ബംഗളൂരു: ദൂരവാണിനഗർ കേരള സമാജത്തിന്‍റെ ഈ വർഷത്തെ ഓണചന്ത ഉദ്ഘാടനം ചെയ്തു. ഓഗസ്റ്റ് 31 മുതൽ സെപ്റ്റംബർ മൂന്നു വരെ വിജനപുര ജൂബിലി സ്കൂളിലും സെപ്റ്റംബർ ഒന്ന്, രണ്ട് തീയതികളിൽ രാമമൂർത്തി നഗറിലെ എൻആർ ലേ ഒൗട്ടിലുള്ള ജൂബിലി കോളജിലുമാണ് ഓണചന്ത പ്രവർത്തിക്കുന്നത്.
കേരളത്തിന്‍റെ തനത് ഓണവിഭവങ്ങളായ ഉപ്പേരി, ശർക്കരവരട്ടി, പപ്പടം, പാലട, ഏത്തപ്പഴം, ഹൽവ, അരിയട, സമാജം വനിതാ പ്രവർത്തകർ തയാറാക്കിയ വിവിധതരം അച്ചാറുകൾ, മധുര പലഹാരങ്ങൾ, വാഴയില, ഓണക്കോടി, കയർ ഉത്പന്നങ്ങൾ, റെഡിമെയ്ഡ് വസ്ത്രങ്ങൾ, ഗൃഹോപകരണങ്ങൾ, പുസ്തകങ്ങൾ എന്നിവ ഇവിടെ ലഭ്യമാണ്. വിവിധ സ്ഥാപനങ്ങളുടെ സ്റ്റാളുകളും ചന്തയുടെ ആകർഷണമാണ്.
കേരള സമാജത്തിന്‍റെ ഓണാഘോഷ പരിപാടി സെപ്റ്റംബർ 23നും (ശനി) സാഹിത്യസമ്മേളനവും പൊതുസമ്മേളനവും 24നും (ഞായർ) നടക്കും. വിവിധ കലാപരിപാടികളും സ്റ്റീഫൻ ദേവസ്യയുടെ സംഗീത നിശയും ആഘോഷത്തിന്റെ ഭാഗമായിരിക്കും.
ഓണചന്തയുടെ ഉദ്ഘാടനം രാമമൂർത്തി നഗർ സർക്കിൾ ഇൻസ്പെക്ടർ എസ്.ആർ ചന്ദ്രാധർ നിർവഹിച്ചു. ചടങ്ങിൽ സമാജം പ്രസിഡന്‍റ് പീറ്റർ ജോർജ്, ജനറൽ സെക്രട്ടറി മനോഹരൻ അയ്യോട്, ട്രഷറർ എം.കെ. ചന്ദൻ, സ്കൂൾ സെക്രട്ടറി ചന്ദ്രശേഖരകുറുപ്പ്, കണ്‍വീനർ പവിത്രൻ, ഭാസ്കരൻ എന്നിവർ സംബന്ധിച്ചു.