ടാന്‍സാനിയയില്‍ ഓണം ആഘോഷിച്ചു
Tuesday, September 1, 2015 5:56 AM IST
ദാര്‍എസ് സലാം: കലാമണ്ഡലം ടാന്‍സാനിയയുടെ നേതൃത്വത്തില്‍ ഓഗസ്റ് 30 നു പട്ടേല്‍ സമാജ് ഹാളില്‍, ദാര്‍ എസ് സലാമിലെ മലയാളികള്‍ അതിവിപുലമായ രീതിയില്‍ ഓണം ആഘോഷിച്ചു.

രാവിലെ അഞ്ചിനു രാജിത മുരളിയുടെ നേതൃത്വത്തില്‍ പൂക്കളം ഒരുക്കി. ചെയര്‍മാന്‍ മോഹന്‍ദാസ് ഓണാശംസകള്‍ നേര്‍ന്നു. തുടര്‍ന്നു അല്‍ബിയും രാജിത മുരളിയും മഹാബലിയും മുത്തശിയുമായി വേഷമിട്ട് ഓണാഘോഷങ്ങള്‍ക്ക്ു ചുക്കാന്‍ പിടിച്ചു.

ചിങ്ങമാസവും ടപ് ടപ് ജാനകിയുമായി കുഞ്ഞുങ്ങള്‍ വേദി കൈയടക്കിയപ്പോള്‍ അഭിനവും ടീമും പ്രേമം ഡാന്‍സുമായാണു കാണികളെ കൈയിലെടുത്തത്. നിത്യാ സതീഷിന്റെ നേതൃത്വത്തില്‍ ടാന്‍സാനിയായിലെ മലയാളിമങ്കമാരുടെ കൈകൊട്ടിക്കളി അരങ്ങേറി. നവീന്‍, അഭിനവ് എന്നിവരുടെ ഗാനങ്ങള്‍ പരിപാടിക്ക് മിഴിവേകി. സജീവ് കുമാര്‍ സംവിധാനം നിര്‍വഹിച്ച 'ഓലപീപ്പീ' എന്ന സംഗീത നാടകം, കേരളത്തിലെ പഴമയുടെ ഓര്‍മകളിലേക്കു കൂട്ടിക്കൊണ്ടുപോയി. ഉച്ചയ്ക്ക് സുശീലാ സതീഷിന്റെ നേതൃത്വത്തില്‍ ഒരുക്കിയ വിഭവസമൃദ്ധമായ ഓണസദ്യയും ഓണാഘോഷത്തിന്റെ ഭാഗമായി നടന്നു.

ഹൈക്കമ്മീഷണര്‍ ഓഫ് ഇന്ത്യ ടു ടാന്‍സാനിയ സന്ദീപ് ആര്യ മുഖ്യാതിഥിയായിരുന്നു.

റിപ്പോര്‍ട്ട്: മനോജ്കുമാര്‍
Copyright @ 2022 , Rashtra Deepika Ltd.