ബംഗളൂരു: ഹുള്ളഹള്ളി ക്രിസ്തുരാജാ ദേവാലയാങ്കണത്തിൽ ഒരുക്കിയ ക്രിസ്മസ് ഗ്രാമം സിഎംഐ തൃശൂർ ദേവമാതാ പ്രോവിൻഷ്യൽ ഫാ. വാൾട്ടർ തേലപ്പിള്ളി ഉദ്ഘാടനം ചെയ്തു. മാണ്ഡ്യ രൂപത ചാൻസലർ ഫാ. ജോമോൻ കോലേഞ്ചേരി സിഎംഐ, ഫാ. ജോയ്സ് എലവത്തിങ്കൽ സിഎംഐ എന്നിവർ മുഖ്യാതിഥികളായി. ബാലതാരം മീനാക്ഷി, പിന്നണിഗായിക മിൻമിനി എന്നിവർ വിശിഷ്ടാതിഥികളായിരുന്നു. വിവിധ സന്യാസസഭകളിലെ സുപ്പീരിയർമാരും വൈദികരും സന്യാസിനിമാരും ചടങ്ങിൽ പങ്കെടുത്തു. ചടങ്ങിൽ പ്രതിദിന സമ്മാനക്കൂപ്പണ്‍ ഉദ്ഘാടനം മിൻമിനി നിർവഹിച്ചു.
ശനിയാഴ്ച ക്രിസ്മസ് ഗ്രാമത്തിൽ, മാണ്ഡ്യ രൂപതാധ്യക്ഷൻ മാർ ആൻറണി കരിയിൽ ജീവകാരുണ്യ പദ്ധതിയിൽ നിന്നുള്ള ധനസഹായവും ക്രിസ്മസ് സമ്മാനവും വിവിധ അഗതിമന്ദിരങ്ങളിലെ അന്തേവാസികൾക്ക് വിതരണം ചെയ്തു. ജീവസംഗീതം കാരൾ ഗാനമത്സരങ്ങളിൽ വിജയികളായവർക്ക് സമ്മാനങ്ങൾ വിതരണം ചെയ്തു. രൂപത വികാരി ജനറാൾ റവ.ഡോ. മാത്യു കോയിക്കര സിഎംഐ, ധർമാരാം റെക്ടർ റവ.ഡോ. ജോർജ് ഇടയാടിയിൽ, വികാരി ഫാ. ബെന്നി പെങ്ങിപ്പറന്പിൽ സിഎംഐ തുടങ്ങിയവർ പങ്കെടുത്തു. ക്രൈസ്റ്റ് അക്കാഡമിയിലെ 230 അംഗ ഗായകസംഘം ആലപിച്ച കാരൾ ഗാനം, സാൾട്ട് ആൻഡ് പെപ്പർ സിംഗർ ലിയോ റൈസൻ, സ്റ്റാർ സിംഗർ ഫെയിം ക്രിസ് മരിയ എന്നവർ അവതരിപ്പിച്ച പ്രത്യേക സംഗീതപരിപാടി, ലേസർ ഷോ എന്നിവയും അരങ്ങേറി. ക്രിസ്മസ് ഗ്രാമം നിർമിക്കുന്നതിനായി സംഭാവന ചെയ്ത ജോസഫ് പൂതറ, ജിസ് ജേക്കബ്, അനീഷ് സെബാസ്റ്റ്യൻ തുടങ്ങിയവരെ ആദരിച്ചു.
ഇടവക സമൂഹത്തിൻറെ ഒരു മാസത്തെ അക്ഷീണ പ്രയത്നഫലമായാണ് ഹുള്ളഹള്ളി ഗ്രാമത്തിലെ ഒരേക്കർ സ്ഥലത്ത് ക്രിസ്മസ് ഗ്രാമം ഉയർന്നത്. 40 അടി ഉയരമുള്ള ക്രിസ്മസ് ട്രീ, 25 അടി ഉയരമുള്ള ക്രിസ്മസ് പാപ്പാ, യൗസേപ്പിൻറെയും മേരിയുടെയും ഭവനങ്ങൾ, ഹോറോദോസിൻറെ കൊട്ടാരം, കുന്നിൻചെരിവിലെ വെള്ളച്ചാട്ടം, നോഹയുടെ പേടകം, സത്രം, ലൈവ് പൂൽക്കൂട്, പ്രവേശനകവാടം, ദീപാലങ്കാരങ്ങളുടേയും നക്ഷത്രസമുച്ചയത്തിൻറെയും വശ്യമനോഹാരിത, കുട്ടികളുടെ പാർക്ക്, അതിലെ മൃഗങ്ങൾ തുടങ്ങിയവ ക്രിസ്മസ് ഗ്രാമത്തിൻറെ സവിശേഷതകളാണ്.