ഹെഡ്മാസ്റ്റർ പ്രമോഷനും ഡിപ്പാർട്ട്മെന്‍റൽ ടെസ്റ്റ് യോഗ്യതയും : Deepika.com Tax News

Services & Questions

ഹെഡ്മാസ്റ്റർ പ്രമോഷനും ഡിപ്പാർട്ട്മെന്‍റൽ ടെസ്റ്റ് യോഗ്യതയും

സ്കൂളുകളിൽ ഹെഡ്മാസ്റ്റർ പ്രമോഷൻ ലഭിക്കണമെങ്കിൽ പിഎസ്‌‌സി നടത്തുന്ന ഡിപ്പാർട്ട്മെന്‍റൽ ടെസ്റ്റിൽ അക്കൗണ്ട് ടെസ്റ്റും (ലോവർ) കെഇആറും പാസായിരിക്കണമെന്നു നിർദേശിച്ച് അടുത്ത കാലത്ത് ചില ഉത്തരവുകളും കെഇആർ ഭേദഗതിയും വന്നുകഴിഞ്ഞു.

വിദ്യാഭ്യാസ അവകാശ നിയമപ്രകാരം (ആർടിഇ ആക്‌‌ട്) 12 വർഷം അധ്യാപക പരിചയവും ബന്ധപ്പെട്ട ഡിപ്പാർട്ട്മെന്‍റൽ ടെസ്റ്റും കെഇആറും പാസായവർക്കാണ് ഹെഡ്മാസ്റ്റർ പ്രമോഷൻ നൽകേണ്ടത്. ഇതിനു ചുവടുപിടിച്ചാണ് സർക്കാർ സമയാസമയങ്ങളിൽ വിവിധ ഉത്തരവുകൾ പുറപ്പെടുവിക്കുന്നത്.

എൽപി/യുപി ഹെഡ്മാസ്റ്റർ പ്രമോഷനും ടെസ്റ്റ് യോഗ്യതയും

എൽപി/യുപി സ്കൂളിലെ ഹെഡ്മാസ്റ്റർ പ്രമോഷൻ ലഭിക്കുന്നതിനായി പ്രൈമറി അധ്യാപകരുടെ യോഗ്യതയെ സംബന്ധിച്ച് 19-2-2018ൽ സർക്കാർ ഉത്തരവ് ഇറക്കിയിരുന്നു.

കെഇആർ ചാപ്റ്റർ 14 (എ) റൂൾ 45 ബി(1) ഭേദഗതി വരുത്തിക്കൊണ്ടാണ് സ.ഉ(എംഎസ്) നം. 16/18 പൊതുവിദ്യാഭ്യാസം തീയതി 19-2-2018 എന്ന ഉത്തരവിറക്കിയത്. നിലവിൽ കെഇആർ ചാപ്റ്റർ 14 (എ) റൂൾ 45 ബി(1)ൽ പറയുന്നത്. - എൽപി/യുപി ഹെഡ്മാസ്റ്റർ പ്രമോഷൻ ലഭിക്കുവാൻ പിഎസ്‌‌സി നടത്തുന്ന അക്കൗണ്ട് ടെസ്റ്റ് (ലോവർ) പാസായിരിക്കണമെന്നതാണ്. 19-2-2018ലെ പുതിയ ഉത്തരവ് പറയുന്നത് എൽപി/യുപി സ്കൂൾ ഹെഡ്മാസ്റ്റർ പ്രമോഷൻ ലഭിക്കുവാൻ അക്കൗണ്ട് ടെസ്റ്റിനു (ലോവർ) പുറമേ കെഇആർ പാസായിരിക്കണം. ചുരുക്കത്തിൽ എൽ പി/യുപി സ്കൂൾ ഹെഡ്മാസ്റ്ററാകാൻ അക്കൗണ്ട് ടെസ്റ്റും (ലോവർ) കെഇആറും പാസായിരിക്കണം.

എന്നാൽ കെഇആർ ചാപ്റ്റർ 14 (എ) റൂൾ 45 ബി (4)ൽ 50 വയസ് പൂർത്തിയായ അധ്യാപകരെ ഡിപ്പാർട്ട്മെന്‍റൽ ടെസ്റ്റിൽനിന്നും ഒഴിവാക്കിയിട്ടുണ്ട്. 19-2-2018ൽ ഇറക്കിയ സർക്കാരിന്‍റെ പുതിയ ഉത്തരവിൽ റൂൾ 45 ബി(4)നെ സംബന്ധിച്ചു ഒന്നുംതന്നെ പറയുന്നില്ല. ഇതിൽനിന്ന് മനസിലാക്കേണ്ടത് എൽപി/യുപി ഹെഡ്മാസ്റ്റർ പ്രമോഷന് 50 വയസ് പൂർത്തിയായവരെ ടെസ്റ്റ് യോഗ്യതയിൽനിന്നും ഒഴിവാക്കിയ നിയമത്തിൽ മാറ്റം വന്നിട്ടില്ല.

സ.ഉ(എംഎസ്)നം. 92/2014 പൊതു വിദ്യാഭ്യാസം തീയതി 2-6-2014ലും ഇതു സംബന്ധിച്ചു നേരത്തെ ഉത്തരവ് ഇറക്കിയിരുന്നു. വിദ്യാഭ്യാസ അവകാശ നിയമത്തിലെ 18-ാം ചട്ടത്തിൽ ഒന്നാം നിയമത്തിൽ എൽപി/യുപി ഹെഡ്മാസ്റ്റർ പ്രമോഷന് അക്കൗണ്ട് ടെസ്റ്റും(ലോവർ) കെഇആറും വേണമെന്ന് നിഷ്കർഷിച്ചിരുന്നു. ഈ നിയമത്തിൽനിന്ന് 50 വയസ് പൂർത്തിയായവരെ ടെസ്റ്റ് യോഗ്യതയിൽനിന്ന് ഒഴിവാക്കിയായിരുന്നു 2-6-2014ലെ സർക്കാർ ഉത്തരവ്.

ഹൈസ്കൂൾ ഹെഡ്മാസ്റ്റർ പ്രമോഷനും ടെസ്റ്റ് യോഗ്യതയും - കെഇആർ ഭേദഗതി
സ.ഉ(എംഎസ്)നം. 157/2015 പൊതു വിദ്യാഭ്യാസം തീയതി 10-6-2015 എന്ന ഉത്തരവിലൂടെ 50 വയസ് പൂർത്തിയായ അധ്യാപകരിൽ ഡിപ്പാർട്ട്മെന്‍റൽ ടെസ്റ്റ് യോഗ്യതയുള്ളവർക്ക് ഹൈസ്കൂൾ ഹെഡ്മാസ്റ്റർ പ്രമോഷന് പ്രഥമ പരിഗണന നൽകണമെന്നു സർക്കാർ നിർദേശിച്ചു. 50 വയസ് പൂർത്തിയായ ഒട്ടേറെ അധ്യാപകർ ടെസ്റ്റ് യോഗ്യത നേടിയിട്ടുണ്ട് എന്ന വിലയിരുത്തലിന്‍റെ അടിസ്ഥാനത്തിലാണ് സർക്കാരിന്‍റെ ഈ നിലപാട്.

സർക്കാരിന്‍റെ 10-6-2015ലെ ഉത്തരവിനെതിരേ ഒരു പറ്റം അധ്യാപകർ ഹൈക്കോടതിയെ സമീപിച്ചു. കെഇആറിൽ ഭേദഗതി വരുത്തിയിട്ടില്ല എന്ന കാരണത്താൽ ടെസ്റ്റ് യോഗ്യതയുടെ പേരിൽ തടഞ്ഞുവച്ച ഹെഡ്മാസ്റ്റർ പ്രമോഷൻ നിയമനങ്ങൾ അംഗീകരിക്കുവാൻ വിവിധ വിധിയിലൂടെ ഹൈക്കോടതി ഉത്തരവു നൽകി.

ഈ സാഹചര്യത്തിലാണ് സർക്കാർ മുൻകാല പ്രാബല്യം കാണിച്ചു കെഇആർ ഭേദഗതി വരുത്തിയത്. 2017 ഡിസംബർ 13-ാം തീയതിയിലെ അസാധരണ ഗസറ്റിലാണ് ഇതുസംബന്ധിച്ച് കെഇആർ ഭേദഗതി നിലവിൽ വന്നത്. കെഇആർ ചാപ്റ്റർ 14 എ റൂൾ 44 എ സബ് റൂൾ ഒന്നിലെ രണ്ടാം ഖണ്ഡികയാണ് ഭേദഗതി വരുത്തിയത്. അധ്യാപകരിൽ 50 വയസ് പൂർത്തിയായവരിൽ പിഎസ്‌‌സി നടത്തുന്ന അക്കൗണ്ട് ടെസ്റ്റും(ലോവർ) കെഇആറും പാസായവർക്ക് ഹൈസ്കൂൾ ഹെഡ്മാസ്റ്റർ പ്രമോഷന് പ്രഥമ പരിഗണന നൽകണമെന്നാണ് കെഇആറിൽ ഭേദഗതി വരുത്തിയത്. ഇതിന് 1-6-2015 മുതൽ മുൻകാല പ്രാബല്യമുണ്ട്.