മസ്കറ്റ്: ഒമാൻ സീറോ മലങ്കര കത്തോലിക്കാ കൂട്ടായ്മയുടെ നേതൃത്വത്തിൽ റുവി സെന്‍റ്സ് പീറ്റർ ആൻഡ് പോൾ പള്ളി, ഗാല ഹോളി സ്പിരിറ്റ്, സലാല സെന്‍റ് ഫ്രാൻസിസ് സേവ്യർ പള്ളി എന്നിവിടങ്ങളിൽ മാർച്ച് 23 വെള്ളി തുടങ്ങി 31 വരെ സീറോ മലങ്കര ക്രമത്തിൽ തിരുക്കർമ്മങ്ങൾ നടക്കപ്പെടും.
ശുശ്രൂഷകൾക്ക് ഡയറക്ടർ ഫാ. തോമസ് ജോണ് മുത്തൻറെത്ത് നേതൃത്വം നൽകും. വെള്ളിയാഴ്ച രാവിലെ എട്ടിന് സലാല ദേവാലയത്തിൽ നടക്കുന്ന ഓശാന, നാൽപ്പതാം വെള്ളി ശുശ്രൂഷകളോടെ വിശുദ്ധവാര തിരുക്കർമ്മങ്ങൾക്ക് തുടക്കമാകും. കുരുത്തോല വെഞ്ചരിപ്പ്, പ്രദക്ഷിണം, ആഘോഷമായ വിശുദ്ധ കുർബാന എന്നിവ നടക്കും.
ശനിയാഴ്ച രാത്രി ഏഴിന് ഗാല മെയിൽ ഹാളിൽ ഓശാന ശുശ്രൂഷകൾ, കുരുത്തോല വെഞ്ചരിപ്പ്, പ്രദക്ഷിണം തുടർന്ന് ആഘോഷമായ വിശുദ്ധ കുർബാന എന്നിവ നടക്കും. 26, 27 തീയതികളിൽ രാത്രി എട്ടിന് ഹാശായുടെ സന്ധ്യാനമസ്കാരം, ഗാന ശുശ്രൂഷ, ധ്യാന പ്രസംഗം എന്നിവ റുവി മെയിൻ ഹാളിൽ നടക്കും. പെസഹാ ശുശ്രൂഷകൾ 28 ബുധൻ രാത്രി 7.30 ന് ഗാല മെയിൻ ഹാളിലായിരിക്കും. വിശുദ്ധ കുർബാന, അപ്പം മുറിക്കൽ ശുശ്രൂഷ, പ്രത്യേക പ്രാർത്ഥനകൾ എന്നിവ നടക്കും.
ദുഃഖവെള്ളിയാഴ്ചത്തെ തിരുക്കർമ്മങ്ങൾ 30ന് രാവിലെ 7.30 ന് റുവി മെയിൻ ഹാളിൽ ആരംഭിക്കും. പ്രദക്ഷിണം, സ്ലീബാ വാഴ്ച, കുരിശ് കുന്പിടൽ, കബറടക്ക ശുശ്രൂഷകൾ എന്നിവയെ തുടർന്ന് നേർച്ച കഞ്ഞി വിതരണം. അന്നേ ദിവസം സലാലയിൽ കാറ്റക്കിസം ഹാളിൽ രാവിലെ 8 മുതൽ 2.30 വരെ ശുശ്രൂഷകൾ ഉണ്ടായിരിക്കും.
ഈസ്റ്റർ തിരുക്കർമ്മങ്ങൾ 31 ശനിയാഴ്ച വൈകുന്നേരം 4.30 ന് ഗാല മെയിൻ ഹാളിൽ ആരംഭിക്കും. സന്ധ്യാ പ്രാർത്ഥന, പ്രദക്ഷിണം, സ്ലീബാ വാഴ്ച, വിശുദ്ധ കുർബാനയോടെ ശുശ്രൂഷകൾക്ക് സമാപനമാകും. കൂട്ടായ്മയുടെ നേതൃത്വത്തിൽ നടത്തുന്ന ഈസ്റ്റർ ആഘോഷങ്ങൾ ഏപ്രിൽ ഏഴിന് നടക്കുമെന്ന് ഡയറക്ടർ ഫാ.തോമസ് ജോണ് മുത്തൻറെത്ത്, പ്രസിഡന്‍റ് ഡോ. ജോണ് ഫിലിപ്സ് മാത്യു, ജനറൽ സെക്രട്ടറി ജോസഫ് മാത്യു, ട്രഷറർ റോണാ തോമസ് എന്നിവർ അറിയിച്ചു.
റിപ്പോർട്ട്: സേവ്യർ കാവാലം