Services & Questions
സംരക്ഷിത അധ്യാപകരുടെ പുനർവിന്യാസം ജൂലൈ 13നകം
സംസ്ഥാനത്തെ സർക്കാർ, എയ്ഡഡ് സ്കൂളുകളിലെ 2018-19 വർഷത്തെ തസ്തിക നിർണയം ജൂലൈ മൂന്നിനും തുടർന്നുള്ള അധ്യാപക ബാങ്ക് നവീകരണവും സംരക്ഷിതാധ്യാപകരുടെ പുനർവിന്യാസവും ജൂലൈ 13നും പൂർത്തിയാക്കണം.
2018-19 വർഷത്തെ ആറാം സാധ്യായ ദിനത്തിലെ കുട്ടികളുടെ എണ്ണത്തെ ആധാരമാക്കിയാണ് ഈ വർഷം തസ്തികകൾ അനുവദിക്കേണ്ടത്. ആറാം സാധ്യായ ദിനത്തിലെ കുട്ടികളുടെ എണ്ണം എന്നതുകൊണ്ട് അർഥമാക്കുന്നത് 2018-19ലെ ആറാം സാധ്യായ ദിനത്തിൽ റോളിലുള്ള കുട്ടികളുടെ യുഐഡി/ഇഐഡി സ്ട്രംഗ്ത് എന്നതാണ്. യുഐഡി/ഇഐഡി നന്പർ പിന്നീട് ലഭിച്ചതാണെങ്കിൽ പോലും ആറാം സാധ്യായ ദിനത്തിൽ കുട്ടി റോളിലുണ്ടായിരുന്നാൽ തസ്തിക നിർണയത്തിനു കണക്കിലെടുക്കാം.
ഭിന്നശേഷിയുള്ള കുട്ടികളും ഈ വർഷത്തെ പുതിയ അഡ്മിഷനും ഉൾപ്പെടെ വളരെകുറച്ചു കുട്ടികൾക്കാണ് സംസ്ഥാനത്ത് ഇനിയും യുഐഡി/ഇഐഡി നന്പർ ലഭിക്കാനുള്ളത്. ഇത്തരം കുട്ടികളുടെ നിജസ്ഥിതി സംബന്ധിച്ച് ക്ലാസ് ടീച്ചർ ഒപ്പിട്ട്, പ്രഥമാധ്യാപകൻ മേലൊപ്പ് പതിച്ച വ്യക്തമായ ഡിക്ലറേഷൻ ഉണ്ടെങ്കിൽ (കുട്ടിയുടെ പേര്, അഡ്മിഷൻ നന്പർ, ക്ലാസ്, ഡിവിഷൻ, ജനനത്തീയതി, രക്ഷിതാവിന്‍റെ പേര്, മേൽവിലാസം തുടങ്ങിയ വിവരങ്ങൾ ഡിക്ലറേഷനിൽ ഉണ്ടായിരിക്കണം) അവരെയും തസ്തിക നിർണയത്തിനു കണക്കിലെടുക്കാം. (ക്ലാസ് തല ലിസ്റ്റുകൾ പ്രഥമാധ്യാപകൻ ക്രോഡീകരിച്ചും നൽകിയിരിക്കണം).
മുസ്‌‌ലിം കലണ്ടർ പ്രകാരം പ്രവർത്തിക്കുന്ന സ്കൂളുകളിൽ ആറാം പ്രവൃത്തിദിനം ഈദുൽ ഫിത്തർ കഴിഞ്ഞ് സ്കൂൾ തുറന്നതിനുശേഷമുള്ള ആറാം പ്രവൃത്തിദിനമാണ്. ഈ തീയതിയിലെ വിദ്യാർഥികളുടെ എണ്ണമാണ് ഇത്തരം സ്കൂളുകളിലെ തസ്തിക നിർണയത്തിനു കണക്കിലെടുക്കുന്നത്.
മഴ, നിപ്പാ വൈറസ് ബാധ തുടങ്ങിയ കാരണങ്ങളാൽ ചില ജില്ലകളിൽ സ്കൂൾ തുറക്കാൻ വൈകിയതുമൂലവും പിന്നീടുവന്ന അവധികൾ മൂലവും പ്രസ്തുത സ്ഥലങ്ങളിലെ ആറാം സാധ്യായ ദിനം മറ്റുള്ള ജില്ലകളുടേതിൽനിന്നും വ്യത്യസ്തമാകും. എന്നാൽ ഈ സ്കൂളുകളുടേയും തസ്തിക നിർണയ പ്രവർത്തനങ്ങൾ ജൂലൈ മൂന്നിനു തന്നെ പൂർത്തിയാക്കണം.
ഹെഡ് ടീച്ചർ തസ്തിക
കേരള വിദ്യാഭ്യാസ ചട്ടങ്ങൾ അധ്യായം xxiii, ചട്ടങ്ങൾ ഒന്ന്(b) (iii,), 5(iv) എന്നിവ പ്രകാരം സർക്കാർ, എയ്ഡഡ് എൽപി/യുപി സ്കൂളുകളിൽ താഴെ പറയുന്ന ക്രമത്തിൽ കുട്ടികൾ ഉണ്ടെങ്കിൽ അവിടങ്ങളിലെ പ്രഥമാധ്യാപകരെ ക്ലാസ് ചുമതലയിൽനിന്ന് ഒഴിവാക്കിക്കൊണ്ട് ഒരു അധിക എൽപിഎസ്എ/യുപിഎസ്എ തസ്തിക അനുവദിക്കേണ്ടതാണ്.
എൽപി സ്കൂളുകൾ
ഒന്നു മുതൽ നാലു വരെയോ ഒന്നു മുതൽ അഞ്ചു വരെയോ ഉള്ള ക്ലാസുകളിൽ 150ൽ കൂടുതൽ കുട്ടികൾ ഉണ്ടെങ്കിൽ.
യുപി സ്കൂളുകൾ
i) അഞ്ചു മുതൽ ഏഴു വരെ ക്ലാസുകൾ ഉള്ള യുപി സ്കൂളുകൾ അഞ്ചു മുതൽ ഏഴു വരെയുള്ള ക്ലാസുകളിൽ 100ൽ കൂടുതൽ കുട്ടികൾ ഉണ്ടെങ്കിൽ
ii) ഒന്നു മുതൽ ഏഴു വരെ ക്ലാസുകൾ ഉള്ള യുപി സ്കൂളുകൾ ഒന്നു മുതൽ അഞ്ചു വരെ ക്ലാസുകളിൽ 150ൽ കൂടുതൽ കുട്ടികൾ ഉണ്ടെങ്കിൽ അല്ലെങ്കിൽ അഞ്ചു മുതൽ ഏഴു വരെ ക്ലാസുകളിൽ 100ൽ കുടുതൽ കുട്ടികൾ ഉണ്ടെങ്കിൽ.