പ്രതീക്ഷയിലായിരുന്നു മാഞ്ഞാലി തോട്
Friday, August 26, 2016 1:17 PM IST
അങ്കമാലി: അങ്ങാടിക്കടവിൽനിന്നു മാഞ്ഞാലി തോട് വഴി മുസിരിസി (കൊടുങ്ങല്ലൂർ) ലേക്കു പണ്ടുകാലത്തു ചങ്ങാടങ്ങൾ വഴി കാർഷികവിളകളും വാണിജ്യസാധനങ്ങളും കൊണ്ടുപോയിരുന്നു. സമീപസ്‌ഥലങ്ങളിലേക്കും ഉത്പന്നങ്ങൾ കൊണ്ടുപോകുന്നതിനുള്ള പ്രധാനമാർഗം മാഞ്ഞാലി തോടായിരുന്നു. ഈ ജലപാത പിന്നീടു ചെളി അടിഞ്ഞും കാടുംചണ്ടിയും നിറഞ്ഞും നാശോന്മുഖമായി. മറ്റു ഗതാഗതമാർഗങ്ങൾ വന്നതോടെ ജലഗതാഗതം ആർക്കും വേണ്ടാതായി.

മാഞ്ഞാലി തോട് നന്നാക്കി ഉൾനാടൻ ജലഗതാഗതം പുനസ്‌ഥാപിക്കുകയും അതുവഴി ടൂറിസം വികസനം സാധ്യമാക്കുകയും എന്ന ലക്ഷ്യത്തോടെയായിരുന്നു ഏഴുവർഷം മുമ്പു മാഞ്ഞാലി തോട് വികസനപദ്ധതി വിഭാവനം ചെയ്തത്. ജലസേചനവും പദ്ധതിയിലുണ്ടായിരുന്നു. നല്ലൊരു പദ്ധതിയായി ഇതു വാഴ്ത്തപ്പെട്ടു. എന്നാൽ മറ്റു സർക്കാർ പദ്ധതികളെപോലെ ദീർഘവീക്ഷണമില്ലായ്മയും കെടുകാര്യസ്‌ഥതയും ഇതിനേയും അവതാളത്തിലാക്കി.

മൂന്നുതോട് മുതൽ മാഞ്ഞാലി പുഴ വരെ 19 കിലോമീറ്റർ ദൂരത്തിൽ തോട്ടിലെ ചെളിനീക്കി ആഴം കൂട്ടിയാണു തോട് വികസനം നടത്താനിരുന്നത്. തോട്ടിലൂടെ ബോട്ട് സർവീസ് ആരംഭിക്കുന്നതിനൊപ്പം ഇരുകരകളിലും ബണ്ട് നിർമിച്ചു വാഹനഗതാഗതം സാധ്യമാക്കാനും പദ്ധതിയുണ്ടായിരുന്നു. വെള്ളക്കെട്ട് മൂലം ബുദ്ധിമുട്ടുന്ന പ്രദേശങ്ങളിലെ വെള്ളം തോട്ടിലേക്ക് ഒഴുക്കിവിടാമെന്നും ജലദൗർലഭ്യം നേരിടുന്ന പ്രദേശങ്ങളിലേക്കു തോട്ടിൽനിന്നു വെള്ളം കൊണ്ടുപോകാമെന്നും കണക്കുകൂട്ടിയിരുന്നു.

പദ്ധതി യാഥാർഥ്യമായാൽ തോടിന്റെ ഇരുഭാഗത്തുമുള്ള പ്രദേശങ്ങളിൽ കൃഷി വിപുലീകരിക്കുന്നതിനും സഹായകരമാകുമായിരുന്നു. അങ്കമാലി നഗരസഭയ്ക്കു പുറമെ കറുകുറ്റി, പാറക്കടവ്, നെടുമ്പാശേരി, ചെങ്ങമനാട്, കുന്നുകര, പുത്തൻവേലിക്കര പഞ്ചായത്തുകൾക്കും ഗുണം ലഭിക്കുമായിരുന്നു.

വടക്കേക്കര എംഎൽഎ ആയിരുന്ന എം.എ. ചന്ദ്രശേഖരന്റെ നേതൃത്വത്തിലാണു പദ്ധതി തയാറാക്കിയത്. ഘട്ടംഘട്ടമായി നടപ്പാക്കാനായിരുന്നു പരിപാടി. എന്നാൽ ആദ്യഘട്ടത്തിനപ്പുറം പദ്ധതി മുന്നോട്ടു നീങ്ങിയില്ല. നിലവിൽ മുടക്കിയ തുക പാഴായ അവസ്‌ഥയിലാണ്. പദ്ധതിയെ പിന്നോട്ടടിക്കുന്നതിൽ രാഷ്ര്‌ടീയതാത്പര്യങ്ങളും കാരണമായി.

നിർമാണം എവിടെനിന്ന് ആരംഭിക്കണമെന്ന കാര്യത്തിൽ തർക്കമുണ്ടായി. നീരൊഴുക്ക് അവസാനിക്കുന്ന മാഞ്ഞാലിയിൽനിന്ന് ആരംഭിക്കണമെന്ന വാദത്തെ തള്ളി അങ്കമാലിയിലെ മൂന്നുതോട്ടിൽ നിന്നായിരുന്നു ആരംഭം. മൂന്നുതോടിൽനിന്നു പൂതംതുരുത്ത് വരെയുളള നാലരകിലോമീറ്റർ ദൂരത്തിലെ പ്രവൃത്തികൾക്കായി അഞ്ചു കോടി മുടക്കി.ഈഭാഗത്തു തോട്ടിലെ ചെളി വാരി ആഴം കൂട്ടി ഇരുകരകളിലും ബണ്ട് നിർമിച്ചു. കേരള ലാൻഡ് ഡവലപ്പ്മെൻറ് ബോർഡിനു കീഴിലായിരുന്നു നിർമാണം. രണ്ടാംഘട്ടത്തിനു പണം അനുവദിപ്പിക്കാൻ ആറു വർഷത്തോളം കാത്തിരിക്കേണ്ടി വന്നു. പൂതാംതുരുത്ത് മുതൽ മധുരപ്പുറം പാലം വരെയുള്ള രണ്ടാഘട്ട ജോലികൾക്ക് 8.5 കോടി രൂപയാണു കണക്കുകൂട്ടിയിരുന്നത്. എന്നാൽ യഥാസമയം കാര്യങ്ങൾ നടക്കാതെ വന്നതോടെ 14 കോടിയാക്കി പുതുക്കേണ്ടിവന്നു. നിർമാണ ചുമതല ഇറിഗേഷൻ വകുപ്പിനു മാറ്റി നൽകി.

രണ്ടാംഘട്ട പണി ഈവിധം നീളുമ്പോൾ ആദ്യഘട്ട പ്രവൃത്തികൾ തകർന്നുകൊണ്ടിരിക്കുന്ന കാഴ്ചയാണു കാണുന്നത്. ബണ്ട് പലഭാഗത്തും തകർന്നിരിക്കുന്നു. ബണ്ടിനടിയിൽ പൈപ്പുകൾ സ്‌ഥാപിച്ചതിലെ അശാസ്ത്രീയത മൂലം പാടശേഖരങ്ങളിലെ കൃഷിക്കു വെള്ളം ലഭിക്കുന്നില്ല. മണ്ണും ചെളിയും വീണു തോട് നികന്നു നീരൊഴുക്ക് തടസപ്പെടുന്ന സ്‌ഥിതിയുമുണ്ട്.

ലക്ഷ്യം കാണാത്ത സർക്കാർ പദ്ധതികളുടെ കൂട്ടത്തിലേക്കു മാഞ്ഞാലി തോട് വികസനപദ്ധതിയും എത്തിയിരിക്കുന്നു. ശ്രമിച്ചാൽ ഇനിയായാലും ഈ പദ്ധതിയെ രക്ഷപ്പെടുത്താം. ശ്രമിക്കേണ്ടവർ ആത്മാർഥതയോടെ ശ്രമിക്കണമെന്നു മാത്രം.