?
ലിസി ജോണ്‍, പെരുവന്താനം

താങ്കൾ പുനർവിവാഹം കഴിച്ചാൽ ഭർത്താവിന്‍റെ പേരിൽ ലഭിച്ചിരുന്ന ഫാമിലി പെൻഷൻ ഇല്ലാതാകും.

എന്നാൽ പുനർവിവാഹത്തിനുശേഷവും ആദ്യ ഭർത്താവിന്‍റെ കുട്ടി താങ്കളുടെ സംരക്ഷണയിൽ കഴിയുന്നതുകൊണ്ട് ഫാമിലി പെൻഷൻ കുട്ടിയുടെ പേരിൽ മാറ്റി ലഭിക്കുന്നതാണ്. എന്നാൽ കുട്ടി മൈനർ ആയതുകൊണ്ട് ഫാമിലി പെൻഷന് ഗാർഡിയനായ താങ്കൾക്കുതന്നെ വാങ്ങുവാൻ സാധിക്കും. താങ്കൾ ലീഗൽ ഗാർഡിയനും താങ്കളുടെ സംരക്ഷണയിലാണ് കുട്ടി കഴിയുന്നതെന്നും തെളിയിക്കുന്ന റവന്യു അധികാരിയിൽ നിന്നുള്ള സർട്ടിഫിക്കറ്റ് സഹിതം കുട്ടിയുടെ പേരിൽ ഫാമിലി പെൻഷൻ ലഭിക്കുന്നതിനുള്ള അപേക്ഷ ഭർത്താവ് ജോലി ചെയ്തിരുന്ന ഓഫീസ് മുഖേന സമർപ്പിക്കുക.