ഉണ്യാലിലെ സംഘർഷം: പോലീസ് സാന്നിധ്യം സിസിടിവിയിൽ
Friday, August 26, 2016 1:17 PM IST
തിരൂർ: ഉണ്യാലിൽ വീടുകൾക്കു നേരെയുണ്ടായ അക്രമം നടക്കുമ്പോൾ പോലീസ് സ്‌ഥലത്തുണ്ടായിരുന്നുവെന്ന് തെളിയിക്കുന്ന സിസിടിവി ദൃശ്യംപുറത്ത്.

21ന് വൈകുന്നേരമായിരുന്നു ഉണ്യാലിൽ അക്രമം നടന്നത്. ആറര മുതൽ സംഘർഷം നടക്കുമ്പോൾ പോലീസ് ഉദ്യോഗസ്‌ഥർ സ്‌ഥലത്തില്ലെന്നായിരുന്നു അറിയിച്ചിരുന്നത്. എന്നാൽ 6.34ന് ശേഷം പോലീസ് വാഹനം സംഘർഷ സ്‌ഥലത്ത് കൂടി പോകുന്നതിന്റെ ദൃശ്യമാണ് പുറത്തായിട്ടുള്ളത്. അക്രമം അരങ്ങേറുമ്പോൾ ഉണ്യാൽ അങ്ങാടിയിൽ നിന്നു സംഘർഷ പ്രദേശത്തേക്ക് പോലീസ് വാഹനം വരുന്നതായി ദൃശ്യങ്ങളിലുണ്ട്. ഉണ്യാൽ പുത്തൻപുരയിൽ ഉസ്മാന്റെ വീട്ടിൽ സ്‌ഥാപിച്ച സിസിടിവി ദൃശ്യങ്ങളിലാണ് പോലീസ് സംഭവ സ്‌ഥലത്തേക്ക് വരുന്നതിന്റെ ദൃശ്യങ്ങളുള്ളത്. വൈകുന്നേരം 6.35ഓടെ ഒരു പോലീസ് വാഹനം ഉണ്യാലിലേക്ക് വരുന്നുണ്ട്. തുടർന്നു അഞ്ചു മിനിറ്റോളം പ്രദേശത്ത് ചെലവഴിച്ച ശേഷം 6.41ഓടെ മടങ്ങുന്നതും കാമറയിൽ പതിഞ്ഞിട്ടുണ്ട്.

അക്രമികൾ സംഘം ചേർന്നു പോകുന്നതും ബൈക്കിലെത്തുന്ന സ്ത്രീകളടങ്ങുന്നവരെ തിരിച്ചയയ്ക്കുന്നതും ദൃശ്യങ്ങളിലുണ്ട്. നേരത്തെ പോലീസ് പറഞ്ഞതിനു വിപരീതമായാണ് ദൃശ്യം. 1.9മിനുട്ട് ദൈർഘ്യമുള്ള വീഡിയോ സോഷ്യൽ മീഡിയയിലും വൈറലായിട്ടുണ്ട്.