എഴുപത് ലക്ഷത്തിന്റെ പുകയില ഉല്പന്നങ്ങളുമായി അന്യസംസ്‌ഥാനക്കാരായ രണ്ടു പേർ പിടിയിൽ
Friday, August 26, 2016 11:14 AM IST
കൊല്ലം: ഓണത്തിന് മുന്നോടിയായുള്ള സ്പെഷൽ ഡ്രൈവിന്റെ ഭാഗമായി കൊല്ലം എക്സൈസ് സർക്കിൾ നടത്തിയ റെയ്ഡിൽ കൊല്ലം മൂന്നാംകുറ്റി അറുനൂറ്റിമംഗലം ആറാട്ടുകുളത്തിന് സമീപത്തുനിന്നും 750 കിലോയോളം വരുന്ന ലഹരി ഉല്പന്നങ്ങൾ പിടികൂടി.

ശംഭു, പാൻപരാഗ്, എന്നിവ കൂടാതെ കുട്ടികളെ ആകർഷിക്കുന്ന മധുരം കൂട്ടിയ വീര്യമാർന്ന ലഹരിയും പിടികൂടി. ബംഗാൾ സ്വദേശി മുഹമ്മദ് ഇസ്തഹർ(19), ബീഹാർ സ്വദേശി കമൽ(20) എന്നിവരെ അറസ്റ്റു ചെയ്യുകയും ചെയ്തു. മൂന്നാം കുറ്റിയിൽ അറുന്നൂറ്റിമംഗലം ഷെമീർ മൻസിലിൽ അക്രമുദീന്റെ വീട്ടിലെ കിടപ്പുമുറിയിൽ ടൈൽസ് ഇളക്കി വലിയ അറകളുണ്ടാക്കിയാണ് ലക്ഷക്കണക്കിന് രൂപയുടെ പുകയില ഉല്പന്നങ്ങൾ സൂക്ഷിച്ചിരുന്നത്.

ഇതിന് വിപണിയിൽ 70 ലക്ഷം രൂപ വിലവരും. ജില്ലയിലെ പ്രധാന പാൻമസാല വിതരണക്കാരാണ് അക്രമുദീനും പിടിയിലായ രണ്ട് സഹായികളും. ജില്ലയിലുടനീളം പ്രത്യേക ഏജന്റുമാരെ വച്ച് ദിവസവും 5000 ൽ അധികം പാക്കറ്റ് പാൻമസാല ഉല്പന്നങ്ങൾ ജില്ലയുടെ വിവിധ ഭാഗങ്ങളിലേക്ക് ഇവിടെ നിന്നാണ് എത്തിക്കുന്നതെന്ന് എക്സൈസ് പറഞ്ഞു. അക്രമുദ്ദീനെപ്പറ്റി എക്സൈസ് അന്വേഷണം ആരംഭിച്ചു. വാടക വീട്ടിൽ കഴിഞ്ഞിരുന്ന ഇയാൾ ഇപ്പോൾ ലക്ഷക്കണക്കിന് രൂപ വിലവരുന്ന വീടും വസ്തുവും ആഡംബര കാറുകളും പാൻമസാല വിൽപനയിലൂടെ സ്വന്തമാക്കിയതായും എക്സൈസ് പറഞ്ഞു.റെയ്ഡിൽ എക്സൈസ് സിഐ വി.രാജേഷിനൊപ്പം ഇൻസ്പെക്ടർമാരായ ജെ. പി. ആൻഡ്രൂസ്, അസി. എക്സൈസ് ഇൻസ്പെക്ടർമാരായ ബാലചന്ദ്രകുമാർ, ഫ്രാൻസിസ് ബോസ്കോ, സിവിൽ എക്സൈസ് ഓഫീസർമാരായ സുരേഷ് ബാബു, ബിജുമോൻ, സതീഷ് ചന്ദ്രൻ, രാജു, മിനേഷ്യസ്, ദിലീപ് എന്നിവർ പങ്കെടുത്തു.