കേൾക്കാതെ പറഞ്ഞ് കുടുംബം; കണ്ടറിഞ്ഞ് പോരാടാൻ അഭിരാമി
Friday, August 26, 2016 1:18 PM IST
കോഴിക്കോട്: ദേശീയ മേളയിൽ സാന്നിധ്യമുറപ്പിച്ച്് ഇത്തവണയും അഭിരാമി എത്തി. കൂടെ അഛനും, അമ്മയും, ചേച്ചിയുമുണ്ട്്. അഭിരാമിയെപൊലെ അവർക്കും കേൾവിശക്‌തിയില്ല, സംസാരിക്കാനുമാവില്ല. ഏറെ പ്രതീക്ഷയോടെയാണ് ഇത്തവണയും തിരുവനന്തപുരം ജഗതി ഗവ. വി.എച്ച്.എസ്.എസിലെ പ്ളസ്ടു വിദ്യാർഥിനി അഭിരാമി കൃഷ്ണ ബധിര വിദ്യാർഥികളുടെ സംസ്‌ഥാന കായിക മേളയിൽ പങ്കെടുക്കുന്നത്.

കഴിഞ്ഞ തവണ മലപ്പുറത്തു നടന്ന 16വയസിന് മുകളിലുള്ള വിഭാഗത്തിൽ പെൺകുട്ടികളുടെ 100 മീറ്റർ ഓട്ടത്തിലും ലോംഗ്ജംപിലും ഒന്നാം സ്‌ഥാനവും 200 മീറ്ററിൽ രണ്ടാം സ്‌ഥാനത്തും കൊയ്യാൻ അഭിരാമിക്കായി. ഇത്തവണ 200 മീറ്റർ ഓട്ടത്തിലും ലോംഗ്ജംപിലും 100 മീറ്ററിലും അവൾ പങ്കെടുക്കുന്നുണ്ട്. അച്ഛൻ മിലിട്ടറി ഉദ്യോഗസ്‌ഥനായ പൂജപ്പുര മുരുകവിലാസത്തിൽ വി.എസ്്. ഉണ്ണികൃഷ്ണന്റെ പിന്തുണയും പരിശീലനവുമാണ് അഭിരാമിയുടെ കരുത്തും വിജയത്തിനു പിന്നിലെ രഹസ്യവുമെന്ന് പറയാനാവാതെ പറഞ്ഞു മനസിലാക്കിതരുന്നു നരുന്തുപോലുള്ള ആ പെൺകൊടി.

1989 ൽ ന്യൂസിലൻഡിൽ നടന്ന ബധിര ഒളിപിംക്സിൽ 400 മീറ്റർ, 110 മീറ്റർ ഹർഡിൽസിൽ ആറാം സ്‌ഥാനത്തത്തൊൻ അച്ഛൻ ഉണ്ണികൃഷ്ണനു കഴിഞ്ഞെന്ന് ആംഗ്യഭാഷയിൽ പറയുമ്പോൾ അഭിരാമിയുടെ കണ്ണുകളിൽ തിളക്കം. അഛനും, അമ്മ സുഷമയും ചേച്ചി ആതിരയും കൂടെയുള്ളപ്പോൾ ഇക്കുറിയും മെഡൽ വേട്ട നടത്തുമെന്ന നിശ്ചയദാർഢ്യത്തിൽ ആംഗ്യഭാഷ തുടർന്നു. തുടർച്ചയായ നാലാം തവണയാണ് അഭിരാമി സംസ്‌ഥാന കായിക മേളിയിൽ പങ്കെടുക്കുന്നത്. കഴിഞ്ഞവർഷം തായ് വാനിൽ നടന്ന ഏഷ്യ പെസഫിക് ബധിര കായിക മേളയിൽ ലോംഗ് ജംപിൽ നാലാം സ്‌ഥാനവും 100 മീറ്ററിൽ ആറാം സ്‌ഥാനവും നേടിയിരുന്നു. ഇനി 2017 ജൂലൈയിൽ തുർക്കിയിൽ നടക്കാനിരിക്കുന്ന ബധിര ഒളിംപിക്സിൽ പങ്കെടുക്കുന്നതിനുള്ള സെലക്ഷൻ ട്രയൽസിനായി തയ്യാറാടെക്കുകയാണിവൾ. ലോംഗ്ജംപിലും 100 മീറ്റർ ഹർഡിൽസിലുമാണ് ബധിര ഒളിമ്പിക്്സിൽ അഭിരാമി മത്സരിക്കാൻ ഒരുങ്ങുന്നത്. ഇതിനുള്ള സെലക്ഷൻ മത്സരം ഒക്ടോബറിൽ നടക്കും. 2016 ജനുവരിയിൽ ഹൈദരാബാദിൽ നടന്ന ദേശീയ ബധിര കായികമേളയിൽ 100 മീറ്റർ, 200 മീറ്റർ, ലോംഗ് ജംപ് എന്നീ വിഭാഗങ്ങളിലും അഭിരാമി സ്വർണം നേടിയിരുന്നു.

ഗ്രേസ് മാർക്കും മറ്റു ആനുകൂല്യങ്ങളൊന്നം ലഭിക്കുന്നില്ലെങ്കിലും കായിക രംഗത്ത് കൈയൊപ്പ്് ചാർത്താനുള്ള ശ്രമത്തിലാണ് ഉണ്ണികൃഷ്ണന്റെ ‘ബധിര കുടുംബം’. ബാഡ്മിന്റണിലും ചെസിലും കഴിവുതെളിയിച്ച ആളാണ് പോളിടെക്നിക് അവസാനവർഷ വിദ്യാർഥിനിയായ ചേച്ചി ആതിരാ കൃഷ്ണൻ .