ഫാ. ടോം ഉഴുന്നാലിന്റെ മോചനം: 14ന് പ്രാർഥനാ റാലി നടത്തും
Wednesday, January 11, 2017 12:56 PM IST
പുനലൂർ: ഒമ്പതുമാസം മുമ്പ് യമനിൽ ഭീകരർ തട്ടിക്കൊണ്ടുപോയി ഒളിവിൽ പാർപ്പിച്ചിരിക്കുന്ന ഫാ. ടോം ഉഴുന്നാലിലിന്റെ മോചനത്തിനായി 14ന് പുനലൂരിൽ പ്രാർഥനാ റാലി സംഘടിപ്പിക്കും.

സീറോ മലബാർ സഭ ചങ്ങനാശേരി അതിരൂപത കൊല്ലം–ആയൂർ ഫെറോനയുടെ നേതൃത്വത്തിൽ ലത്തീൻ കത്തോലിക്കാ സഭ, മലങ്കര കത്തോലിക്കാ സഭ എന്നിവയുടെ സഹകരണത്തോടെയാണ് പ്രാർഥനാ റാലി നടത്തുന്നത്.

വൈകുന്നേരം നാലിന് ടി.ബി ജംഗ്ഷനിൽ നിന്നാരംഭിക്കുന്ന റാലി കരുണയുടെ ജപമാല ഉരുവിട്ടുകൊണ്ട് സെന്റ് മേരീസ് കത്തീഡ്രലിൽ സമാപിക്കും. സമാപന ശുശ്രൂഷയിൽ സലേഷ്യൻ സഭയുടെ ബംഗളൂരു പ്രൊവിൻസ് അഡ്മിനിസ്ട്രേറ്ററും യമനിൽ ഫാ. ടോം ഉഴുന്നാലിന്റെ സഹപ്രവർത്തകനുമായിരുന്ന ഫാ. ജോർജ് മുട്ടത്തുപറമ്പിൽ യമനിലെ സമകാലിക സംഭവങ്ങൾ വിവരിച്ച് സന്ദേശം നൽകും.

കൊല്ലം–ആയൂർ ഫെറോന വികാരി ഫാ. ജോസ് വിരിപ്പേൽ ചങ്ങനാശേരി അതിരൂപതാ പാസ്റ്ററൽ കൗൺസിൽ അസിസ്റ്റന്റ് സെക്രട്ടറി ജോസ് ആനിത്തോട്ടം, ഫാ.മാത്യു നടയ്ക്കൽ എന്നിവർ പ്രസംഗിക്കും.

റവ. ഡോ. ക്രിസ്റ്റി ജോസഫ്, ഫാ. മാത്യു മരോട്ടിമൂട്ടിൽ, ആന്റണി കോയിത്ര, ജോസി കടന്തോട്ട് എന്നിവർ പ്രാർഥനാ റാലിയ്ക്ക് നേതൃത്വം നൽകും. ജില്ലയിലെ വിവിധ കത്തോലിക്കാ ഇടവകകളിൽ നിന്നായി ആയിരകണക്കിന് വിശ്വാസികൾ പ്രാർഥനാ റാലിയിൽ പങ്കെടുക്കുമെന്ന് ജനറൽ കോ–ഓർഡിനേറ്റർ ഫാ. മാത്യു നടയ്ക്കലും ജനറൽ കൺവീനർ ടോണി കോയിത്രയും അറിയിച്ചു.