കുവൈത്ത് സിറ്റി: കുവൈത്തിൽ പുതിയ മന്ത്രിസഭ അധികാരമേറ്റു. മന്ത്രിമാരുടെ പേരുവിവരങ്ങൾ പ്രധാനമന്ത്രി ശൈഖ് ജാബിർ അൽ മുബാറക് അൽ ഹമദ് അസബാഹ് അമീർ ശൈഖ് സബാഹ് അൽ അഹ്മദ് അൽ ജാബിർ അസബാഹിനെ സന്ദർശിച്ചു കത്ത് കൈമാറി.
കഴിഞ്ഞ മന്ത്രിസഭയിൽ സഹമന്ത്രിയായിരുന്ന ശൈഖ് നാസർ സബാഹ് അൽ അഹ്മദ് അസബാഹ് ഒന്നാം ഉപപ്രധാനമന്ത്രിയും പ്രതിരോധ മന്ത്രിയുമായി. പുതുമുഖങ്ങൾക്ക് കൂടുതൽ അവസരം നൽകിയതിന് പുറമെ വനിത പ്രാതിനിധ്യവും പുതിയ മന്ത്രിസഭയിൽ വർധിച്ചു. വിവധ ആരോപണങ്ങളുടെ പേരിൽ കഴിഞ്ഞ സർക്കാരിൽ കുറ്റവിചാരണ ഭീഷണി നേരിട്ട മുഹമ്മദ് അബ്ദുള്ള, ജമാൽ അൽ ഹർബി, അബ്ദുറഹ്മാൻ അൽ മുതവ്വ, ഇസ്ലാം അൽ മർസൂഖ്, മുഹമ്മദ് ഫാരിസ് എന്നിവരെ മന്ത്രിസ്ഥാനത്ത് നിന്നും മാറ്റി നിർത്തി.
ഉപപ്രധാനമന്ത്രിയും പ്രതിരോധ മന്ത്രിയുമായിരുന്ന ശൈഖ് മുഹമ്മദ് ഖാലിദ് അൽ ഹമദ് അൽ സബാഹിന് പുതിയ സർക്കാരിൽ പ്രാതിനിധ്യം ലഭിക്കാതിരുന്നത് അവരിലും ആശ്ചര്യമുണ്ടാക്കി. തിങ്കളാഴ്ച ഉച്ചയ്ക്ക് ബയാൻ പാലസിൽ പ്രധാനമന്ത്രി അമീറുമായി കൂടിക്കാഴ്ച നടത്തി. സർക്കാരിനെ നയിക്കാനുള്ള ചുമതല ഏൽപ്പിക്കുകവഴി തന്നോടുള്ള വിശ്വാസ്യത വീണ്ടും ആവർത്തിച്ച അമീറിന് പ്രധാനമന്ത്രി നന്ദി പറഞ്ഞു. രാജ്യത്തിന്റെയും രാജ്യനിവാസികളുടെയും ഗുണത്തിനുവേണ്ടി ആത്മാർഥമായി പ്രവർത്തിക്കാൻ പുതിയ മന്ത്രിസഭക്ക് സാധിക്കട്ടെയെന്ന് അമീർ ആശംസിച്ചു.
മന്ത്രിമാരും അവരുടെ വകുപ്പുകളും
ശൈഖ് ജാബിർ അൽ മുബാറക് അൽ ഹമദ് അസ്സബാഹ് : പ്രധാനമന്ത്രി
ശൈഖ് നാസർ സബാഹ് അൽ അഹമ്മദ് അൽ സബാഹ് : ഒന്നാം ഉപപ്രധാനമന്ത്രി, പ്രതിരോധം
ശൈഖ് ഖാലിദ് അൽ ജർറാഹ് അൽ സബാഹ് : ഉപപ്രധാനമന്ത്രി , ആഭ്യന്തരം
ശൈഖ് സബാഹ് ഖാലിദ് അൽ ഹമദ് അൽ സബാഹ് : ഉപപ്രധാനമന്ത്രി, വിദേശകാര്യം
അനസ് അൽ സാലിഹ് : ഉപപ്രധാനമന്ത്രി ,മന്ത്രിസഭാകാര്യം
നായിഫ് അൽ ഹജ്റൂഫ് : ധനകാര്യം
ഹിന്ദ് അസ്സബീഹ് : തൊഴിൽ , സാമൂഹിക ക്ഷേമം, സാന്പത്തികം
ഹുസ്സാം അബ്ദുള്ള അൽ റൂമി : പൊതുമരാമത്ത് , മുൻസിപ്പൽ
ആദിൽ മുസാഇദ അൽ ഖറാഫി : പാർലിമെന്റ്കാര്യം
ഫഹദ് മുഹമ്മദ് അൽ അഫാനി : ഒൗഖാഫ് , നീതിന്യായം
ഖാലിദ് അൽ റൌദാൻ : വാണിജ്യം , യുവജനകാര്യം
മുഹമ്മദ് നാസർ അൽ ജബ്റി : വാർത്താവിനിമയം
ഡോ:ബാസിൽ ഹമൂദ് ഹമദ് അൽ സബാഹ് : ആരോഗ്യം
ബകീത് ശിബീബ് അൽ റഷീദി : ഓയിൽ , ജലം, വൈദ്യുതി
ജിനാൻ മുഹസിൻ റമദാൻ : പാർപ്പിടം , സേവനകാര്യം
ഹമീദ് മുഹമ്മദ് അൽ കാസ്മി : വിദ്യാഭ്യാസം
റിപ്പോർട്ട്: സലിം കോട്ടയിൽ