പേട്ടതുള്ളലിൽ എരുമേലി ഭക്‌തിയിൽ നിറഞ്ഞു
എരുമേലി: ഇന്നലെ അമ്പലപ്പുഴ–ആലങ്ങാട്ട് സംഘങ്ങളുടെ പേട്ടതുള്ളൽ വീക്ഷിക്കാൻ എരുമേലിയിൽ എത്തിയത് പതിനായിരങ്ങൾ. ഉച്ചയ്ക്ക് പന്ത്രണ്ടരയോടെ അമ്പലപ്പുഴയുടെ പേട്ടതുള്ളൽ ആരംഭിക്കുന്നതിന് മുമ്പെ പേട്ടക്കവല പൂർണമായി ജനനിബിഡമായി. നിരവധി വിദേശികളും ദൃശ്യങ്ങൾ പകർത്താൻ എത്തിയിരുന്നു. അമ്പലപ്പുഴയ്ക്ക് പേട്ടതുള്ളാൻ അനുമതിയേകി കൃഷ്ണപ്പരുന്ത് വട്ടമിട്ട് പറന്നപ്പോൾ ശരണം വിളികളോടെ പതിനായിരക്കണക്കിന് തൊഴുകൈകളാണ് ഉയർന്നത്. ആകാശത്തേക്ക് നോക്കി കൈകൾ കൂപ്പി ഭക്‌തരും വിശ്വാസികളും ഉച്ചത്തിൽ ശരണം വിളിച്ചു. ആലങ്ങാട്ട് സംഘം പേട്ടതുള്ളൽ ആരംഭിക്കുമ്പോൾ മാനത്ത് നക്ഷത്രം തിളങ്ങുകയും കൃഷ്ണപ്പരുന്ത് വട്ടമിട്ട് പറന്നെത്തുകയും ചെയ്തത് ഭക്‌തരുടെ മനം കുളിർപ്പിക്കുന്ന കാഴ്ചയായിരുന്നു.

രൗദ്രഭാവത്തോടെ കാടിളക്കിയായിരുന്നു അമ്പലപ്പുഴയുടെ തുള്ളൽ. കണ്ടുനിന്ന നാട്ടുകാർ ഏറെപ്പേരും അമ്പലപ്പുഴയ്ക്കൊപ്പം തുള്ളി. മൂന്ന് ആനകൾ സംഘത്തിന് അകമ്പടിയേകി. ചെണ്ടമേളവും ചേങ്ങിലത്താളങ്ങളും ശരണംവിളികളും നിറഞ്ഞു നിന്നു. നയനമനോഹരമായിരുന്നു ആലങ്ങാടിന്റെ തുള്ളൽ. വെള്ളമുണ്ടുടുത്ത് തോളിൽ വെള്ള ഉത്തരീയവും, ഭസ്മക്കുറികളുമായി ശാന്തമായി ചുവടുകളോടെ സംഘം തുള്ളുമ്പോൾ കൊട്ടക്കാവടിയാട്ടവും മലബാർ ചെണ്ടമേളവും വിസ്മയം പകർന്നു. എൻഎസ്എസ്, എസ്എൻഡിപി, വെള്ളാള മഹാസഭ, വിശ്വകർമ്മ മഹാസഭ തുടങ്ങിയ വിവിധ സാമുദായിക സംഘടനാഭാരവാഹികൾ പേട്ടതുള്ളൽ സംഘങ്ങൾക്ക് സ്വീകരണം നൽകി. ഒപ്പം മോരുംവെള്ളം വിതരണവും നടത്തി. പുത്തൻവീട്ടിലും ഗ്രാമപഞ്ചായത്ത് ഓഫീസ് പടിക്കലും കെഎസ്ആർടിസി ജംഗ്ഷനിലും പോലീസ് കൺട്രോൾ റൂമിലും വിവിധ വകുപ്പുകളിലെ ഉദ്യോഗസ്‌ഥരും ജനപ്രതിനിധികളും ചേർന്ന് സ്വീകരണം നൽകി. വലിയമ്പലത്തിൽ ജമാഅത്തിന്റെ വക അന്നദാനവുമുണ്ടായിരുന്നു.

ടൗൺ റോഡ് മണിക്കൂറുകളോളം വാഹനവിമുക്‌തമാക്കിയാണ് ഇരുസംഘങ്ങൾക്കും പേട്ടതുള്ളൽ നടത്താൻ സൗകര്യം പോലീസ് ക്രമീകരിച്ചത്. ഉയർന്ന കെട്ടിടങ്ങളുടെ മുകളിലും ടൗൺ നിറഞ്ഞുമായിരുന്നു ജനസഞ്ചയം. സമാന്തരപാതകളിൽ മണിക്കൂറുകളോളം ഗതാഗതകുരുക്ക് അനുഭവപ്പെട്ടെങ്കിലും പോലീസ് ഏറെ പണിപ്പെട്ട് സുഗമാക്കുകയായിരുന്നു.