തേയിലച്ചെടികൾ കത്തിനശിച്ചു
ചെറുതോണി: റോഡരുകിലെ മാലിന്യം കത്തിക്കുന്നതിനിടെ തീപടർന്ന് തേയിലച്ചെടികൾ കത്തിനശിച്ചു. പ്രകാശ് ഐപ്പൻപറമ്പിൽ സിബിയുടെ തേയില തോട്ടത്തിലാണ് തീപടർന്ന് 350 ചെടികൾ കത്തിനശിച്ചത്. പ്രകാശ് മാടപ്ര റോഡിനുസമീപമാണ് സംഭവം.

കാമാക്ഷി പഞ്ചായത്തിലെ ഒന്നാംവാർഡായ ഈ പ്രദേശത്ത് പഞ്ചായത്തംഗത്തിന്റെ നേതൃത്വത്തിൽ കാടുകൾ വെട്ടിമാറ്റുകയും മാനില്യങ്ങൾ നീക്കംചെയ്യുന്നതുൾപ്പെടെയുള്ള പ്രവർത്തികൾ നടന്നിരുന്നു. ഇവ പൂർണമായി നശിപ്പിക്കുന്നതിനായി തീയിട്ട് കത്തിക്കുകയായിരുന്നു. എന്നാൽ പെട്ടന്ന് പടർന്നുപിടിച്ച് തൊട്ടടുത്തുള്ള തേയില തോട്ടത്തിലേക്ക് വ്യാപിക്കുകയായിരുന്നു. രണ്ടുവർഷം പ്രായമായ ചെടികളാണ് കത്തിനശിച്ചത്. സംഭവത്തെ തുടർന്ന് തങ്കമണി പോലീസിൽ പരാതി നൽകിയെങ്കിലും നടപടി ഉണ്ടാകാത്തതിനാൽ ജില്ലാ പോലീസ് മേധാവിക്കും കളക്ടർക്കും പരാതി നൽകിയതായി സിബി പറഞ്ഞു.