ജില്ലാ പഞ്ചായത്ത് യോഗത്തിൽ ബഹളം
ആലപ്പുഴ: പള്ളിപ്പാട് ഡിവിഷനിലെ പട്ടികജാതികാർക്കുള്ള കുടിവെള്ള പദ്ധതിയിൽ അനുവദിച്ച അധിക ഫണ്ട് ലഭിക്കാത്തതിൽ ജില്ലാ പഞ്ചായത്ത് യോഗത്തിൽ പ്രതിഷേധം. പ്രതിപക്ഷം യോഗം ബഹിഷ്കരിച്ചു. പിന്നീട് പ്രതിപക്ഷ നേതാവും ഡിവിഷനിലെ ജില്ലാ പഞ്ചായത്തംഗവുമായ ജോൺതോമസ് ജില്ലാ പഞ്ചായത്തിനു മുന്നിൽ കുത്തിയിരുപ്പ് സമരം നടത്തി.

2014–15 വർഷത്തെ വാർഷിക പദ്ധതിയിൽ പള്ളിപ്പാട് ഡിവിഷനിലെ നാലുകെട്ട് കവല, മിനത്തോടിൽ കോളനി, ചക്കച്ചൻകാവ് എന്നിവിടങ്ങളിൽ പട്ടികജാതി കോളനികളിൽ കുടിവെള്ളം എത്തിക്കുന്നതിന് പദ്ധതി തുകയായ 43 ലക്ഷം രൂപയ്ക്കു പുറമേ പത്തുലക്ഷം രൂപ അധികമായി ജില്ല പഞ്ചായത്ത് അനുവദിച്ചിരുന്നു.

ഏഴുമാസം മുമ്പ് കൂടിയ യോഗത്തിലാണ് പണം അനുവദിച്ചത്. എന്നാൽ അനുവദിച്ച അധിക ഫണ്ട് വിതരണത്തിൽ നിന്നും ജില്ല പഞ്ചായത്ത് ഭരണാധികാരികൾ പിൻമാറിയെന്ന് അദ്ദേഹം ആരോപിക്കുന്നു. കുടിവെള്ളപ്രശ്നം ഏറെ രൂക്ഷമായതു കണ്ടുകൊണ്ട് കൂടുതൽ പണം അനുവദിക്കാൻ തയാറായത്. പണം അനുവദിച്ചത് ചൂണ്ടിക്കാട്ടിയിട്ടും ഫണ്ട് നൽകാൻ കഴിയില്ലെന്ന നിലപാട് ജില്ല പഞ്ചായത്ത് വ്യക്‌തമാക്കിയതോടെയാണ് പ്രതിപക്ഷം ഒന്നടങ്കം ബഹളം വെച്ച് പുറത്തിറങ്ങിയത്.

തുടർന്ന് പ്രതിപക്ഷ നേതാവ് ജോൺ തോമസ്, എ.ആർ കണ്ണൻ എന്നിവർ കുത്തിയിരുപ്പു സമരം നടത്തുകയായിരുന്നു. പ്രദേശത്തെ കുടിവെള്ളപ്രശ്നത്തിനു പരിഹാരം കാണാൻ പണം അനുവദിക്കാതെ സമരത്തിൽ നിന്നും പിന്മാറില്ലെന്ന് ജോൺതോമസ് വ്യക്‌തമാക്കി.

കുടിവെള്ളം ലഭ്യമാക്കുന്നതിനുള്ള പണം ഏപ്രിൽ മാസത്തിൽ വാട്ടർ അഥോറിറ്റിയിൽ അടക്കാമെന്ന് ജില്ലാ പഞ്ചായത്ത് പ്രസിഡന്റ് പിന്നീട് ഉറപ്പ് നൽകിയെന്ന് അംഗങ്ങൾ അറിയിച്ചു. ഇതേത്തുടർന്ന് സമരം അവസാനിപ്പിക്കുകയായിരുന്നു.