മംഗലംപുഴയിലൂടെ വെള്ളം തുറന്നുവിടണമെന്നു ജനങ്ങൾ
Thursday, April 20, 2017 11:08 AM IST
വടക്കഞ്ചേരി: നീരൊഴുക്ക് നിലച്ച മംഗലംപുഴയിലൂടെ മംഗലംഡാമിൽ നിന്നും വെള്ളം തുറന്നുവിട്ട് പ്രദേശങ്ങളിലെ കുടിവെള്ളക്ഷാമത്തിന് പരിഹാരം കാണണമെന്ന ആവശ്യം ശക്‌തം.

വെള്ളമില്ലാതെ മംഗലം പുഴ പല ഭാഗത്തും വറചട്ടിപോലെ ഉണങ്ങിവരണ്ടു. മംഗലംപുഴ ഇത്രയും വരണ്ടുണങ്ങുമെന്ന്ആദ്യമാണെന്നാണ് കർഷകർ പറയുന്നത്. കഴിഞ്ഞ കാലവർഷത്തിൽ മഴ നന്നേകുറവായിരുന്നതിനാൽ മംഗലംപുഴ കവിഞ്ഞൊഴുകുന്ന സ്‌ഥിതിയുണ്ടായില്ല. ഇത് വരൾച്ച രൂക്ഷമാക്കി. കൂടാതെ പുഴയിലെ തടയിണകളെല്ലാം തകർന്നുകിടക്കുകയാണ്.

കർഷകർ സംരക്ഷിക്കുന്ന ഏതാനും ചെറിയ ചെക്ക്ഡാമുകൾ മാത്രമാണ് നില നിൽക്കുന്നത്. ഇതിലും ഇക്കുറിപൂർണമായി വെള്ളംവറ്റി. മംഗലംപുഴ വറ്റിവരണ്ടതോടെ പുഴയുടെ ഇരുഭാഗങ്ങളിലെ കിണറുകളും മറ്റു ജലസ്രോതസുകളും വറ്റിയിട്ടുണ്ട്. മംഗലംഡാമിൽ വേനലിലേക്കായി കരുതിയിട്ടുള്ള വെള്ളം പുഴയിലൂടെയും കനാലുകളിലൂടെയും തുറന്നുവിട്ടാൽ വെള്ളത്തിനായി നെട്ടോട്ടമോടുന്ന ജനത്തിനത് വലിയ ആശ്വാസമാകുമെന്ന് ചൂണ്ടിക്കാട്ടുന്നു.