ബസ് സർവീസ് നിർത്തിയതിൽ പ്രതിഷേധം ശക്‌തമാകുന്നു
Wednesday, January 11, 2017 4:52 PM IST
ചെമ്പേരി: മലയോര മേഖലയിൽ ഉയരംകൂടിയ പ്രദേശത്തെ ജനവാസ കേന്ദ്രമായ കനകക്കുന്നിൽ നിന്നും താലൂക്ക്, ജില്ലാ ആസ്‌ഥാനങ്ങളിലേക്കു സർവീസ് നടത്തിവന്നിരുന്ന കെഎസ്ആർടിസി ബസ് യാതൊരു മുന്നറിയിപ്പുമില്ലാതെ നിർത്തിവച്ചതിൽ പ്രദേശവാസികളടക്കം നിരവധി യാത്രക്കാരുടെ പ്രതിഷേധം ശക്‌തമാകുന്നു.

വർഷങ്ങളായി മുടക്കമില്ലാതെ ഓടിക്കൊണ്ടിരുന്ന ബസിന്റെ റൂട്ടും സമയക്രമവും കൂടുതൽ യാത്രക്കാർക്ക് സൗകര്യപ്രദമായ രീതിയിൽ പുനർനിർണയം നടത്തിയിട്ട് ഏതാനും ആഴ്ചകൾ പിന്നിടുന്നതേയുള്ളൂ.

മലയോരത്തെ യാത്രാസൗകര്യം പരിമിതമായിരുന്ന ഇരുപതിൽപരം ജനവാസ കേന്ദ്രങ്ങളെ ബന്ധപ്പെടുത്തിയുള്ള പുതിയ റൂട്ടിൽ ബസ് ഓടിത്തുടങ്ങിയതോടെ ഈ പ്രദേശങ്ങളിലെ നൂറുകണക്കിനു കുടുംബങ്ങൾക്ക് പുതുതായി യാത്രാ സൗകര്യം ലഭ്യമായിരുന്നു.

കനകക്കുന്നിൽ നിന്നും പുലർച്ചെ 4.30ന് പുറപ്പെട്ടിരുന്ന ആദ്യ ട്രിപ്പ് കണ്ണൂർ റെയിൽവേ സ്റ്റേഷനിലേക്കും പരിയാരം മെഡിക്കൽ കോളജ് ആശുപത്രിയിലേക്കും മറ്റു വിദൂര സ്‌ഥലങ്ങളിലേക്കും യാത്ര ചെയ്യേണ്ടവർക്ക് ഏറെ ഉപകാരപ്രദമായിരുന്നു. ഈ ബസ് ഓട്ടം നിർത്തിയതോടെ വിദ്യാർഥികളും ഉദ്യോഗസ്‌ഥരുമടക്കം നിത്യവും ഇതുവഴി യാത്ര ചെയ്തിരുന്ന നൂറുകണക്കിന് ആളുകളാണ് കടുത്ത ദുരിതത്തിലായിട്ടുള്ളത്.

ഈ ബസ് മുടക്കം വരാതെ ഓടിക്കാൻ അടിയന്തര നിർദേശം നൽകണമെന്ന് നാട്ടുകാർ ബന്ധപ്പെട്ട അധികൃതരോട് ആവശ്യപ്പെട്ടു.