രക്ഷിതാക്കളെ ട്രാഫിക് നിയമങ്ങൾ ബോധവത്കരിക്കാൻ കുട്ടികൾ രംഗത്തിറങ്ങണം: റൂറൽ എസ്പി
Friday, August 26, 2016 11:14 AM IST
കൊട്ടാരക്കര: രക്ഷിതാക്കളെ ട്രാഫിക് നിയമങ്ങൾ ബോധവത്കരിക്കാൻ കുട്ടികൾ രംഗത്തിറങ്ങണമെന്ന് റൂറൽ എസ്പി അജിതാബേഗം പറഞ്ഞു. റൂറൽ പോലീസിന്റെ ട്രാഫിക് ബോധവത്കരണ മാസാചരണം ശുഭയാത്ര 2016 ന്റെ സമാപന സമ്മേളനത്തിൽ പ്രസംഗിക്കുകയായിരുന്നു അവർ. വീട്ടിൽ നിന്നും ഇറങ്ങുമ്പോഴും ഹെൽമറ്റ്, സീറ്റ് ബെൽറ്റ് എന്നിവ ധരിക്കുന്നകാര്യം കുട്ടികൾക്ക് ഓർമപെടുത്താൻ കഴിയും. തങ്ങളെ കാത്ത് വീട്ടിൽ ആളുകൾ കാത്തിരിക്കുന്നുണ്ടന്ന് സന്ദേശം പകർന്ന് നൽകിയാൽ ട്രാഫിക് ചട്ടങ്ങൾ പാലിക്കാൻ ആളുകൾ തയാറാകും.

ഇൻഡ്യയിൽ നടക്കുന്ന വാഹനാപകടങ്ങളിൽ കുട്ടികൾ മരണപെടുന്നത് നമ്മുടെ വാഹനങ്ങളിൽ കുട്ടിസീറ്റുകളില്ലാത്തതാണ് പ്രധാനകാരണം. ജില്ലാ പോലീസ് നടപ്പിലാക്കിയ പദ്ധതി പൊതുസമൂഹം ഏറ്റെടുത്തത് ശുഭ പ്രതീക്ഷയാണ് നൽകുന്നതെന്നും അവർ പറഞ്ഞു.

നിയമങ്ങൾ പാലിക്കാൻ സമൂഹം തയാറായാൽ ഒരു പരിധിവരെ അപകടങ്ങളെ നിയന്ത്രിക്കാൻ കഴിയുമെന്ന് എംഎൽഎ സമ്മേളനം ഉദ്ഘാടനം ചെയ്തുകൊണ്ട് പറഞ്ഞു. മികച്ച ഡ്രൈവർമാർ, മികച്ച റാലി നടത്തിയ സ്കൂളുകൾ, മികച്ച പെയിന്റിംഗ്, എക്സിബിഷൻ എന്നിവക്ക് സമ്മാനങ്ങൾ വിതരണം ചെയ്തു.

നഗരസഭവൈസ്ചെയർമാൻ ഗീതാസുധാകരൻ അധ്യക്ഷയായിരുന്നു. കൊല്ലം ആർറ്റിഒ തുളസീധരൻപിള്ള, ഡിവൈഎസ്പിമാരായ ബി.കൃഷ്ണകുമാർ, ഷാനവാസ്,അബ്ദുൾ റാഷി, ഡിഇഒ ശ്യാമള, കൗൺസിലർ സുസൻ ചാക്കോ, വനിതാ സിഐ അനിതകുമാരി എന്നിവർ പ്രസംഗിച്ചു. ഇതോടൊപ്പം മാജിക് പ്രദർശനം, വാഹനാപകടങ്ങളെകുറിച്ചുള്ള പെയിന്റിംഗ്, വീഡിയോ പ്രദർശനം എന്നിവയും നടന്നു.