കുടിവെള്ളത്തിനു പ്രാമുഖ്യം, കനാൽജലം കൃഷിക്കില്ല
Wednesday, January 11, 2017 1:20 PM IST
പത്തനംതിട്ട: മണിയാർ, കല്ലട സംഭരണികളിലെ വെള്ളം ഇക്കുറി കാർഷികാവശ്യത്തിനു ലഭിക്കില്ല. വരൾച്ച രൂക്ഷമാകുന്ന സാഹചര്യത്തിൽ കനാൽജലം കുടിവെള്ള ആവശ്യത്തിനു വിനിയോഗിക്കണമെന്ന നിർദേശമാണ് അധികൃതർക്കു ലഭിച്ചിരിക്കുന്നത്. നിലവിൽ രണ്ട് സംഭരണികളിൽ നിന്നുമുള്ള വെള്ളം കനാലുകളിലൂടെ തുറന്നുവിടുന്നില്ല. അടുത്തയാഴ്ച മുതൽ നേരിയതോതിൽ വെള്ളം തുറന്നുവിടാൻ തീരുമാനമുണ്ടെങ്കിലും കാർഷികമേഖലയിലേക്കു വെള്ളം ലഭിക്കില്ല.

മണിയാർ ബൗണ്ടറിയിൽ കനാൽ തകർന്നതോടെ പിഐപി കനാലിലൂടെ ജലമൊഴുക്ക് നിർത്തിവച്ചിരിക്കുകയാണ്. പ്രധാന കനാലിലെ തകർച്ച താത്കാലികമായി പരിഹരിക്കാനുള്ള ശ്രമം നടന്നുവരികയാണ്. സിമന്റ്കട്ട പാകി ഒരു മീറ്റർ ഉയരത്തിൽ വെള്ളം ഒഴുക്കാനാണ് തീരുമാനം.

വാഴക്കുന്നംവരെയുള്ള പ്രധാന കനാലിലൂടെ പൂർണമായി വെള്ളം ഒഴുക്കും. വാഴക്കുന്നത്തുനിന്ന് ഇടതു, വലതുകര കനാലുകളിലൂടെ ഒന്നിടവിട്ട ദിനങ്ങളിൽ വെള്ളം നൽകും. ഒരു മീറ്റർ ഉയരത്തിൽ വെള്ളം ഒഴുകുന്നതോടെ കനാലിന്റെ തീരങ്ങളിലെ കുടിവെള്ള സ്രോതസുകൾ സജീവമായി നിലനിർത്താനാകുമെന്നാണ് പ്രതീക്ഷ. നിലവിൽ കനാലിൽ വെള്ളം ഇല്ലാതായതോടെ തീരങ്ങളിലെ കിണറുകളിൽ അടക്കം വെള്ളം വറ്റിയിരിക്കുകയാണ്. കനാലുകൾക്ക് പല ഭാഗങ്ങളിലും ചോർച്ചയുള്ളതിനാൽ ഒഴുകിയെത്തുന്ന വെള്ളം മാത്രമാകും കാർഷികമേഖലയ്ക്ക് ആശ്വാസമേകുന്നത്.വടശേരിക്കര മണിയാറിൽ നിന്നാണ് പമ്പ ജലസേചന പദ്ധതിയുടെ കനാൽ ആരംഭിക്കുന്നത്.ശബരിഗിരി, കക്കാട് എന്നീ പ്രധാന ജലവൈദ്യുതി പദ്ധതികളിലെ ഉത്പാദനത്തിനുശേഷം എത്തുന്ന ജലമാണ് മണിയാറിൽ തടഞ്ഞുനിർത്തി പമ്പാ ജലസേചന പദ്ധതിക്കും സ്വകാര്യ കമ്പനിയുടെ 12 മെഗാവാട്ട് വൈദ്യുതി ഉത്പാദനത്തിനും പ്രയോജനപ്പെടുത്തുന്നത്. നിലവിൽ ശരാശരി 33.60 അടി വെള്ളം മണിയാർ സംഭരണിയിലുണ്ട്. കഴിഞ്ഞവർഷത്തെ അപേക്ഷിച്ച് ജലനിരപ്പ് കുറവാണ്. മണിയാറിൽ വൈദ്യുതി ഉത്പാദനത്തിനു 34.40 അടി വെള്ളം ഉള്ളപ്പോഴാണ് വിട്ടുനൽകുന്നത്. ജലനിരപ്പ് 34.80 അടിയാകുമ്പോൾ ഷട്ടറുകൾ തുറക്കാറുണ്ട്. ജലസേചന കനാലുകൾ ജലനിരപ്പ് പരിഗണിക്കാതെ തുറന്നുവച്ചിരുന്നു. ഇത്തവണ കനാൽ അടച്ചതോടെ ശബരിഗിരി, കക്കാട് പദ്ധതികളിൽ പകൽസമയത്ത് വൈദ്യുതി ഉത്പാദനം കുറച്ചിരിക്കുകയാണ്.

മണിയാറിൽ നിന്നുള്ള പ്രധാന കനാൽ 26 കിലോമീറ്റർ ദൈർഘ്യമുള്ളതാണ്. വടശേരിക്കര, റാന്നി, ചെറുകോൽ ഗ്രാമപഞ്ചായത്തുകളിലൂടെ വാഴക്കുന്നത്തെത്തി രണ്ടായി തിരിയുന്നു.

ചെങ്ങന്നൂർ, മാവേലിക്കര വഴി കാർത്തികപ്പള്ളിയിലേക്കു പോകുന്ന ഇടതുകര കനാലിനു 47.15 കിലോമീറ്ററും പുല്ലാട്, വള്ളംകുളം, ഓതറ, വരട്ടാർ വഴിയുള്ള വലതുകര കനാൽ 26.23 കിലോമീറ്ററും ദൈർഘ്യമുള്ളതാണ്. കനാലിന്റെ തകർച്ചയോടെ മണൽച്ചാക്ക് അടുക്കി വടശേരിക്കര പഞ്ചായത്ത് പ്രദേശങ്ങളിൽ താത്കാലികാടിസ്‌ഥാനത്തിൽ ജലവിതരണം നടത്തുന്നുണ്ട്. ശബരിമല തീർഥാടകർക്കുവേണ്ടി ഏഴ് കിലോമീറ്റർ ഭാഗത്ത് വെള്ളമെത്തുന്നു. ബാക്കിയുള്ള കനാൽഭാഗം വരണ്ടു കിടക്കുകയാണ്.

കല്ലട സംഭരണിയിൽ വെള്ളം കുറവായതോടെയാണ് കെഐപി കനാലുകൾ വരണ്ടത്. ഇതോടെ കോന്നി, അടൂർ താലൂക്കുകളിലാണ് വരൾച്ച രൂക്ഷമായത്. 15 ഓടെ കനാൽ തുറക്കുമെന്നു കരുതിയിരുന്നെങ്കിലും ജലനിരപ്പ് കുറവായതിനാൽ കാർഷികാവശ്യത്തിനു തുറക്കേണ്ടതില്ലെന്നാണ് തീരുമാനം. കനാലുകളുടെ അറ്റകുറ്റപ്പണി നടക്കാത്തതിനാൽ ജലം തുറന്നുവിട്ടാലും പാഴാകാനാണ് സാധ്യത.