പൊളിച്ചുനീക്കാൻ പഞ്ചായത്ത് നോട്ടീസ് നൽകിയ താത്കാലിക ഷെഡുകൾക്കു വൈദ്യുതി കണക്ഷൻ
വടക്കഞ്ചേരി: പഞ്ചായത്ത് അധികൃതർ പൊളിച്ചുനീക്കാൻ നോട്ടീസ് നൽകിയ ഷെഡുകളിലേക്ക് വൈദ്യുതി കണക്ഷൻ.

ടൗണിൽ ബസ് സ്റ്റാൻഡിനു പുറകിലായി അന്യസംസ്‌ഥാന തൊഴിലാളികളെ പാർപ്പിക്കുന്ന താൽക്കാലിക ഷെഡുകളിലാണ് സ്‌ഥിരം സംവിധാനംപോലെ ബോർഡ് സ്‌ഥാപിച്ച് വൈദ്യുതി കണക്്ഷൻ നൽകിയിട്ടുള്ളത്.

തൊഴിലാളികളെ ഒഴിപ്പിച്ച് അനധികൃതമായി നിർമിച്ച ഷെഡ് പൊളിച്ചുമാറ്റണമെന്ന് ആവശ്യപ്പെട്ട് വടക്കഞ്ചേരി പഞ്ചായത്ത് നോട്ടീസ് നൽകിയ സ്‌ഥലത്താണ് ഈ നടപടി നടക്കുന്നത്.നോട്ടീസ് നൽകി ദിവസങ്ങളേറെയായെങ്കിലും നെൽപാടത്ത് നിർമിച്ചിട്ടുള്ള ഷീറ്റുകൊണ്ടുള്ള ഷെഡുകളൊന്നും ഇവിടെനിന്നും നീക്കം ചെയ്തിട്ടില്ല. ആറുവരി ദേശീയപാത നിർമാണത്തിനായി അയൽസംസ്‌ഥാനങ്ങളിൽ നിന്നും കൊണ്ടുവന്നിട്ടുള്ള നൂറോളം തൊഴിലാളികളെയാണ് മാടുകളെ പാർപ്പിക്കുന്ന മട്ടിൽ ഇവിടെ താമസിപ്പിക്കുന്നത്.

ആറടിയോളം മാത്രം ഉയരത്തിൽ നിർമിച്ചിട്ടുള്ള ഷെഡിനുള്ളിൽ മലമൂത്രവിസർജനത്തിനുള്ള സൗകര്യങ്ങളൊന്നുമില്ല. മനുഷ്യവിസർജ്യംനിറഞ്ഞ് പരിസരവാസികൾക്ക് മാരകമായ പകർച്ചവ്യാധികൾ ഉണ്ടാകുന്നതിനുള്ള സാധ്യതകളും ഏറെയുണ്ട്.

പരിസരവാസികളുടെ പരാതി തുടർന്ന് വടക്കഞ്ചേരി ഹെൽത്ത് ഇൻസ്പെക്ടറും പഞ്ചായത്തും സ്‌ഥലത്ത് പരിശോധന നടത്തിയ റിപ്പോർട്ടിന്മേലായിരുന്നു ഷെഡുകൾ പൊളിച്ചുനീക്കാൻ പഞ്ചായത്ത് നോട്ടീസ് നൽകിയിട്ടുള്ളത്. അനുമതിയില്ലാതെ നിർമിച്ചിട്ടുള്ള ഷെഡുകൾ കേരള പഞ്ചായത്ത് കെട്ടിട നിർമാണചട്ടപ്രകാരം നിയമവിരുദ്ധമാണെന്നും കണ്ടെത്തിയിരുന്നു. അതേസമയം പേരിനു സെപ്റ്റിക് ടാങ്കുകൾ നിർമിച്ച് അനധികൃത നിർമാണപ്രവർത്തനങ്ങളും നെൽപാടത്ത് നടക്കുന്നതായി പരാതിയുണ്ട്. ഷെഡുകൾ പൊളിച്ചുനീക്കാൻ നോട്ടീസ് നൽകിയതിനു പിന്നാലെയാണ് സെപ്റ്റിക് ടാങ്ക് നിർമാണം നടക്കുന്നത്.മഴപെയ്ത് വെള്ളമായാൽ അതിനൊപ്പം മനുഷ്യവിസർജ്യവും ഇവിടെ വ്യാപകമാകും. ബസ് സ്റ്റാൻഡ് റോഡിന്റെ വശങ്ങൾ മലിനമാകുന്നതിനൊപ്പം ഈ മാലിന്യമെല്ലാം പിന്നീട് വടക്കഞ്ചേരി ജൈവപാടശേഖരത്തിലാണ് എത്തുക. ടൗണിലെ മലിനജലം മുഴുവൻ പാടശേഖരത്തിലെത്തുന്നതിനുപുറമെയാണ് ഈ വർഷം പുതിയമാലിന്യംകൂടി ഉണ്ടാകുന്നത്. ഇക്കാര്യത്തിൽ ആരോഗ്യവകുപ്പ് ഉണർന്നു പ്രവർത്തിക്കേണ്ടതായ സാഹചര്യമുണ്ടായിട്ടും ആരോഗ്യവകുപ്പും പഞ്ചായത്തുംനടപടി വേഗത്തിലാക്കുന്നില്ലെന്ന ആക്ഷേപം ശക്‌തമാണ്. ഷെഡുകളിലെ കുഴികളിൽ നിന്നുള്ള മനുഷ്യവിസർജ്യം നിറഞ്ഞ് കവിഞ്ഞ് പരിസരത്തെ കിണറുകളും മലിനമായി വെള്ളം ഉപയോഗിക്കാനാവാത്ത സ്‌ഥിതിയായിരിക്കുകയാണ്.അതേസമയം ഷെഡുകളിലേക്കുള്ള വൈദ്യുതി കണക്ഷൻ താൽക്കാലികമാണെന്നും അത് എപ്പോൾ വേണമെങ്കിലും വിച്ഛേദിക്കാവുന്നതാണെന്നും കെഎസ്ഇബി വടക്കഞ്ചേരി സെക്ഷൻ എഇ പറഞ്ഞു.