കൗതുകമായി ഫ്ളാഷ് മോബ്
നെടുങ്കണ്ടം: കൗതുക്കാഴ്ചയായി മാറി നെടുങ്കണ്ടം പ്രൈവറ്റ് ബസ് സ്റ്റാൻഡിൽ അരങ്ങേറിയ ഫ്ളാഷ് മോബ്. ഒരുകൂട്ടം യുവതീയുവാക്കൾ പെട്ടന്ന് അവിടെ ഉയർന്ന പാട്ടിനൊത്ത് നൃത്തംവച്ചപ്പോൾ ഇതെന്തെന്നറിയാതെ തടിച്ചുകൂടുകയായിരുന്നു നാട്ടുകാർ.

കാണികൾക്ക് കൗതുകവും അത്ഭുതവും പകർന്നു നടന്ന നൃത്തം ഫ്ളാഷ് മോബാണെന്ന് മനസിലായത് യൂണിഫോമിൽ എത്തിയ ഉടുമ്പൻചോല സബ് റീജണൽ ട്രാൻസ്പോർട്ട് ഓഫീസർ എം.കെ. ജയേഷ്കുമാർ ഇതുസംബന്ധിച്ച് വിവരിച്ചപ്പോഴാണ്. 28–ാമത് റോഡ് സുരക്ഷാ വാരത്തോടനുബന്ധിച്ച് നെടുങ്കണ്ടം എംഇഎസ് കോളജിലെ എൻസിസി കേഡറ്റുകളാണ് ഫ്്ളാഷ് മോബ് അവതരിപ്പിച്ചത്.

ഉടുമ്പൻചോല സബ് ആർഡിഒ, നെടുങ്കണ്ടം ജെസിഐ, നെടുങ്കണ്ടം എംഇഎസ് എൻസിസി കേഡറ്റുകൾ സംയുക്‌തമായാണ് ബോധവത്കരണ പരിപാടി സംഘടിപ്പിച്ചത്. ഇതോടനുബന്ധിച്ച് റോഡ് സുരക്ഷ സന്ദേശം നൽകുകയും ലഘുലേഖകൾ വിതരണം ചെയ്യുകയും ചെയ്തു.

രാവിലെ താന്നിമൂട്ടിൽ ലഘുലേഖ വിതരണവും ബോധവത്കരണ ക്ലാസും നടന്നിരുന്നു. ഉടുമ്പൻചോല ജോയിന്റ് ആർടിഒ എം.കെ. ജയേഷ്കുമാർ, ജെസിഐ പ്രസിഡന്റ് റിക്ഷാൽ റഷീദ്, പ്രിൻസ് ജോർജ്, ബിജുലാൽ പി. റാം, കെ. ദിലീപ് കുമാർ, എ.എസ്. പ്രദീപ്, ജോബി ജോസഫ്, ബിനോയി ചാക്കോ, ശ്രീവിശാഖ് എന്നിവർ നേതൃത്വംനൽകി.