ബ്രിസ്റ്റോൾ: നവംബർ 10ന് നടക്കുന്ന ഗ്രേറ്റ് ബ്രിട്ടൻ സീറോ മലബാർ രൂപതാതല മത്സരങ്ങൾക്കു മുന്നോടിയായി വിവിധ റീജണുകളിൽ നടക്കുന്ന ബൈബിൾ കലോത്സവ മത്സരങ്ങളുടെ ഒരുക്കങ്ങൾ തകൃതിയായി നടക്കുന്നു. രൂപതയുടെ എട്ടു റീജണുകളിലും മത്സരങ്ങൾ നടക്കുന്ന തീയതിയും സ്ഥലവും പ്രസിദ്ധീകരിച്ചു കഴിഞ്ഞു. ഗ്രേറ്റ് ബ്രിട്ടൻ രൂപതാധ്യക്ഷൻ മാർ ജോസഫ് സ്രാന്പിക്കൽ രക്ഷാധികാരിയും റവ. ഫാ. പോൾ വെട്ടിക്കാട്ട് സിഎസ്ടി ഡയറക്ടറും ജോജി മാത്യു ചീഫ് കോർഡിനേറ്ററുമായാണ് രൂപതാതല സംഘാടനം നിയന്ത്രിക്കുന്നത്.
ഗ്ലോസ്ഗോയിൽ സെപ്റ്റംബർ 29നും മാഞ്ചസ്റ്ററിൽ ഒക്ടോബർ 28നും ബ്രിസ്റ്റോൾ-കാർഡിഫിൽ ഒക്ടോബർ 6നും കവൻട്രിയിൽ സെപ്റ്റംബർ 29നും സൗത്താംപ്റ്റണിൽ സെപ്റ്റംബർ 29നും ലണ്ടൻ, കേംബ്രിഡ്ജ് എന്നിവിടങ്ങളിലും സെപ്റ്റംബർ 29നും പ്രസ്റ്റണിൽ ഒക്ടോബർ 13നും റീജണൽതല മത്സരങ്ങൾ നടക്കും. റവ. ഫാ. ജോസഫ് വെന്പാടുന്തറ, റവ. ഫാ. ബിജു കുന്നയ്ക്കാട്ട്, റവ. ഫാ. ജോയി വയലിൽ സിഎസ്ടി, റവ. ഫാ. സെബാസ്റ്റ്യൻ നാമറ്റത്തിൽ, റവ. ഫാ. ടോമി ചിറയ്ക്കൽ മണവാളൻ, റവ. ഫാ. സെബാസ്റ്റ്യൻ ചാമക്കാല, റവ. ഫാ. ഫിലിപ്പ് പന്തമാക്കൽ, റവ. സജി തോട്ടത്തിൽ എന്നിവരുടെ നേതൃത്വത്തിൽ വിവിധ റീജണുകളിൽ കമ്മിറ്റികൾ രൂപീകരിച്ചു റീജണൽതല മത്സരങ്ങൾക്കുള്ള ക്രമീകരണങ്ങൾ നടത്തിക്കൊണ്ടിരിക്കുന്നു.
ബൈബിൾ അധിഷ്ഠിതമായ കഥ, കവിത, ചിത്രരചന, സംഗീതം, നൃത്തം, ഉപകരണസംഗീതം, ക്വിസ്, പ്രസംഗം തുടങ്ങി വിവിധ ഇനങ്ങളിലായി എല്ലാ പ്രായപരിധിയിലുള്ളവർക്കും പങ്കെടുക്കാവുന്ന രീതിയിലാണ് മത്സരങ്ങൾ ക്രമീകരിച്ചിരിക്കുന്നത്. യൂറോപ്പിലെ തന്നെ ഏറ്റവും വലിയ ബൈബിൾ അധിഷ്ഠിത കലാമേള എന്ന വ്യാതിയുള്ള ഈ ബൈബിൾ കലോത്സവത്തിൽ പങ്കെടുക്കുവാൻ വിവിധ വി. കുർബാന കേന്ദ്രങ്ങൾ ഒരുക്കൾ പുരോഗമിച്ചു കൊണ്ടിരിക്കുന്നു.
റിപ്പോർട്ട്: ഫാ. ബിജു കുന്നയ്ക്കാട്ട്