യുക്മ പബ്ലിക് റിലേഷൻസ് ടീമിന് നാലു പ്രതിനിധികൾ
Saturday, February 18, 2017 7:43 AM IST
ലണ്ടൻ: യുകെ മലയാളി അസോസിയേഷനുകളുടെ ദേശീയ സംഘടനയായ യുക്മ നാലുപേരടങ്ങുന്ന പുതിയ പിആർഒ ടീമിനെ തെരഞ്ഞെടുത്തു. യുക്മയുടെ കഴിഞ്ഞ അഞ്ച് ഭരണസമിതികളിലും ഒരാൾ മാത്രമായിരുന്നു പിആർഒ ആയി പ്രവർത്തിച്ചിരുന്നുള്ളു. യുക്മയുടെ വിപുലീകരണവുമായി ബന്ധപ്പെട്ടും പ്രവർത്തന മേഖലകളെ സംബന്ധിച്ചും വിവിധ പരിപാടികളുടെ റിപ്പോർട്ടുകൾ ജനങ്ങളിലേക്ക് എത്തിക്കുവാൻ യുക്മ സഹയാത്രികരായ മാധ്യമങ്ങൾക്ക് വാർത്തകൾ എത്തിച്ചു കൊടുക്കേണ്ടത് പ്രസ്ഥാനത്തിന്‍റെ കർത്തവ്യമാണെന്ന തിരിച്ചറിവിൽ നിന്നുമാണ് നാല് പിആർഒ മാരുടെ ടീമിനെ നിയമിച്ചതെന്ന് യുക്മ ദേശീയ നേതൃത്വം വ്യക്തമാക്കി.

കഴിഞ്ഞ ഭരണ സമിതിയിലെ ദേശീയ ജനറൽ സെക്രെട്ടറി സജീഷ് ടോം, പ്രഥമ ദേശീയ ജനറൽ സെക്രട്ടറിയും പിആർഒയുമായിരുന്ന ബാല സജീവ് കുമാർ, മുൻ പിആർഒ ആയിരുന്ന അനീഷ് ജോണ്‍, യോർക് ഷെയർ ആൻഡ് ഹംബർ റീജണ്‍ മുൻ സെക്രട്ടറി വർഗീസ് ഡാനിയേൽ എന്നിവരെ പുതിയ പിആർഒമാരായി ദേശീയ പ്രസിഡന്‍റ് മാമ്മൻ ഫിലിപ്പ് പ്രഖ്യാപിച്ചു. വ്യക്തമായ മാർഗ നിർദ്ദേശത്തിന്‍റെ അടിസ്ഥാനത്തിൽ ആയിരിക്കും പിആർഒ ടീം പ്രവർത്തിക്കുന്നതെന്നും അദ്ദേഹം അറിയിച്ചു.

യുക്മ പബ്ലിക്ക് റിലേഷൻസ് ടീമിന് ദേശീയ പ്രസിഡന്‍റ് മാമ്മൻ ഫിലിപ്പും മറ്റു ദേശീയ നിർവാഹക സമതി അംഗങ്ങളും ആശംസകൾ നേർന്നു.
Copyright @ 2022 , Rashtra Deepika Ltd.