പുതിയറ–സ്റ്റേഡിയം റോഡ് നവീകരണം ആരംഭിച്ചു
കോഴിക്കോട്: യാത്രാക്ലേശം രൂക്ഷമായ നഗരത്തിലെ പ്രധാന പാതയിലൊന്നായ പുതിയറ–സ്റ്റേഡിയം റോഡിന്റെ നവീകരണം ആരംഭിച്ചു. സിറ്റി റോഡ് ഇംപ്രൂവ്മെന്റ് പദ്ധതിയിൽ ഉൾപ്പെടുത്തിയാണ് നവീകരണം നത്തുന്നത്. ഏറെ കാലമായി തകർന്ന് കിടന്നിരുന്ന റോഡിന്റെ നവീകരണം വാട്ടർ അഥോറിറ്റിയുടെ അറ്റകുറ്റപ്പണികൾ കാരണമാണ് നീണ്ടുപോയത്. ഭാഗികമായി ഗതാഗത നിയന്ത്രണം ഏർപ്പെടുത്തി പ്രവൃത്തി പൂർത്തിയാക്കാനാണ് ലക്ഷ്യമിടുന്നത്. 0.644 കിലോമീറ്റർ ദൂരമുള്ള റോഡിന് 8.47 കോടി രൂപയാണ് ചെലവ്. ഊരാളുങ്കൽ ലേബർ കോൺട്രാക്ട് കോ– ഓപ്പറേറ്റീവ് സൊസൈറ്റിയുടെ നേതൃത്വത്തിലാണ് റോഡ് നിർമാണം നടത്തുന്നത്.

200കോടി രൂപ ചെലവിൽ നഗരത്തിലെ ആറു റോഡുകളാണു പദ്ധതിയുടെ കീഴിൽ നവീകരിക്കുന്നത്. റോഡ് നിർമ്മാണത്തിനൊപ്പം റോഡിന്റെ ഇരുവശങ്ങളിലും നടപ്പാതക്കൊപ്പം സൗന്ദര്യവത്കരണവും നടത്താനാണു ക്രിപിന്റെ ലക്ഷ്യം. എല്ലാ ജംഗ്ഷനുകളിലും ട്രാഫിക് സിഗ്നൽ സൗകര്യവും ഏർപ്പെടുത്തും. കോവൂർ– വെള്ളിമാട്കുന്ന് റോഡ്(2.735 കിലോമീമീറ്റർ), കാരപ്പറമ്പ്–അരയിടത്തുപാലം–കല്ലുത്താൻകടവ് റോഡ് (4.526 കിലോമീറ്റർ), പാലാട്ടുത്താഴം–സിഡബ്ല്യുആർഡിഎം (8.45 കിലോമീറ്റർ), മാങ്കാവ്– പുഷ്പ ജംക്ഷൻ (2.452 കിലോമീറ്റർ), ഗാന്ധി റോഡ്– മിനി ബൈപ്പാസ് (3.435 കിലോമീറ്റർ) ഉൾപ്പെടെ 22 കിലോമീറ്റർ റോഡാണ് പദ്ധതിയിൽ ഉൾപ്പെടുത്തിയിരിക്കുന്നത്.