ചെറുതോണിയിൽ സംഘർഷം; പഞ്ചായത്തിൽ മിന്നൽ ഹർത്താൽ
Friday, August 26, 2016 10:38 AM IST
ചെറുതോണി: ചെറുതോണിയിൽ നിർമാണ നിരോധിതമേഖലയായി പ്രഖ്യാപിച്ചിരിക്കുന്ന സ്‌ഥലത്ത് സ്വകാര്യവ്യക്‌തി നിർമിച്ച കെട്ടിടം പൊളിക്കാനുള്ള റവന്യു ഉദ്യോഗസ്‌ഥരുടെ നീക്കം തടഞ്ഞതുമായി ബന്ധപ്പെട്ട് സംഘർഷാവസ്‌ഥ. റവന്യു ഉദ്യോഗസ്‌ഥരുടെ നടപടിയിൽ പ്രതിഷേധിച്ച് വാഴത്തോപ്പ് പഞ്ചായത്തിൽ 12 മണിക്കൂർ മിന്നൽ ഹർത്താൽ നടത്തി.

ഇന്നലെ രാവിലെ ആറോടെ ഇടുക്കി പോലീസിന്റെ അകമ്പടിയോടെ ഇടുക്കി തഹസീൽദാർ കെ.എൻ. തുളസീധരന്റെ നേതൃത്വത്തിലാണ് ടൗണിലെ അനധികൃത നിർമാണം പൊളിക്കാനെത്തിയത്. കെട്ടിടം പൊളിക്കാനുള്ള ഉദ്യോഗസ്‌ഥരുടെ നീക്കം മുൻകൂട്ടി അറിഞ്ഞ് വ്യാഴാഴ്ച രാത്രി എട്ടുമുതൽ ചെറുതോണി ടൗണിൽ സിപിഎം പ്രവർത്തകരും വ്യാപാരികളും കെട്ടിടം പൊളിക്കുന്നത് തടയാനായി കാവലുണ്ടായിരുന്നു. മൂന്നൂറിലധികം പേരാണ് ടൗണിൽ കാവലിനുണ്ടായിരുന്നത്.

വെളുപ്പിന് ഇടുക്കി സിഐ സിബിച്ചൻ ജോസഫിനൊപ്പം എത്തിയ റവന്യു സംഘത്തെ കാവലുണ്ടായിരുന്നവർ തടഞ്ഞു. ഏഴു പോലീസുകാരുമായിവന്ന തഹസീൽദാർ പ്രതിഷേധക്കാരോടു ചെറുത്തുനിൽക്കാനാവാതെ പോലീസ് വാഹനത്തിൽ കയറി രക്ഷപ്പെടുകയായിരുന്നു.

തഹസിൽദാരെ പാർട്ടി പ്രവർത്തകർ തടയുകയും കൈയേറ്റം ചെയ്യുകയും ചെയ്തു. ഇതേതുടർന്ന് ഇദ്ദേഹം അവധിയിൽ പ്രവേശിച്ചിരിക്കുകയാണ്.

കെട്ടിടം പൊളിക്കാനുള്ള നീക്കത്തിൽ പ്രതിഷേധിച്ച് നേതാക്കൾ പഞ്ചായത്തിൽ രാവിലെ ഹർത്താൽ പ്രഖ്യാപിച്ചു. ചെറുതോണി ബസ് സ്റ്റാൻഡിനുസമീപം നിർമാണ നിരോധിതമേഖലയിൽ സ്വകാര്യവ്യക്‌തി നേരത്തെയുണ്ടായിരുന്ന ചെറിയ കെട്ടിടം പൊളിച്ചുമാറ്റി വലിയ കെട്ടിടം നിർമിച്ചതാണ് പൊളിച്ചുനീക്കാൻ കളക്ടർ ഉത്തരവിട്ടത്. ഇതിനുമുമ്പും റവന്യു ഉദ്യോഗസ്‌ഥർ കെട്ടിടം പൊളിക്കാനെത്തിയത് ഒരു വിഭാഗമാളുകൾ തടഞ്ഞിരുന്നു. പിന്നീട് കളക്ടർ നേരിട്ടെത്തി കെട്ടിടം പൂട്ടി സീൽചെയ്തു. ഈ കെട്ടിടം പൊളിച്ചുമാറ്റാനാണ് ഇന്നലെ റവന്യു സംഘം എത്തിയത്.

മുന്നറിയിപ്പില്ലാതെ രാവിലെ ഏഴിന് പ്രഖ്യാപിച്ച ഹർത്താൽ ജനങ്ങളെയും വ്യാപാരികളെയും വിദ്യാർഥികളെയും വലച്ചു. സ്കൂൾ വാഹനങ്ങൾ പലതും ഹർത്താൽ വിവരമറിയാതെ കുട്ടികളെ കൊണ്ടുവരാൻ പുറപ്പെട്ടിരുന്നു. ഹർത്താലാണെന്നറിഞ്ഞ വിദ്യാർഥികളിൽ ചിലർ സ്കൂളിലെത്തിയില്ല. മറ്റുചിലർ വഴിയിൽ പെട്ടുപോവുകയും ചെയ്തു. ഹോട്ടൽ ഉടമകളാണ് ഏറെ വെട്ടിലായത്. ഭക്ഷണ സാധനങ്ങൾ ഒരുക്കിയ ഹോട്ടലുടമകൾ മിന്നൽ ഹർത്താൽ പ്രഖ്യാപിച്ചതോടെ ദുരിതത്തിലാവുകയായിരുന്നു. വഴിയാത്രക്കാർക്കും കടകളെല്ലാം അടഞ്ഞുകിടക്കുന്നത് ബുദ്ധിമുട്ടുണ്ടാക്കി.

റോഡിലിറങ്ങിയ വാഹനങ്ങൾ ഹർത്താലനുകൂലികൾ തടഞ്ഞു. വിദ്യാർഥികളുമായി വന്ന സ്കൂൾ ബസുകളും തടഞ്ഞെങ്കിലും പിന്നീട് വിട്ടയച്ചു. പ്രവർത്തനമാരംഭിച്ച ബാങ്കുകളും മറ്റു സ്‌ഥാപനങ്ങളും പ്രവർത്തകരെത്തി അടപ്പിച്ചു. ചെറുതോണി, പൈനാവ്, തടിയമ്പാട്, കരിമ്പൻ വാഴത്തോപ്പ് എന്നിവിടങ്ങളിൽ കടകമ്പോളങ്ങൾ അടഞ്ഞുകിടന്നു. മുന്നറിയിപ്പില്ലാതുള്ള ഹർത്താൽ പ്രഖ്യാപനത്തിൽ നല്ലൊരുശതമാനം വ്യാപാരികൾക്കും പ്രതിഷേധമുണ്ട്.

ഇതിനിടെ നേതാക്കൾ ഇടുക്കി ഗസ്റ്റ് ഹൗസിലുണ്ടായിരുന്ന മന്ത്രി കടന്നപ്പള്ളി രാമചന്ദ്രനെ കണ്ട് ചർച്ചനടത്തി. മന്ത്രി മുഖ്യമന്ത്രിയുമായി ഫോണിൽ സംസാരിച്ച് പ്രശ്നം ബോധ്യപ്പെടുത്തി. മന്ത്രിസഭായോഗത്തിൽ തീരുമാനമെടുക്കാമെന്ന് മുഖ്യമന്ത്രി അറിയിച്ചതായി കടന്നപ്പള്ളി നേതാക്കളെ അറിയിച്ചു. മന്ത്രിസഭാ തീരുമാനമുണ്ടാകുംവരെ കെട്ടിടം പൊളിക്കുന്നത് നിർത്തിവയ്ക്കാനും മന്ത്രി കളക്ടർക്ക് നിർദേശം നൽകി.