ഉപജീവനപ്പടി ലഭിക്കും , മറ്റു ജോലികൾ ചെയ്യരുത് : Deepika.com Tax News

Services & Questions

ഉപജീവനപ്പടി ലഭിക്കും , മറ്റു ജോലികൾ ചെയ്യരുത്

റവന്യു വകുപ്പിലെ വില്ലേജ് അസിസ്റ്റന്‍റാണ്. എന്‍റേതല്ലാത്ത കാരണങ്ങളാൽ എന്നെ സസ്പെൻഡ് ചെയ്തിരിക്കുകയാണ്. വില്ലേജ് ഓഫീസറുടെ ഭാഗത്തുനിന്നുണ്ടായ തെറ്റിന്‍റെ അടിസ്ഥാനത്തിൽ വില്ലേജ് ഓഫീസറോടൊപ്പം എന്നെയും സസ്പെൻഡ് ചെയ്യുകയായിരുന്നു. മൂന്നുമാസമായിട്ടും ഉപജീവനപ്പടി അനുവദിച്ചുകിട്ടിയിട്ടില്ല. മറ്റ് തൊഴിൽ ഒന്നും ചെയ്യാനും പാടില്ല. എന്നാൽ മറ്റുമാർഗമില്ലാത്തതുകൊണ്ട് ഞാൻ ഒരു പ്രൈവറ്റ് ഫാമിൽ സൂപ്പർവൈസറായി ജോലി ചെയ്യുകയാണ്. ഇത് എന്‍റെ ഉദ്യോഗത്തെ ഏതെങ്കിലും തരത്തിൽ ബാധിക്കുമോ?
ഡി. മോഹൻദാസ്, ഇടുക്കി

ഒരു ജീവനക്കാരനെ സസ്പെൻഡ് ചെയ്തുകൊണ്ട് ഉത്തരവിറക്കുന്പോൾ, ആ ഉത്തരവിൽ ഉപജീവനപ്പടിക്ക് അർഹതയുണ്ട് എന്നുകൂടി പ്രത്യേകം നിർദേശിക്കാറുണ്ട്. ഉത്തരവിൽ ആ വിവരം ഇല്ലെങ്കിൽ വ്യക്തതയ്ക്കുവേണ്ടി ഉചിത മാർഗത്തിൽ ഉപജീവനപ്പടിക്കുവേണ്ടി അപേക്ഷ സമർപ്പിക്കാം. (Subsistance Allowance) ഉപജീവനപ്പടി വാങ്ങുന്നതിനുവേണ്ടി ആ കാലയളവിൽ പ്രതിഫലം പറ്റുന്ന ജോലിയിൽ ഏർപ്പെടുന്നില്ല എന്ന സത്യവാങ്മൂലം സമർപ്പിക്കേണ്ടതാണ്. കൂടാതെ സത്യവാങ്മൂലം ഒരു ഗസറ്റഡ് ഓഫീസർ കൗണ്ടർ സൈൻ ചെയ്യേണ്ടതുമാണ്. അതിനാൽ മറ്റു ജോലികൾ ചെയ്യുന്ന കാര്യത്തിൽ ശ്രദ്ധിക്കേണ്ടതാണ്.