കുട്ടിയുടെ പേരിൽ ഫാമിലി പെൻഷൻ ലഭിക്കും : Deepika.com Tax News

Services & Questions

കുട്ടിയുടെ പേരിൽ ഫാമിലി പെൻഷൻ ലഭിക്കും

പൊതുമരാമത്ത് വകുപ്പിൽ ക്ലർക്കായി ജോലി ചെയ്തുവരുന്നു. എന്‍റെ ഭാര്യ എൽപി സ്കൂൾ ടീച്ചറായിരുന്നു. 2018 ജനുവരി മാസത്തിൽ മരണപ്പെട്ടു. അവർക്കു എട്ടു വർഷത്തെ സർവീസേയുള്ളൂ. ഞങ്ങൾക്ക് അഞ്ചു വയസുള്ള കുട്ടിയുണ്ട്. എനിക്ക് ഗവ. ജോലി ഉള്ളതിനാൽ ഫാമിലി പെൻഷൻ വാങ്ങുന്നതിനു തടസമുണ്ടോ? എന്തൊക്കെ രേഖകളാണ് പെൻഷൻ അനുവദിക്കുന്നതിനുവേണ്ടി വരുന്നത്. ആർക്കാണ് അപേക്ഷ സമർപ്പിക്കേണ്ടത്. പുനർവിവാഹം നടത്തിയാൽ തുടർന്നു ഫാമിലി പെൻഷൻ ലഭിക്കുമോ? പെൻഷന് അപേക്ഷ സമർപ്പിക്കുന്നതിന് കാലാവധി ഉണ്ടോ?
സുരേഷ്,
കുറവിലങ്ങാട്

ഗവ. സർവീസിലിരിക്കെ മരണമടയുന്ന ജീവനക്കാരന്‍റെ / ജീവനക്കാരിയുടെ ഭർത്താവിന് /ഭാര്യക്ക് ഫാമിലി പെൻഷന് അർഹതയുണ്ട്. ഭർത്താവ് സർക്കാർ ജീവനക്കാരനാണെങ്കിലും ഫാമിലി പെൻഷന് അർഹതയുണ്ട്. മരണമടഞ്ഞതിന്‍റെ തൊട്ടടുത്ത ദിവസം മുതലാണ് ഫാമിലി പെൻഷന് അർഹത. ഫാമിലി പെൻഷൻ കൂടാതെ ഡിസിആർജി/ഗ്രാറ്റുവിറ്റിക്കും അർഹതയുണ്ട്. താങ്കൾക്കും കുട്ടിക്കും തുല്യമായിട്ടാണ് ഡിസിആർജി അനുവദിക്കുക. കുട്ടി മൈനറായതുകൊണ്ട് ആ തുക രക്ഷകർത്താവിന്‍റെ പേരിൽ നൽകും. മരണമടഞ്ഞ് ഒരു വർഷത്തിനകം അപേക്ഷ സമർപ്പിക്കേണ്ടതാണ്. പുനർ വിവാഹം കഴിച്ചാൽ ആ ദിവസം മുതൽ ഫാമിലി പെൻഷൻ നിർത്തലാക്കും. എന്നാൽ മൈനറായ കുട്ടിക്കു രക്ഷിതാവ് മുഖേന ഫാമിലി പെൻഷൻ അനുവദിക്കുന്നതാണ്.