വേമ്പനാടിനെ മാലിന്യമുക്‌തമാക്കാൻ ശ്രമം തുടങ്ങി
ആലപ്പുഴ: നമ്മുടെ ജനതയുടെ പ്രധാന ഉപജീവന മാർഗങ്ങളെ കേന്ദ്രീകരിക്കുന്നതും ലോകത്തെ ഏറ്റവും വലിയ സംരക്ഷിത കേന്ദ്രായ റാംസർ സൈറ്റിന്റെ ഭാഗമായ വേമ്പനാട് കായലിനെ മാലിന്യ വിമുക്‌തമാക്കാനുള്ള തീവ്രപരിശ്രമത്തിനു പുന്നമടയിൽ തുടക്കം കുറിച്ചു. ഫിനിഷിംഗ് പോയിന്റിൽ കളക്ടർ വീണ എൻ. മാധവൻ, നഗരസഭാധ്യക്ഷൻ തോമസ് ജോസഫ് തുടങ്ങിയവരുടെ സാന്നിധ്യത്തിലാണ് പദ്ധതിക്കു തുടക്കം കുറിച്ചത്.

ഡിപ്പാർട്ട്മെന്റ് ഓഫ് ടൂറിസം, കെടിഎം സൊസൈറ്റി, ഹൗസ്ബോട്ട്, മോട്ടോർബോട്ട്, ശിക്കാര, വിവിധ സംഘടനകൾ, വിവിധ തൊഴിലാളി യൂണിയനുകൾ എന്നിവരുടെ സംയുക്‌താഭിമുഖ്യത്തിലാണ് വേമ്പനാട് ഇനിഷ്യേറ്റീവ് എന്ന പരിപാടി സംഘടിപ്പിച്ചിരിക്കുന്നത്. ഒന്നാംഘട്ടം ഏകദേശം 15 ദിവസത്തോളം തുടർന്നു കൊണ്ടുപോകാനാണ് വേമ്പനാട് സംയുക്‌ത സംരക്ഷണസമിതി തീരുമാനിച്ചിരിക്കുന്നത്.

കായലുകളും തോടുകളും മാലിന്യക്കൂമ്പാരമായി മാറുന്നതിനെ കുറിച്ച ഇക്കഴിഞ്ഞ ഫെബ്രുവരി 27നു ദീപിക റിപ്പോർട്ടു ചെയ്തിരുന്നു. പുന്നമടയിൽ പ്ലാസ്റ്റിക് കുപ്പികളും കവറുകളും ഗ്ലാസുകളും മദ്യക്കുപ്പികളും പച്ചക്കറി–മാംസ അവശിഷ്‌ടങ്ങളടക്കം കെട്ടിക്കിടന്ന് ഒഴുക്കു നിലച്ച അവസ്‌ഥയിലായത് ചിത്രസഹിതമാണ് റിപ്പോർട്ട് ചെയ്തിരുന്നത്. ഹൗസ്ബോട്ടുകൾക്കടക്കം തീരത്തോടു ചേർന്നുകിടക്കാൻ കഴിയാത്ത അവസ്‌ഥയിലായിരുന്നു മാലിന്യങ്ങൾ ഇവിടെ കിടന്നിരുന്നത്. ഇതുമൂലം ആഴം കുറയുകയും ചെയ്തിരുന്നു. പോളയുടെ ശല്യം കൂടാതെയായിരുന്നു പ്ലാസ്റ്റിക്ക് അടക്കമുള്ള മാലിന്യങ്ങളും തോടുകളേയും കായലിനെയും നശിപ്പിച്ചിരുന്നത്.