എം.കെ ഭാസ്കരൻ കമ്യൂണിസ്റ്റ് പ്രസ്‌ഥാനത്തിന് വിലപ്പെട്ട സംഭാവന നൽകി: പിണറായി വിജയൻ
Wednesday, January 11, 2017 12:56 PM IST
ചവറ: എം.കെ ഭാസ്ക്കരൻ കമ്യൂണിസ്റ്റ് പ്രസ്‌ഥാനത്തിന്റെ വളർച്ചയ്ക്ക് വിലപ്പെട്ട സംഭാവന നൽകിയ വ്യക്‌തിയായിരുന്നു വെന്ന് മുഖ്യമന്ത്രി പിണറായി വിജയൻ അഭിപ്രായപ്പെട്ടു.

പന്മന ഇടപ്പള്ളിക്കോട്ടയിൽ നടന്ന എം.കെയുടെ ഒന്നാമത് അനുസ്മരണ സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. യുവ തലമുറ എം.കെ മാതൃകയാക്കണം. പാർട്ടിക്ക് വേണ്ടി ഒരുപാട് ത്യാഗങ്ങൾ സഹിച്ചയാളാണ് എം.കെ. തൊഴിലാളികളുടെ അവകാശങ്ങൾക്ക് വേണ്ടി വാദിച്ചു. ഇടത് പക്ഷത്തെ തകർക്കാൻ ചിലർ കച്ചകെട്ടി ഇറങ്ങിയിരിക്കുകയാണ്. ഭരണം കിട്ടിയപ്പോൾ യുഡിഎഫ് ജനങ്ങളെ മറന്ന് പ്രവർത്തിച്ചു. ഇതിന്റെ ഫലമായി ജനങ്ങൾ എൽഡി എഫിനെ വിജയിപ്പിച്ചു.

എൽഡിഎഫ് എന്നും ജനപക്ഷത്ത് നിന്നാണ് പ്രവർത്തിച്ചിട്ടുള്ളതെന്നും മുഖ്യമന്ത്രി പറഞ്ഞു. കശുവണ്ടി തൊഴിലാളികൾക്ക് തൊഴിൽ നൽകാൻ മുതലാളിമാർ തയാറാകണം. കശുവണ്ടി മുതലാളിമാരുടെ പ്രശ്നങ്ങൾ ചർച്ചയിലൂടെ പരിഹരിക്കും.

ചടങ്ങിൽ ഇ.കാസിം അധ്യക്ഷത വഹിച്ചു. നേതാക്കളായ പി.കെ. ഗുരുദാസൻ, ജെ. മേഴ്സിക്കുട്ടിയമ്മ, കെ എൻ ബാലഗോപാൽ, ആർ. രാമചന്ദ്രൻ, എൻ. വിജയൻ പിള്ള, സൂസൻ കോടി, പി.ആർ വസന്തൻ, രാജമ്മ ഭാസ്ക്കരൻ, ടി. മനോഹരൻ, ജി.മുരളീധരൻ തുടങ്ങിയവർ പ്രസംഗിച്ചു. അനുസ്മരണ ദിനത്തോടനുബന്ധിച്ച് അനുപ് ഷാഹുൽ എഴുതിയ എം.കെ .യുടെ ജീവചരിത്ര പുസ്തകം ജെ. മേഴ്സിക്കുട്ടിയമ്മയ്ക്ക് നൽകി മുഖ്യമന്ത്രി പ്രകാശനം ചെയ്തു. ടൈറ്റാനിയം ജംഗ്ഷനിൽ നിന്നും ഇടപ്പള്ളിക്കോട്ട വരെ പ്രകടനവും നടന്നു.