വിത്തുകളുടെ ഗുണമേന്മ ഉറപ്പു വരുത്തണമെന്ന് കൃഷിമന്ത്രി
പാലക്കാട്: വെജിറ്റബിൾ ആൻഡ് ഫ്രൂട്ട് പ്രമോഷൻ കൗൺസിൽ (വിഎഫ്പിസികെ) പരമാവധി വിത്തുൽപ്പാദനം നടത്തണമെന്നും ഉത്പാദിപ്പിക്കുന്ന വിത്തിന്റെ ഗുണമേന്മ ഉറപ്പു വരുത്തണമെന്നും കാർഷിക വികസന കർഷക ക്ഷേമ വകുപ്പ് മന്ത്രി വി.എസ് സുനിൽ കുമാർ. ജില്ലയിലെ ആലത്തൂർ മോഡേൺ റൈസ് മില്ലും വിഎഫ്പിസികെ വിത്തുൽപ്പാദന കേന്ദ്രവും ഫാമുകളും സന്ദർശിച്ചതിനു ശേഷം സംസാരിക്കുകയായിരുന്നു മന്ത്രി. വിത്തുകളുടെ പാക്കിംഗും ലേബലിംഗും കൃത്യതയോടെ ചെയ്തിരിക്കണം. കൂടാതെ ആദിവാസി മേഖലകളിൽ നിന്നുളള പരമ്പരാഗത വിത്തുകളുടെ ഉത്പാദനവും, റാഗി, ചോളം, ഉഴുന്ന്, ചെറുപയർ, മുതിര തുടങ്ങിയവയും മാവ് പോലുളള വിവിധ ഫലവൃക്ഷങ്ങളുടെ വിത്തുൽപ്പാദനവും ഊർജ്‌ജിതമാക്കണമെന്ന് മന്ത്രി കർഷകരുമായി നടത്തിയ ചർച്ചയിൽ നിർദ്ദേശം നൽകി.

പ്രവർത്തരഹിതമായി നിലകൊള്ളുന്ന മോഡേൺ റൈസ് മിൽ ഒരു വർഷത്തിനകം പ്രവർത്തനക്ഷമമാക്കുമെന്ന് മന്ത്രി അറിയിച്ചു. പാലക്കാട് ജില്ലയിലെ കർഷകർക്ക് ഇത് പ്രയോജനകരമായിരിക്കും. ഇതുപോലെ പ്രവർത്തനം നിലച്ചു കിടക്കുന്ന കൃഷിയുമായി ബന്ധപ്പെട്ട എല്ലാ സ്‌ഥാപനങ്ങളും കർഷകർക്ക് പ്രയോജനപ്പെടും വിധം പ്രവർത്തിപ്പിക്കാൻ സർക്കാർ പ്രതിജ്‌ഞാബദ്ധമാണെും അദ്ദേഹം കൂട്ടിച്ചേർത്തു. കാർഷിക വികസന കർഷക ക്ഷേമ വകുപ്പ് ഉദ്യോസ്‌ഥരും വി.എഫ്.പി.സി. കെ ജീവനക്കാരും വെയർ ഹൗസിംഗ് കോർപ്പറേഷൻ ഉദ്യോഗസ്‌ഥരും മന്ത്രിയെ അനുഗമിച്ചു.