എൻഡോസൾഫാൻ സുപ്രീം കോടതി വിധി നിർണായകം: പീഡിത മുന്നണി
കാഞ്ഞങ്ങാട്: എൻഡോസൾഫാൻ ദുരിതബാധിതർക്കു മൂന്നു മാസത്തിനുള്ളിൽ അഞ്ചു ലക്ഷം രൂപ നൽകണമെന്നും ജീവിതാവസാനം വരെ ആവശ്യമായ ചികിത്സയും നൽകണമെന്ന സുപ്രീംകോടതി വിധി ദുരിതബാധിതർക്കു ഏറെ ആശ്വാസകരവും സ്വാഗതാർഹവുമാണെന്നു എൻഡോസൾഫാൻ പീഡിത ജനകീയമുന്നണി വിലയിരുത്തി.

2010 ഡിസംബർ 31ന് ദേശീയ മനുഷ്യാവകാശ കമ്മീഷൻ എട്ട് ആഴ്ച കൊണ്ട് കൊടുത്തു തീർക്കാൻ ശുപാർശ ചെയ്ത അടിയന്തിര സാമ്പത്തിക സഹായം പല കാരണങ്ങൾ കാണിച്ച് അട്ടിമറിക്കാൻ ശ്രമിച്ചവർക്കും ’എല്ലാം തീർന്നില്ലേ’ എന്നു ചോദിച്ചവർക്കും താക്കീതാണ് കോടതി വിധിയെന്ന് യോഗം വിലയിരുത്തി. എൻഡോസൾഫാൻ കമ്പനികളും പിസികെയും കൃഷി വകുപ്പും ഭരണകൂടവും നടത്തിയ ഭീകരത ഒന്നുകൂടി വെളിപ്പെടുത്താൻ കഴിഞ്ഞുവെന്നതു ദുരന്ത ജീവിതങ്ങൾക്കു വെളിച്ചമേകാൻ ഇടയാക്കും.

യഥാർഥ നഷ്ടപരിഹാരം നൽകാൻ ട്രൈബ്യൂണൽ സ്‌ഥാപിക്കേണ്ടതിന്റെ ആവശ്യകതയിലേക്കാണു കോടതി വിധിയെ കാണേണ്ടതെന്നും യോഗം ചൂണ്ടിക്കാട്ടി. മുനീസ അമ്പലത്തറ അധ്യക്ഷത വഹിച്ചു. ഡോ. അംബികാസുതൻ മാങ്ങാട്, നാരായണൻ പേരിയ, പി. മുരളീധരൻ, അപ്പ, ടി.വി. രാജേന്ദ്രൻ, ടി. ശോഭന, സി.വി. നളിനി, കെ.ടി. അഖിലകുമാരി, ജമീല അമ്പലത്തറ എന്നിവർ പ്രസംഗിച്ചു. അമ്പലത്തറ കുഞ്ഞികൃഷ്ണൻ സ്വാഗതം പറഞ്ഞു.