റെയിൽവേ സ്റ്റേഷൻ പരിസരത്ത് പാർക്ക് ചെയ്തിരുന്ന ഇരുചക്രവാഹനങ്ങളും കാറും കത്തി നശിച്ചു
കരുനാഗപ്പള്ളി: കരുനാഗപ്പള്ളി റെയിൽവേ സ്റ്റേഷൻ പരിസരത്ത് പാർക്ക് ചെയ്തിരുന്ന ഇരുചക്രവാഹനങ്ങളും കാറും കത്തി നശിച്ചു.

ഇന്നലെ ഉച്ചകഴിഞ്ഞ് 2.45 നായിരുന്നു സംഭവം. സ്റ്റേഷനു തെക്കുവശം പാർക്ക് ചെയ്തിരുന്ന 16 ഓളം ഇരുചക്രവാഹനങ്ങൾക്കാണ് തീപിടിച്ചത്. തുടർന്ന് സമീപത്ത് പാർക്ക് ചെയ്തിരുന്ന മാരുതി എർട്ടിഗ കാറിലേക്കും തീപടർന്നു. കാർ ഭാഗികമായും ഇരുചക്രവാഹനങ്ങൾ പൂർണമായും കത്തിയമർന്നു.

ഉടൻ സ്‌ഥത്ത് എത്തിയ അഗ്നിശമന സേന അണച്ചതുകാരണം മറ്റുള്ള സ്‌ഥലങ്ങളിലേക്ക് തീ പടരാതിരിക്കാൻ കാരണമായി. സമീപത്ത് നിരവധി വാഹനങ്ങൾ പാർക്ക് ചെയ്തിരുന്നു.

ഫയർഫോഴ്സിന്റെ സമയോചിതമായ ഇടപെടൽ വൻ അഗ്നിബാധ ഒഴിവായി. കരുനാഗപ്പള്ളി ഫയർഫോഴ്സ് സ്റ്റേഷൻ ഓഫീസർ വി.സി.വിശ്വനാഥന്റെ നേതൃത്വത്തിലുള്ള സംഘമാണ് തീ അണയ്ക്കാൻ നേതൃത്വം നൽകിയത്.

ബൈക്കുകൾ, ബുള്ളറ്റ്, സ്കൂട്ടർ എന്നിവ കത്തിയമർന്നവയിൽപ്പെടുന്നു. യാത്രക്കാരുടെ വാഹനങ്ങളാണ് കത്തി നശിച്ചത്. വാഹനങ്ങൾ കത്തിയത് വഴി ലക്ഷങ്ങളുടെ നഷ്‌ടമാണ് ഉണ്ടായത്. റെയിൽവേയുടെ ഔദ്യോഗിക പാർക്കിംഗ് സ്‌ഥലം സ്റ്റേഷനു മുന്നിലാണ്. വാഹനങ്ങൾ കത്തിയ സ്‌ഥലത്ത് ഉടമകളുടെ സ്വന്തം ഉത്തരവാദിത്വത്തിലാണ് പാർക്കിംഗ് നടന്നിരുന്നത്. സമീപകാലത്ത് മൂന്ന് തവണ സ്റ്റേഷൻ പരിസരത്തെ കാടുമൂടിയ ഭാഗങ്ങളിലെ പുല്ലിന് തീപിടിച്ചിരുന്നു.

കഴിഞ്ഞ ദിവസവും ഇത്തരത്തിൽ തീപടർന്നതിനെ തുടർന്ന് കരുനാഗപ്പള്ളി ഫയർഫോഴ്സ് എത്തി തീഅണച്ചു. ഇതേ തുടർന്ന് ഫയർഫോഴ്സ് കാടുമൂടിയ ഭാഗങ്ങൾക്ക് തീപടരാൻ സാധ്യതയുണ്ടെന്നും വാഹനങ്ങൾക്ക് ഭീഷണിയാകും എന്ന് മുന്നറിയിപ്പ് നൽകുകയും റെയിൽവേ സ്റ്റേഷൻമാസ്റ്റർക്ക് രണ്ടു ദിവസം മുൻപ് കത്തും നൽകിയിരുന്നു.

ഇതിനു പിന്നാലെയാണ് ഇന്നലെ വാഹനങ്ങൾക്ക് തീപിടിച്ചത്. പുല്ലിന് തീപിടിച്ച് വാഹനങ്ങളിലേക്ക് പടർന്നതാണോ എന്നും സംശയിക്കുന്നു. എന്നാൽ സംഭവത്തിൽ ദുരൂഹത ഉണ്ടെന്നും സംശയിക്കുന്നു. ഔദ്യോഗിക പാർക്കിംഗ് സ്‌ഥലം ഒഴിവാക്കി വാഹനങ്ങൾ പാർക്ക് ചെയ്യുന്നതിനെ ചൊല്ലി ഇവിടെ തർക്കം നടന്നതായും പറയപ്പെടുന്നു. തീപിടുത്തത്തെകുറിച്ച് പോലീസ് അന്വേഷിക്കുന്നുണ്ട്.

യാത്രക്കാർ ആരെങ്കിലും സിഗരറ്റ് കുറ്റിയോ മറ്റോ പുല്ലിലേക്ക് വലിച്ചെറിഞ്ഞ് തീപിടിച്ചതാണോ എന്നും സംശയിക്കുന്നു. ദൂരസ്‌ഥലങ്ങളിൽ ജോലിക്ക് പോകുന്ന ഉദ്യോഗസ്‌ഥരുടെ വാഹനങ്ങളാണ് കത്തിയമർന്നവയിൽപ്പെട്ടത്. ഉടമസ്‌ഥരെത്തി രേഖാമൂലം പരാതി നൽകിയാലെ വാഹനങ്ങൾ ആരുടെ ഉടമസ്‌ഥതയിലുള്ളതാണന്ന് അറിയാൻ കഴിയു.

ഫയർഫോഴ്സിന്റെ മുന്നറിയിപ്പ് റെയിൽവേ അവഗണിച്ചതാണ് വാഹനങ്ങൾ കത്തി നശിക്കാൻ കാരണമെന്ന് നാട്ടുകാർ പരാതിപ്പെടുന്നു. അടിയന്തരമായി കാടുമൂടിയ ഭാഗങ്ങൾ വെട്ടിതെളിക്കാൻ റെയിൽവേ ഉടൻ നടപടി സ്വീകരിക്കണമെന്നും നാട്ടുകാർ ആവശ്യപ്പെട്ടു.