കേന്ദ്ര സർവകലാശാലയിൽ നാക് സന്ദർശനം ഒക്ടോബർ 24 മുതൽ
പെരിയ: കേന്ദ്ര സർവകലാശാലയിൽ ഒക്ടോബർ 24 മുതൽ 27 വരെ നാഷണൽ അസസ്മെന്റ് ആൻഡ് അക്രഡിറ്റേഷൻ കൗൺസിൽ സന്ദർശനം നടത്തും. ഇതിനു മുന്നോടിയായി പെരിയ തേജസ്വിനി ഹിൽസ് കാമ്പസിൽ അധ്യാപകർക്കും–അനധ്യാപക ജീവനക്കാർക്കും വേണ്ടി നാക് പരിശീലന പരിപാടി സംഘടിപ്പിച്ചു. സർവകലാശാലയുടെ അക്കാദമിക ഗുണനിലവാരം ഉറപ്പുവരുത്തുകയെന്ന ലക്ഷ്യം മുൻനിർത്തി യുജിസി നിർദേശിച്ച ഇന്റേണൽ ക്വാളിറ്റി അഷ്വറൻസ് സെലിന്റെ (ഐക്യുഎസി) ഉദ്ഘാടനവും ഇതോടൊപ്പം നടന്നു.

പെരിയ തേജസ്വിനി ഹിൽസ് കാമ്പസിൽ വൈസ് ചാൻസലർ ഡോ.ജി. ഗോപകുമാർ ഐക്യുഎസി ഉദ്ഘാടനം നിർവഹിച്ചു. നാക് അക്രഡിറ്റേഷന്റെ അവസരത്തിൽ സർവകലാശാലയ്ക്ക് മികച്ച ഗ്രേഡുകൾ കരസ്‌ഥമാക്കുന്നതിന് സർവകലാശാല സമൂഹത്തിന്റെ ഭാഗത്തുനിന്നുണ്ടാകേണ്ടസംഘടിതവും ഉത്സാഹപൂർണവുമായ പ്രവർത്തനങ്ങളുടെ പ്രാധാന്യത്തെക്കുറിച്ച് അദ്ദേഹം ഓർമിപ്പിച്ചു. ഡോ. എം.എസ്. ജോണിന്റെ അധ്യക്ഷതയിൽ ചേർന്ന ചടങ്ങിൽ സർവകലാശാല രജിസ്ട്രാർ ഡോ. കെ.പി.സുരേഷ്, ഐക്യുഎസി കോ–ഓർഡിനേറ്റർ ഡോ. മുഹമ്മദ് ഉണ്ണി ഏലിയാസ് മുസ്തഫ, നാക് കോ–ഓർഡിനേറ്റർ ഡോ. രാജേഷ്, ഐക്യുഎസി അംഗം ഡോ. പത്മേഷ് പി. പിള്ള എന്നിവർ പ്രസംഗിച്ചു. തുടർന്ന് മുൻ നാക് അക്കാദമിക് കൺസൾട്ടന്റായ കോഴിക്കോട് സർവകലാശാലയിലെ ഡോ. മധുസൂദനൻ പിള്ള, കേരള സർവകലാശാല സ്കൂൾ ഓഫ് ബിസിനസ് മാനേജ്മെന്റ് ആൻഡ് ലീഗൽ സ്റ്റഡീസിലെ ഡോ. സൈമൺ തട്ടിൽ എന്നിവർ നാക് അക്രഡിറ്റേഷനുമായി ബന്ധപ്പെട്ട വിവിധ വിഷയങ്ങളിൽ ക്ലാസുകളെടുത്തു. പരിശീലന പരിപാടിയിലും ചർച്ചകളിലും കേന്ദ്ര സർവകലാശാലയിലെ എല്ലാ അധ്യാപക–അനധ്യാപക ജീവനക്കാരും പങ്കെടുത്തു.