വേലന്താവളത്തേക്ക് ബസ് സർവീസ് ആരംഭിക്കണം
Friday, August 26, 2016 10:39 AM IST
മുതലമട: കാമ്പ്രത്ത്ചള്ളയിൽനിന്നും വിളയോടി, നാട്ടുകൽ വഴി വേലന്താവളത്തേക്ക് ബസ് സർവീസ് ആരംഭിക്കണമെന്ന് മുതലമട ബസ് പാസഞ്ചേഴ്സ് അസോസിയേഷൻ ആവശ്യപ്പെട്ടു. നിലവിൽ മീങ്കര, ആട്ടയാമ്പതി, വലിയച്ചള്ള, പാപ്പാൻചള്ള, ചുള്ളിയാർമേട്, കാമ്പ്രത്ത് ചള്ള എന്നിവിടങ്ങളിലുള്ള യാത്രക്കാർ കൊല്ലങ്കോട്, ചിറ്റൂർ വഴി പതിനഞ്ചു കിലോമീറ്റർ അധികദൂരം സഞ്ചരിച്ചാണ് വേലന്താവളത്തേക്ക് എത്തുന്നത്.

അധികദൂരം സഞ്ചരിക്കുന്നതിനു പുറമേ അധികചാർജും കൂടുതൽ സമയവും വേണ്ടിവരും. കാമ്പ്രത്തുചള്ളയിൽനിന്നും പള്ളം, വിളയോടി വഴി വേലന്താവളത്തേക്ക് റോഡുണ്ട്. മുതലമടയിൽ കൂടുതലായും നിർധന കുടുംബങ്ങളാണ് താമസിക്കുന്നത്.

ഇവർക്ക് വേലാന്തവളം ഭാഗത്തേക്ക് എത്തുന്നതിന് സാമ്പത്തിക ചെലവ് ഏറെയാണ്. ഈ സാഹചര്യത്തിൽ കാമ്പ്രത്തുചള്ളയിൽനിന്നും ദൂരക്കുറവുള്ള ഇതുവഴി വേലന്താവളത്തേക്ക് എത്തിയാൽ അവിടെനിന്നും തമിഴ്നാട് ബസ് വഴി കോയമ്പത്തൂരിലേക്കു ചുരുങ്ങിയ നിരക്കിൽ എത്താനാകും.

ഇതു കൂടാതെ മുതലമടയിൽ ഉത്പാദിപ്പിക്കുന്ന പച്ചക്കറികൾ വേലന്താവളം പച്ചക്കറി ചന്തയിലെത്തിക്കാനും പുതിയ റൂട്ട് സഹായമാകുമെന്നാണ് യാത്രക്കാരുടെ വിലയിരുത്തൽ. പുതിയ ബസ് റൂട്ട് ആരംഭിക്കണമെന്നാവശ്യപ്പെട്ട് ആർടിഒ അധികൃതർക്ക് നിവേദനം നല്കാൻ ജനങ്ങളിൽനിന്നും ഒപ്പുശേഖരണം തുടങ്ങി.