ദമ്മാം: മലപ്പുറം ജില്ലാ കെഎംസിസിയുടെ സീതി ഹാജി ഗോൾഡൻ ട്രോഫിക്കും, ദാറുസിഹാ കാഷ് അവാർഡിനും, എയർ ഇന്ത്യാ റണേഴ്സ് ട്രോഫിക്കും കാഷ് അവാർഡിനും വേണ്ടി ദാദാബായ് ട്രാവൽസിന്‍റെ സഹകരണത്തോടെ ദമ്മാം ഇന്ത്യൻ ഫുട്ബോൾ അസോസിയേഷനുമായി ചേർന്ന് കൊണ്ട്നടത്തപ്പെടുന്ന പി.എ. മുഹമ്മദ് ഹാജി മെമ്മോറിയൽ ഫുട്ബോൾ ടൂർണമെന്‍റിന്‍റെ കലാശപ്പോരാട്ടത്തിൽ ഐബീ ടെക് എൽഎഫ്സി റിയാദ് റോയൽസ് ട്രാവൽസ് ബദർ എഫ്സിയുമായി മാറ്റുരയ്ക്കും.
സൈഹാത്തിലെ അൽഖലീജ് സ്റ്റേഡിയത്തിൽ നടന്ന ആവേശകരമായ സെമി ഫൈനൽ പോരാട്ടങ്ങളിൽ ഐബീ ടെക് എൽഎഫ്സി റിയാദ്, സെക്യൂർ ടെക്നോളജി മാഡ്രിഡ് എഫ്സിയേയും, റോയൽ ട്രാവൽസ് ബദർ എഫ്സി, യുഎസ്ജി. ബോറൽ യുഎഫ്സിയേയും ടൈബ്രേക്കറിൽ മറികടന്നു. തുല്യ ശക്തികൾ തമ്മിൽ ഏറ്റുമുട്ടിയ ആദ്യ സെമിഫൈനലിന്‍റെ നിശ്ചിത സമയത്ത് സെക്യൂർ ടെക്നോളജി മാഡ്രിഡ് എഫ്സിക്കും, ഐബീ ടെക് എൽഎഫ്സിക്കും ഗോളുകൾ സ്കോർ ചെയ്യാൻ കഴിഞ്ഞില്ല. തുടർന്ന് പെനാൽറ്റി ഷൂട്ടൗട്ടിൽ ഒന്നിനെതിരെ മൂന്ന് ഗോളുകൾക്കായിരുന്നു ഐബി ടെക് എൽഎഫ്സിയുടെ വിജയം. ഐബീ ടെക് എൽഎഫ്സിയുടെ ഗോൾകീപ്പർ മുബഷിർ മാൻ ഓഫ് ദ മാച്ചായി തെരഞ്ഞെടുക്കപ്പെട്ടു.
അൽഖലീജ് സ്റ്റേഡിയത്തെ അക്ഷരാർത്ഥത്തിൽ ത്രസിപ്പിച്ച രണ്ടാം സെമി ഫൈനൽ പോരാട്ടത്തിൽ കിഴക്കൻ പ്രവിശ്യയിലെ താര പോരാളികളായ റോയൽ ട്രാവൽസ് ബദർ എഫ്സിയും, നിലവിലെ എലവൻസ് ചാംബ്യന്മാരായ യുഎസ്ജി. ബോറൽ യുഎഫ്സിയും , ആക്രമണ പ്രത്യാക്രമണ ഫുട്ബോളിന്റെ മഹനീയ മുഹൂർത്തങ്ങൾ കാണികൾക്ക് സമ്മാനിച്ച് നിശ്ചിത സമയത്ത് മൂന്നുവീതം ഗോളുകൾ നേടി സമനില പാലിച്ചു. തുടർന്ന് ടൈബ്രേക്കറിൽ രണ്ടിനെതിരെ നാല് ഗോളുകൾക്കായിരുന്നു ബദർ എഫ്സിയുടെ വിജയം. ടൈബ്രേക്കറിൽ യുഎഫ്സിയുടെ നിർണായക കിക്കുകൾ രക്ഷപ്പെടുത്തിയ ബദറിന്‍റെ ഗോൾകീപ്പർ സാദിഖ് മാൻ ഓഫ് ദ മാച്ചായി തെരഞ്ഞെടുക്കപ്പെട്ടു.
അന്നേ ദിവസം നടന്ന കഐംസിസി ടീമുകൾക്ക് വേണ്ടിയുള്ള കളികളിൽ കാസർഗോഡ് ജില്ല കെഎംസിസിയെ തോൽപിച്ചു പാലക്കാട് ജില്ല കെഎംസിസിയും, കൊണ്ടോട്ടി മണ്ഡലം കെഎംസിസിയെ തോൽപിച്ചു വേങ്ങര മണ്ഡലം കെഎംസിസിയും ഫൈനലിൽ പ്രവേശിച്ചു. ഫൈനൽ മത്സരങ്ങൾ അടുത്ത വെള്ളിയാഴ്ച നടക്കുന്നതാണ്. നേരത്തേ ഇൻറർനാഷണൽ ഇന്ത്യൻ സ്കൂൾ മുൻ ചെയർമാൻ അബ്ദുൾ വാരിസ്, ദമ്മാം ശരീഅത്ത് കോടതി പരിഭാഷകൻ മുഹമ്മദ് നജാത്തി, മുസ്ലിം ലീഗ് നേതാവ് സയ്യിദ് അഹമ്മദ് ബാഫഖിതങ്ങൾ, എംഎസ്എഫ് മുൻ സംസ്ഥാന ട്രഷറർ ഷാനവാസ് വെട്ടത്തൂർ, കുറ്റിപ്പുറം ബ്ലോക്ക് മെന്പർ പരീത് കാരേക്കാട്, ആലിക്കുട്ടി ഒളവട്ടൂർ, തുടങ്ങിയവർ ട്രോഫികൾ നൽകി.
റിപ്പോർട്ട്: അനിൽ കുറിച്ചിമുട്ടം