കെഎസ്എസ്പിയു രജതജൂബിലി സമ്മേളനം
തൊടുപുഴ: കേരളാ സ്റ്റേറ്റ് പെൻഷനേഴ്സ് യൂണിയൻ തൊടുപുഴ ടൗൺ ബ്ലോക്ക് രജതജൂബിലി സമ്മേളനം പെൻഷൻ ഭവനിൽ നടത്തി. തൊടുപുഴ മുനിസിപ്പൽ വികസന സ്റ്റാൻഡിംഗ് കമ്മിറ്റി ചെയർപേഴ്സൺ പ്രഫ. ജസി ആന്റണി ഉദ്ഘാടനം ചെയ്തു. സെക്രട്ടറി എൻ.പി. പ്രഭാകരൻനായർ പ്രവർത്തന റിപ്പോർട്ടും ട്രഷറർ കെ.ആർ. ദിവാകരൻ വരവുചെലവു കണക്കും ബജറ്റും അവതരിപ്പിച്ചു. കെ.എ. ചന്ദ്രശേഖരൻ അധ്യക്ഷത വഹിച്ചു.

മുണ്ടമറ്റം രാധാകൃഷ്ണൻനായർ സ്വാഗതവും കെ.എസ്. ശശിധരൻ നന്ദിയും പറഞ്ഞു. സംസ്‌ഥാന കമ്മിറ്റിയംഗം ഗോപാലകൃഷ്ണൻനായർ മുഖ്യപ്രഭാഷണം നടത്തി. ജില്ലാ സെക്രട്ടറി വി.കെ. മാണി, എൻ. ശ്രീകണ്ഠൻനായർ എന്നിവർ പ്രസംഗിച്ചു. ആദ്യകാല പ്രവർത്തകരായ എ. മുസ്തഫ, ജെ.എസ്. ഓലിക്കൻ, എൻ. ശിവരാമൻ, പി.സി. ജോർജ്, കെ.വി. അഗസ്റ്റിൻ, പി.ജെ. ജോസഫ്, സി. ചെല്ലപ്പൻ എന്നിവരെ പൊന്നാട അണിയിച്ച് ആദരിച്ചു.

സാഹിത്യ മത്സരത്തിൽ ശാന്താ ഗോപാലൻ, കെ.എ. ചന്ദ്രശേഖരൻ (കവിത), ജോസഫ് പട്ടാങ്കുളം, കെ.എ. ചന്ദ്രശേഖരൻ (കഥ), ടി.എം. അബ്ദുൾകരിം (ലേഖനം) എന്നിവർക്ക് സമ്മാനങ്ങൾ നൽകി. ജൈവ പച്ചക്കറി കൃഷിയിൽ മികച്ച പ്രകടനം കാഴ്ചവച്ച മുതലക്കോടം, കാരിക്കോട് യൂണിറ്റുകൾക്ക് കാഷ് അവാർഡ് നൽകി. ഭാരവാഹികളായി കെ.എ. ചന്ദ്രശേഖരൻ –പ്രസിഡന്റ്, എം.കെ. രാധാകൃഷ്ണൻനായർ, എം.ജെ. ഫിലോമിന –വൈസ് പ്രസിഡന്റുമാർ, കെ.ആർ. ദിവാകരൻ –സെക്രട്ടറി, എ.എൻ. ചന്ദ്രബാബു, മോളിക്കുട്ടി മാത്യു –ജോയിന്റ് സെക്രട്ടറിമാർ, വി.എസ്. ബാലകൃഷ്ണൻ –ട്രഷറർ എന്നിവരെ തെരഞ്ഞെടുത്തു.