നേത്രദാന പക്ഷാചരണം ജില്ലാതല ഉദ്ഘാടനം നടന്നു
പൂച്ചാക്കൽ: ദേശീയ അന്ധതാ നിയന്ത്രണ പരിപാടിയുടെ ഭാഗമായുള്ള നേത്രദാന പക്ഷാചരണത്തിന്റെ ജില്ലാതല ഉദ്ഘാടനം തൈക്കാട്ടുശേരിയിൽ എ.എം. ആരിഫ് എംഎൽഎ നിർവഹിച്ചു. തൈക്കാട്ടുശേരി ബ്ലോക്കുപഞ്ചായത്ത് പ്രസിഡന്റ് നിർമല ശെൽവരാജ് അധ്യക്ഷത വഹിച്ചു. നേത്രദാനം ചെയ്ത വ്യക്‌തികളുടെ കുടുംബാംഗങ്ങളെ ജില്ലാ പഞ്ചായത്ത് അംഗം പി.എം. പ്രമോദ് ആദരിച്ചു.

പൂച്ചാക്കൽ ഷാഹുൽ, ഡിഎംഒ ഡോ. ഡി. വസന്തദാസ്, ജില്ലാ ഒപ്താൽമിക് സർജൻ ഡോ. വി.എസ്. സുനിത, ദേശീയ ആരോഗ്യദൗത്യം ജില്ലാ പ്രോഗാം മാനേജർ ഡോ. പി.വി. അരുൺ, തൈക്കാട്ടുശേരി ഗ്രാമപഞ്ചായത്ത് പ്രസിഡന്റ് ശാന്തമ്മ പ്രകാശ്, മെഡിക്കൽ ഓഫിസർ ഡോ. സനീഷ് വി. സുകു, ഡോ. കെ.എ. ജോർജ്, മേഘ വേണു, കെ.ആർ. പുഷ്കരൻ, കെ. വിജയകുമാരി, ഡി. അംബിക തുടങ്ങിയവർ പ്രസംഗിച്ചു. തൈക്കാട്ടുശേരി എസ്എംഎസ്ജെ എച്ച്എസിലെ വിദ്യാർഥികളുടെയും അധ്യാപകരുടെയും നേത്രദാന സമ്മതപത്രം പ്രഥമാധ്യാപകൻ ടി. ജോയി എ.എം. ആരിഫ് എംഎൽഎയ്ക്ക് കൈമാറി. 50ഓളം സമ്മതപത്രങ്ങൾ വ്യക്‌തിപരമായും വേദിയിൽ ലഭിച്ചു. പരിപാടിയോട് അനുബന്ധിച്ച് നേത്രദാന സന്ദേശറാലിയും സൗജന്യ നേത്രപരിശോധനാ ക്യാമ്പും നടത്തി. ക്യാമ്പിൽ തിമിരരോഗം കണ്ടെത്തിയ 20 പേർക്ക് സൗജന്യ ശസ്ത്രക്രിയ നൽകുമെന്നും അധികൃതർ അറിയിച്ചു.