പെൻഷൻ കാര്യങ്ങൾ ട്രഷറി മുഖേന വേണം : Deepika.com Tax News

Services & Questions

പെൻഷൻ കാര്യങ്ങൾ ട്രഷറി മുഖേന വേണം

എന്‍റെ ഭർത്താവ് ബാങ്ക് മുഖേന (എസ് ബിഐ) പെൻഷൻ വാങ്ങിക്കൊണ്ടിരുന്ന ആളാണ്. കഴിഞ്ഞ മാസം അദ്ദേഹം മരണമടഞ്ഞു. പെൻഷൻ പേമെന്‍റ് ഓർഡറിൽ എന്‍റെ പേരാണ് ഫാമിലി പെൻഷൻ നോമിനിയായി ചേർത്തിട്ടുള്ളത്. ഫാമിലി പെൻഷൻ അനുവദിച്ചു കിട്ടുന്നതിനുവേണ്ടി ബാങ്കിൽ ചെന്നപ്പോൾ ഇതേപ്പറ്റി അറിയില്ലെന്നും ട്രഷറിയിൽ അന്വേഷിക്കാനുമാണ് പറഞ്ഞത്. ഈ പെൻഷൻ പാലക്കാട് സബ് ട്രഷറിയിൽനിന്നാണ് ആദ്യം വാങ്ങിയത്. അതിനാൽ പാലക്കാട് സബ് ട്രഷറിയിൽ പോകേണ്ടിവരുമോ? അതുപോലെ എന്തെല്ലാം രേഖകളാണ് കൊണ്ടുപോകേണ്ടത്?
കെ.വി. കമലമ്മ, നീണ്ടൂർ

ഇപ്പോൾ പെൻഷൻ സംബന്ധമായ എല്ലാ കാര്യങ്ങളും ട്രഷറി മുഖേനയാണ് കൈകാര്യം ചെയ്യുന്നത്. അതിനാൽ ഫാമിലി പെൻഷൻ അനുവദിക്കുന്നതിനുവേണ്ടി ഏറ്റവും അടുത്തുള്ള ട്രഷറിയിൽ ആണ് അപേക്ഷ സമർപ്പിക്കേണ്ടത്. വെള്ളക്കടലാസിൽ തയാറാക്കിയ അപേക്ഷയോടൊപ്പം മരണമടഞ്ഞ പെൻഷൻകാരന്‍റെ മരണ സർട്ടിഫിക്കറ്റിന്‍റെ അറ്റസ്റ്റ് ചെയ്ത കോപ്പി, അപേക്ഷകന്‍റെ ഫോട്ടോ, ഒപ്പ്, രണ്ട് തിരിച്ചറിയൽ അടയാളങ്ങൾ എന്നിവ ഒരു ഗസറ്റഡ് ഓഫീസർ അറ്റസ്റ്റ് ചെയ്തത്, ആധാർ കാർഡിന്‍റെ കോപ്പി, പെൻഷൻ പേമെന്‍റ് ഓർഡർ എന്നിവ സഹിതം ട്രഷറി ഓഫീസർക്ക് സമർപ്പിക്കേണ്ടതാണ്. കൂടാതെ അപേക്ഷകൻ പുനർവിവാഹം ചെയ്തിട്ടില്ല എന്നുള്ള സത്യവാങ്മൂലവും അപേക്ഷയിൽ ഉൾക്കൊള്ളിച്ചിരിക്കണം.