മാർ മത്തായി കൊച്ചുപറമ്പിൽ പ്രകാശംപരത്തി: മാർ ജോസ് പുളിക്കൽ
നെടുങ്കണ്ടം: പ്രകാശമാകുന്ന ദൈവത്തെ ഹൃദയത്തിൽ സ്വീകരിച്ച് പ്രകാശം പകരുന്നവരാകണം ഓരോ മനുഷ്യനെന്നും അപ്രകാരം പ്രകാശം പരത്തിയ ഇടയനായിരുന്നു മാർ മത്തായി കൊച്ചുപറമ്പിൽ എന്നും കാഞ്ഞിരപള്ളി രൂപതാ സഹായ മെത്രാൻ മാർ ജോസ് പുളിക്കൽ.

സലേഷ്യൻ മിഷനറിയും ആസാമിലെ ഡിഫു രൂപതാ മെത്രാനുമായിരുന്ന മാർ മത്തായി കൊച്ചുപറമ്പിലിന്റെ 25–ാം ചരമ വാർഷിക ദിനത്തിൽ ചേമ്പളം സെന്റ് മേരീസ് ഇടവകയിൽ നടന്ന അനുസ്മരണാ സമ്മേളനത്തിൽ സന്ദേശം നൽകുകയായിരുന്നു അദ്ദേഹം. ഞാൻ ലോകത്തിന്റെ പ്രകാശമാകുന്നു എന്ന് അരുളിച്ചെയ്ത ക്രിസ്തുവിനെ ഹൃദയത്തിൽ സ്വീകരിക്കുന്ന ഓരോ ക്രൈസ്തവനും ഇപ്രകാരം ലോകത്തിനുപ്രകാശം പകരാൻ വിളിക്കപ്പെട്ടവരാണന്നും അവരായിരിക്കുന്ന ജീവിത സാഹചര്യങ്ങളിൽ അന്ധകാരത്തെ വിശുദ്ധിയുടെ പ്രകാശം കൊണ്ടു കീഴ്പ്പെടുത്താൻ ക്രൈസ്തവന് കടമയുണ്ടെന്നും അദ്ദേഹം സൂചിപ്പിച്ചു. തീർത്തും അപരിഷ്കൃതമായിരുന്ന ഉത്തരപൂർവ ഭാരതത്തിലെ ജനതകൾക്കിടയിൽ തീഷ്ണമായ മിഷൻ ചൈതന്യത്തോടെ ദൈവികപ്രഭ പകർന്ന മിഷനറിയായിരുന്നു മാർ മത്തായി കൊച്ചുപറമ്പിൽ.

സംസ്കാര ശൂന്യതയുടെയും അടിമത്തങ്ങളുടെയും തടവറയിലായിരുന്ന ജനതക്ക് അദ്ദേഹം എപ്പോഴും സമീപസ്‌ഥനായിരുന്നു. അടുക്കും ചിട്ടയുമുള്ള ജീവിത സംസ്കാരത്തിലേക്ക് അവരെ നയിച്ച അദ്ദേഹം വിദ്യാഭ്യാസം, ആതുര സേവനം, തുടങ്ങി എല്ലാ മേഖലകളിലും വിവിധ സേവനങ്ങൾ നടത്തി അവരെ മുഖ്യധാരയിലെത്തിക്കുവാൻ അക്ഷീണം പ്രയത്നിച്ചെന്നും മാർ ജോസ് പുളിക്കൽ അഭിപ്രായപ്പെട്ടു. കട്ടപ്പന ഫൊറോനാ വികാരി ഫാ. അഗസ്റ്റിൻ കാര്യപ്പുറത്ത്, ഫാ. ജോർജ് കാഞ്ഞമല സിഎംഐ, ഫാ. ജോസ് പറയനിലം, ഫാ. ജോണി പുതിയാപറമ്പിൽ, ജോൺസൺ കൊച്ചുപറമ്പിൽ, സിസ്റ്റർ.ഡോ. സൗമി എസ്ഡി, സിസ്റ്റർ നവ്യാ കൊച്ചുപറമ്പിൽ, ഇടവക വികാരി ഫാ. മാത്യു അറയ്ക്കപറമ്പിൽ, കുറുവച്ചൻ കൊച്ചുപറമ്പിൽ എന്നിവർ പ്രസംഗിച്ചു.

കാഞ്ഞിരപള്ളി രൂപതാ സഹായ മെത്രാൻ മാർ ജോസ് പുളിക്കലിന്റെ മുഖ്യകാർമ്മികത്വത്തിൽ നടന്ന കൃതജ്‌ഞതാ ബലിയിലും അനുസ്മരണ സമ്മേളനത്തിലും നിരവധി വൈദികരും സന്യസ്തരും ഉൾപ്പെടെ വൻ ജനാവലി പങ്കെടുത്തു.