വെട്ടേറ്റു ചികിത്സയിലായ ജനതാദൾ–എസ് പ്രവർത്തകർ അപകടനില തരണം ചെയ്തു
ചിറ്റൂർ: ആലാംകടവിൽ വെട്ടേറ്റു സ്വകാര്യ ആശുപത്രിയിൽ ചികിത്സയിൽ കഴിയുന്ന ജനതാദൾ–എസ് പ്രവർത്തകരായ കോരിയാർച്ചള്ള സ്വദേശികളായ സനീഷ് (26), വിനീത് (24) എന്നിവർ അപകടനില തരണം ചെയ്തതായി ചിറ്റൂർ പോലീസ് വ്യക്‌തമാക്കി.കോരിയാർചള്ള സ്വദേശികളായ സിപിഎം പ്രവർത്തകരായ ആർ.പാർഥൻ (35), എ.ഹരിദാസ് (28) എന്നിവരുടെ നേതൃത്വത്തിലുള്ള സംഘമാണ് ആക്രമിച്ചതെന്ന് പരിക്കേറ്റ് ആശുപത്രിയിൽ കഴിയുന്നവർ പോലീസിനു മൊഴിനല്കി.ജനതാദൾ–എസ്–സിപിഎം തുടർസംഘട്ടനങ്ങൾമൂലം പെരുമാട്ടിയിൽ വീണ്ടും സംഘർഷാവസ്‌ഥ സംജാതമായി. പത്തുദിവസംമുമ്പാണ് കേരള കർഷകസംഘം ഏരിയാ സെക്രട്ടറി ഇ.എൻ.രവീന്ദ്രന്റെ വീട്ടുമുറ്റത്തു നിർത്തിയിട്ടിരുന്ന കാറും മറ്റു രണ്ടുവാഹനങ്ങളും തീവച്ചു നശിപ്പിച്ചത്.ഈ സംഭവവുമായി ബന്ധപ്പെട്ട് രണ്ടു ജനതാദൾ–എസ് പ്രവർത്തകരെ അറസ്റ്റുചെയ്ത് റിമാൻഡ് ചെയ്തിരുന്നു. രണ്ടുമാസംമുമ്പ് പെരുമാട്ടി കല്ലൻതോട്ടിൽ ഒരുസംഘം ജനതാദൾ പ്രവർത്തകർ സിപിഎമ്മിലേക്ക് മാറുകയും പിന്നീട് തിരിച്ചുവരികയും ചെയ്തിരുന്നു.ഇടതുമുന്നണി ഘടകകക്ഷികളായ സിപിഎം–ജനതാദൾ പ്രവർത്തകർ തമ്മിൽ കൊമ്പുകോർക്കുന്നതിൽ ജനങ്ങൾ ഭീതിയിലാണ്.

പ്രദേശത്തു സമാധാനാന്തരീക്ഷം സംജാതമാകുന്നതുവരെ കല്യാണപ്പേട്ട കേന്ദ്രമായി പോലീസ് പിക്കറ്റ് ഏർപ്പെടുത്തണമെന്നാണ് ജനങ്ങൾ ആവശ്യപ്പെട്ടത്.