പഞ്ചായത്ത് കുളത്തിൽ സ്വകാര്യവ്യക്‌തി മോട്ടോർ സ്‌ഥാപിച്ചു
Wednesday, January 11, 2017 1:30 PM IST
രാജാക്കാട്: നാൽപതോളം കുടുംബങ്ങൾക്ക് ആശ്രയമായ കുടിവെള്ളപദ്ധതി സ്വകാര്യവ്യക്‌തി കൈയേറാൻ ശ്രമിക്കുന്നതായി പരാതി. സേനാപതി പഞ്ചായത്തിലെ വെങ്കലപ്പാറമേട് കുടിവെള്ള പദ്ധതിയാണ് സമീപ സ്‌ഥലമുടമയായ സ്വകാര്യവ്യക്‌തി മോട്ടോർ സ്‌ഥാപിച്ച് കൈയേറുവാൻ ശ്രമിക്കുന്നത്. പ്രതിഷേധവുമായി നാട്ടുകാർ രംഗത്തെത്തി.

സേനാപതി പഞ്ചായത്തിലെ കടുത്ത കുടിവെള്ളക്ഷാമം നേരിടുന്ന പ്രദേശമാണ് വെങ്കലപ്പാറ. കുടിവെള്ളത്തിന് കിലോമീറ്ററുകൾ അകലെ നിന്നും വാഹനങ്ങളിൽ വെള്ളമെത്തിച്ചിരുന്ന സാഹചര്യത്തിലാണ് നാട്ടുകാരുടെ ആവശ്യത്തെതുടർന്ന് ജനകീയാസൂത്രണ പദ്ധതി പ്രകാരം ജില്ലാ പഞ്ചായത്തിന്റേയും ബ്ലോക്ക് പഞ്ചായത്തിന്റെയും ഗ്രാമപഞ്ചായത്തിന്റേയും ഫണ്ടുപയോഗിച്ചാണ് പാടത്ത് കുളം നിർമിച്ച് ആയിരത്തി അഞ്ഞൂറ് അടി ഉയരത്തിലുള്ള വെങ്കലപ്പാറ മേട്ടിലേയ്ക്ക് കുടിവെള്ളമെത്തിക്കുന്നത്. ഒമ്പതുലക്ഷത്തിലധികം രൂപ മുതൽ മുടക്കി നിർമിച്ച നാട്ടുകാരുടെ സ്വപ്നപദ്ധതിയാണ് നിലവിൽ സ്വകാര്യവ്യക്‌തി മോട്ടോർ സ്‌ഥാപിച്ച് കൈയേറാൻ ശ്രമിക്കുന്നതെന്ന് ഉപഭോക്‌തൃ കമ്മിറ്റി കൺവീനർ ആലീസ് സുരേന്ദ്രൻ പറഞ്ഞു. പരാതി നൽകിയിട്ടും പ്രശ്നത്തിന് പരിഹാരം ഉണ്ടാകാത്തതിനാൽ നാട്ടുകാർ ജില്ലാകളക്ടർക്ക് പരാതി നൽകി.

നാൽപതോളം കുടുംബങ്ങൾക്ക് കുടിവെള്ളം ഇല്ലാത്ത സാഹചര്യത്തിൽ പ്രതിഷേധവുമായി നാട്ടുകാർ രംഗത്തെത്തുകയും ചെയ്തതോടെ അടിയന്തരമായി അന്വേഷിച്ച് റിപ്പോർട്ട് നൽകുവാൻ ജില്ലാകളക്ടർ ഉത്തരവിടുകയുംചെയ്തു. ഇതിന്റെ അടിസ്‌ഥാനത്തിൽ വില്ലേജ് ഓഫീസർ സ്‌ഥലത്തെത്തി.

നേരിട്ട് ബോധ്യപ്പെട്ട കാര്യങ്ങളുടെ അടിസ്‌ഥാനത്തിൽ ഉന്നത ഉദ്യോഗസ്‌ഥർക്ക് ഉടൻ റിപ്പോർട്ടുനൽകുമെന്നും വില്ലേജ് ഓഫീസർ പറഞ്ഞു.