ബംഗളൂരു: കഴിഞ്ഞ വർഷം ബംഗളൂരു കെംപഗൗഡ അന്താരാഷ്ട്ര വിമാനത്താവളത്തിൽ നിന്ന് ഏറ്റവും കൂടുതൽ അന്താരാഷ്ട്ര യാത്ര നടന്നത് ദുബായിലേക്ക്. 1,79,070 പേരാണ് കഴിഞ്ഞ വർഷം ദുബായിയിലേക്ക് പറന്നത്.
സിംഗപ്പൂരാണ് രണ്ടാം സ്ഥാനത്ത്. 1,52,657 പേരാണ് സിംഗപ്പൂരിലേക്കു യാത്ര ചെയ്തത്. മൂന്നാം സ്ഥാനത്തുള്ള ലണ്ടനിലേക്ക് 86,793 പേരും യാത്ര ചെയ്തു. കൊളംബോ, ബാങ്കോക്ക്, സാൻഫ്രാൻസിസ്കോ, മസ്കറ്റ്, ജിദ്ദ, ക്വലാലംപുർ, ന്യൂയോർക്ക് എന്നിവയാണ് ആദ്യപത്തിലുള്ള മറ്റ് നഗരങ്ങൾ. ഇവയിൽ കൊളംബോയിലേക്കുള്ള യാത്രക്കാരുടെ എണ്ണത്തിൽ മുൻവർഷത്തേക്കാൾ 54 ശതമാനത്തിന്‍റെ വർധനയാണ് ഇത്തവണയുണ്ടായത്.
അതേസമയം, ബംഗളൂരുവിൽ നിന്നുള്ള യാത്രക്കാർ സഞ്ചരിച്ച ഇന്ത്യൻ നഗരങ്ങളിൽ ഒന്നാം സ്ഥാനത്ത് ഡൽഹിയാണ്. 17,39,888 യാത്രക്കാരാണ് ഡൽഹിയിലേക്ക് യാത്രചെയ്തത്. രണ്ടാംസ്ഥാനത്തുള്ള മുംബൈയിലേക്ക് 13,53,419 പേരും മൂന്നാം സ്ഥാനത്തുള്ള ഹൈദരാബാദിലേക്ക് 6,99,610 പേരും യാത്രചെയ്തു. അതേസമയം, പട്ടികയിൽ ഒരു സ്ഥാനം കയറി കൊച്ചി എട്ടാം സ്ഥാനത്തെത്തി. ഈവർഷം 3,21,711 പേരാണ് കൊച്ചിയിലേക്ക് സഞ്ചരിച്ചത്.