ടൗൺഹാൾ നിർമിക്കാൻ സർക്കാർ അനുവദിച്ച ഭൂമിയിൽ പാർട്ടി ഓഫീസും കച്ചവട സ്‌ഥാപനങ്ങളും
ഒറ്റപ്പാലം: സ്വാതന്ത്ര്യസമര സേനാനിയുടെ സ്മാരകമായി ടൗൺഹാൾ നിർമിക്കാൻ സർക്കാർ അനുവദിച്ച ഭൂമിയിൽ പാർട്ടി ഓഫീസും കച്ചവടസ്‌ഥാപനങ്ങളും പ്രവർത്തിച്ചതുമായി ബന്ധപ്പെട്ട അന്വേഷണം മരവിപ്പിച്ചു. ഉന്നത ഇടപെടലുകളെ തുടർന്ന് അന്വേഷണം അവസാനിപ്പിച്ച സ്‌ഥിതിയാണ്.

തുടർനടപടികൾ അവസാനിപ്പിക്കാനാണ് റവന്യൂവകുപ്പിന് ലഭിച്ച നിർദേശമെന്ന് അറിയുന്നു. ഒറ്റപ്പാലത്ത് പി.വി.കുഞ്ഞുണ്ണി നായരുടെ സ്മരണാർഥം ലഭിച്ച ഭൂമിയിൽ പണിത ടൗൺഹാളാണ് സിപിഐ മണ്ഡലം കമ്മിറ്റി ഓഫീസും ഫർണീച്ചർ സ്‌ഥാപനവുമെല്ലാമായി രൂപാന്തരം പ്രാപിച്ചത്.കിഴക്കേ ഒറ്റപ്പാലത്താണ് മേൽപറഞ്ഞ സ്‌ഥാപനം പ്രവർത്തിച്ചിരുന്നത്.

ബന്ധപ്പെട്ട കാര്യങ്ങൾക്കല്ലാതെ മറ്റാവശ്യങ്ങൾക്ക് ഉപയോഗിക്കുന്നപക്ഷം സ്‌ഥലം തിരിച്ചുപിടിക്കാൻ സ്‌ഥലം അനുവദിക്കുമ്പോൾ തന്നെ വ്യവസ്‌ഥപ്പെടുത്തിയിരുന്നു.

1997–ലാണ് ഈസ്റ്റ് ഒറ്റപ്പാലം കിഴക്കേതോടിനു സമീപം പത്തുസെന്റ് സ്‌ഥലം ടൗൺഹാൾ നിർമിക്കുന്നതിനായി സൗജന്യമായി അനുവദിച്ച് സർക്കാർ ഉത്തരവിറക്കിയത്. ഒറ്റപ്പാലം–രണ്ട് അരിയൂർ തെക്കംമുറി ദേശത്ത് 76/31, 53/8 സർവേ നമ്പറുകളിലുള്ള ഭൂമിയാണിത്.

പി.വി.കുഞ്ഞുണ്ണി നായർ സ്മാരക ടൗൺഹാളിനുവേണ്ടി മാത്രമേ ഈ ഭൂമി ഉപയോഗിക്കാവുവെന്ന് ഉത്തരവിൽ വ്യക്‌തമാക്കിയിരുന്നു. എന്നാൽ വർഷങ്ങളായി ടൗൺഹാളിനായി അനുവദിച്ച ഇരുനില കെട്ടിടത്തിന്റെ താഴത്തെ നിലയിൽ സിപിഐ മണ്ഡലം കമ്മിറ്റി ഓഫീസും ഫർണീച്ചർ കടയുമാണ് പ്രവർത്തിച്ചിരുന്നത്. ഫർണീച്ചർ കടയുടമ വാടകയും പാർട്ടിക്ക് നല്കിയിരുന്നു. ജില്ലാ സ്വാതന്ത്ര്യസമര പോരാളി സംഘത്തിന്റെയും പി.വി.കുഞ്ഞുണ്ണിനായർ സ്മാരക നിർമാണസമിതിയുടെയും ശ്രമഫലമായാണ് ടൗൺഹാളിനു സർക്കാർ സൗജന്യമായി സ്‌ഥലം അനുവദിച്ചത്. പത്രവാർത്തകളെ തുടർന്ന് സംഭവം വിവാദമാകുകയും ജില്ലാ കളക്ടർ ഇതുസംബന്ധിച്ച ഫയൽ പരിശോധിച്ച അന്വേഷണത്തിനു ഉത്തരവിടുകയും ചെയ്തിരുന്നു.എന്നാൽ റവന്യൂവകുപ്പ് കൈകാര്യം ചെയ്യുന്ന സിപിഐ തന്നെ പ്രതിക്കൂട്ടിലായ വിഷയത്തിൽ നടത്തിവരുന്ന അന്വേഷണം എത്രമാത്രം ആത്മാർഥമാകുമെന്നാണ് ഉയരുന്ന ആശങ്ക.