ദമാം: ഇന്ത്യൻ സ്വാതന്ത്ര്യസമര പോരാളികളുടെ ഒളിയിടങ്ങൾ ഒറ്റുകൊടുത്തു ഇന്ത്യക്കാരുടെ അഭിമാനത്തിന് ക്ഷതം വരുത്തിയ ഇന്ത്യൻ സ്വാതന്ത്ര്യ സമര ചരിത്രത്തിൽ ഏതൊരു പങ്കും വഹിക്കാത്ത ആർഎസ്എസുകാരും സംഘ് പരിവാർ സംഘടനകളും ഇന്ത്യൻ നാഷണൽ കോണ്ഗ്രസിനെ ദേശീയത പഠിപ്പിക്കാൻ വരുന്നത് വിരോധാഭാസമാണെന്ന് യൂത്ത് കോണ്ഗ്രസ് സംസ്ഥാന ഉപാധ്യക്ഷൻ സി.ആർ മഹേഷ് പറഞ്ഞു.
ഇന്ന് രാജ്യം ഭരിക്കുന്ന ബിജെപിയും സംഘ് പരിവാർ സംഘടനകളും മുന്നോട്ട് വയ്ക്കുന്ന തീവ്ര ദേശീയത കാപട്യം നിറഞ്ഞതാണ്. ഇന്ത്യൻ നാഷണൽ കോണ്ഗ്രസുൾപ്പെടെ ഇന്ത്യയിലെ മുഴുവൻ ജനാധിപത്യ മതേതര ശക്തികൾക്കും ഇവർ മുന്നോട്ട് വയ്ക്കുന്ന മതാധിഷ്ഠിതമായ കപട ദേശീയതയെ അംഗീകരിക്കാൻ കഴിയില്ലെന്നും അദ്ദേഹം അഭിപ്രായപ്പെട്ടു. ഹ്രസ്വ സന്ദർശനാർത്ഥം സൗദി അറേബ്യയിലെത്തിയ അദ്ദേഹം ഒഐസിസി ദമാം റീജണൽ കമ്മിറ്റിയും അൽ ഖോബാർ ഏരിയാ കമ്മിറ്റിയും സംയുക്തമായി ദമാമിൽ നൽകിയ സ്വീകരണ പരിപാടിയിൽ സംസാരിക്കവെയാണ് ആർഎസ് എസിന്റെ തീവ്ര ദേശീയതക്കെതിരെ രൂക്ഷമായി പ്രതികരിച്ചത്.
ഒഐസിസി അൽ ഖോബാർ ഏരിയ കമ്മിറ്റി പ്രസിഡന്റ് എ.കെ.സജൂബ് അധ്യക്ഷത വഹിച്ചു. ദമാം റീജണൽ കമ്മിറ്റി പ്രസിഡന്റ്ബിജു കല്ലുമല സ്വീകരണ സമ്മേളനം ഉദ്ഘാടനം ചെയ്തു.
ഹ്രസ്വ സന്ദർശനാർത്ഥം സൗദി അറേബ്യയിലെത്തിയ കർഷക കോണ്ഗ്രസ് മലപ്പുറം ജില്ലാ കമ്മിറ്റി വൈസ് പ്രസിഡന്റ് എൻ.പി. കുഞ്ഞുമോനും സമ്മേളനത്തിൽ സ്വീകരണം നൽകി. ദീർഘ കാലത്തെ പ്രവാസ ജീവിതം മതിയാക്കി നാട്ടിലേക്ക് മടങ്ങുന്ന ഒഐസിസി സൗദി നാഷണൽ കമ്മിറ്റി സെക്രട്ടറിയായിരുന്ന ജലാൽ മൈനാഗപ്പള്ളിക്കും വേദിയിൽ യാത്രയയപ്പ് നൽകി. നാഷണൽ കമ്മിറ്റി പ്രസിഡന്റ് പി.എം നജീബ്, മൻസൂർ പള്ളൂർ എന്നിവർ ആശംസാ പ്രസംഗം നടത്തി. ഇ കെ സലിം, സക്കീർ പറന്പിൽ, ശിഹാബ് കൊട്ടുകാട്, ശംസുകൊല്ലം, രമേശ് പാലക്കാട്, ചന്ദ്രമോഹൻ, സുരേഷ് കുന്നം, ശിഹാബ് കായംകുളം, മമ്മൂട്ടി പട്ടാന്പി, സക്കീർ ഹുസൈൻ, ഷിബു ബഷീർ, സുമേഷ് കാട്ടിൽ, നബീൽ നെയ്തല്ലൂർ, രാധികാ ശ്യാം പ്രകാശ്, ഡോ.സിന്ധു ബിനു എന്നിവർ സംബന്ധിച്ചു. സിറാജ് പുറക്കാട്, ഹനീഫ് റാവുത്തർ, റഫീഖ് കൂട്ടിലങ്ങാടി, നിസാർ മാന്നാർ, ജി പി രാജേഷ്, അബ്ബാസ് തറയിൽ, ഹമീദ് കണിച്ചാട്ടിൽ എന്നിവർ നേതൃത്വം നൽകി.
റിപ്പോർട്ട്: അനിൽ കുറിച്ചിമുട്ടം