പ്രാഥമിക കത്ത് വേഗം നൽകണം : Deepika.com Tax News

Services & Questions

പ്രാഥമിക കത്ത് വേഗം നൽകണം

ഗവ. പ്രൈമറി സ്കൂൾ അധ്യാപികയായിരുന്ന എന്‍റെ ഭാര്യ പെട്ടെന്നുണ്ടായ അസുഖത്തെ തുടർന്നു മരണപ്പെട്ടു. ഞാൻ സർക്കാർ സർവീസിൽ ജോലി ചെയ്യുന്നു. ഞങ്ങളുടെ രണ്ടു കുട്ടികളിൽ മൂത്തയാൾക്ക് 13 വയസുണ്ട്. രണ്ടാമത്തെ ആൾക്ക് ഒന്പതു വയസും. ഭാര്യക്ക് ഒന്പതു വർഷത്തെ സർവീസുണ്ട്. ഫാമിലി പെൻഷൻ, സമാശ്വാസ പദ്ധതി പ്രകാരമുള്ള ജോലി എന്നിവയ്ക്കുവേണ്ടി എന്തു നടപടികളാണ് ചെയ്യേണ്ടത്. ഇപ്പോൾ പഠിച്ചുകൊണ്ടിരിക്കുന്ന കുട്ടിക്ക് 18 വയസ് പൂർത്തിയായശേഷമല്ലേ ജോലിക്കു വേണ്ടിയുള്ള അപേക്ഷ സമർപ്പിക്കാൻ സാധിക്കുകയുള്ളൂ. എന്തൊക്കെ കാര്യങ്ങളാണ് ചെയ്യേണ്ടത്?
കെ. രമേശ്, കൂത്താട്ടുകുളം

താങ്കൾക്ക് സർക്കാർ ജോലി ഉള്ളതുകൊണ്ട് ജോലി സംബന്ധിച്ച പ്രശ്നം ഉടൻ ആവശ്യമില്ലല്ലോ. എന്നാൽ മരണമടഞ്ഞ ഭാര്യയുടെ പേരിലുള്ള ഫാമിലി പെൻഷൻ ലഭിക്കുന്നതിനുവേണ്ടി മരണ സർട്ടിഫിക്കറ്റ് ഉൾപ്പെടെ ആവശ്യമുള്ള മറ്റു സർട്ടിഫിക്കറ്റുകൾ സഹിതം ഭാര്യ ജോലി ചെയ്തിരുന്ന സ്ഥാപനത്തിൽ ബന്ധപ്പെടുക. കൂടാതെ സമാശ്വാസ പദ്ധതി പ്രകാരം ജോലി ലഭിക്കണമെങ്കിൽ കുട്ടിക്കു 18 വയസ് പൂർത്തിയാകണം. എന്നിരുന്നാലും ജോലി കൊടുക്കാൻ ഉദ്ദേശിക്കുന്നത് ആർക്കാണെന്ന തീരുമാനം എടുത്തശേഷം ഈ വിവരം സൂചിപ്പിച്ചുകൊണ്ടുള്ള പ്രാഥമിക കത്ത് ഭാര്യ ജോലി ചെയ്തിരുന്ന സ്ഥാപനത്തിൽ എത്രയും വേഗം നൽകേണ്ടതാണ്.