ദേശീയ ജലപാത വികസനം: സംരക്ഷണ ഭിത്തി നിർമിക്കാതെയുളള ഖനനം ഭീഷണിയാകുന്നു
ചവറ: ദേശീയ ജലപാത വികസനവുമായി ബന്ധപ്പെട്ട് സംരക്ഷണ ഭിത്തി കെട്ടാതെ ഖനനം നടത്തുന്നത് ചവറ പഞ്ചായത്തിലെ പതിനേഴാം വാർഡിലെ ജനങ്ങൾക്ക് ഭീഷണിയാകുന്നതായി ആരോപണം.

മുക്കുത്തോട് സ്കൂളിന് തെക്ക് ഭാഗം മുതൽ പളളിയാടി ക്ഷേത്രത്തിന് തെക്ക് ഭാഗത്തെ പഴയ വിളക്ക് മരം വരെയുളള കായൽ തീരത്തിന് സമീപത്ത് താമസിക്കുന്നവർക്കാണ് അപകട ഭീഷണി നിലനിൽക്കുന്നത്. ഇവരുടെ വീടും വസ്തുവും ഓരോ ദിവസം കഴിയുന്തോറും വെളളം കയറി ഇടിഞ്ഞ് പൊളിഞ്ഞ് കൊണ്ടിരിക്കുകയാണ്.

നാല് മീറ്റർ മുതൽ ആറ് മീറ്റർ വരെ വീതിയിലാണ് പല ഭാഗത്തും കര ഇടിഞ്ഞ് കായൽ കയറിയിരിക്കുന്നത്. പല വീടുകളിലെയും വൻ വൃക്ഷങ്ങൾ പോലും സംരക്ഷണ ഭിത്തി കെട്ടാതെയുളള ഖനനം കാരണം വീടുകളിലേക്ക് ചാഞ്ഞ് നിൽക്കുന്നതും നാട്ടുകാർ ഭീതിയോടെയാണ് കാണുന്നത്.

ജലപാതയ്ക്ക് കിഴക്ക് ഭാഗത്തുളള വീടുകളാണ് ഏത് നിമിഷവും തകർന്ന് വീഴാറായ അവസ്‌ഥയിൽ നിൽക്കുന്നത്. വികസനത്തിനു വേണ്ടി ഒന്നാംഘട്ട ജലപാതയുടെ ഖനനം കഴിഞ്ഞപ്പോൾ മീറ്ററുകളോളം അകലത്തായിരുന്ന കായൽ ഇപ്പോ ൾ വീടുകളം വിഴുങ്ങിക്കൊണ്ടിരിക്കുകയാണ്.

ഇത് വക വയ്ക്കാതെയാണ് രണ്ടാം ഘട്ട ഖനനവുമായി മുന്നോട്ട് പോകാൻ അധികൃതർ പോകുന്നത്. സമീപത്തെ കുട്ടികൾ സംരക്ഷണ ഭിത്തി ഇല്ലാത്ത ആഴത്തിലുളള ഭാഗത്തേക്ക് പോകുന്നതും രക്ഷകർത്താക്കൾ ഭീതിയോടെയാണ് കാണുന്നത്. സമീപത്തെ ക്ഷേത്രത്തിന്റെ ആൽത്തറ, വഞ്ചി എന്നിവ ഇതിനോടകം കായൽ കവർന്നു കഴിഞ്ഞു. മിക്ക വീട്ടുകാരുടെയും ഏഴ് സെന്റ് വസ്തുവരെ കായൽ കയറിയിരിക്കുകയാണ്.

തങ്ങളുടെ ജീവന് ഭീഷണിയാകുന്ന തരത്തിൽ സംരക്ഷണ ഭിത്തി കെട്ടാതെ ഖനനം നടത്തരുതെന്നാവശ്യപ്പെട്ട് ഈ പ്രദേശത്തെ നാട്ടുകാർ ജലപാത വികസനം നടത്തുന്ന ഇൻലാന്റ് വാട്ടർവേയ്സ് അതോറിറ്റി ഓഫ് ഇന്ത്യയുടെ ഡയറക്ടർ, എംപി, എംഎൽഎ എന്നിവർക്ക് പരാതി നൽകിയിട്ടുണ്ട്. എന്നാൽ ഇതുവരെയും ഒരു നടപടിയും ഉണ്ടായിട്ടില്ലെന്ന് നാട്ടുകാർ പറയുന്നത്. ജീവനും സ്വത്തിനും സംരക്ഷണം കിട്ടിയില്ലെങ്കിൽ ശക്‌തമായ സമര പരിപാടികളുമായി മുന്നോട്ട് പോകാനാണ് ദേശീയ ജലപാത വികസനത്തിന്റെ പേരിൽ ദുരിതമനുഭവിക്കുന്നവരുടെ തീരുമാനം.